މެޑްރިޑް (މެއި 13) - ސްޕެނިޝް ލީގުގައި ރޭ ލެވަންޓޭ އަތުން 6-0 އިން ރެއާލް މެޑްރިޑް މޮޅުވި މެޗުގައި ކަރިމް ބެންޒެމާ ޖެހި ގޯލާ އެކު ރެއާލްގެ ކުރީގެ ކެޕްޓަން ރައުލް ގޮންޒާލޭޒްގެ ރެކޯޑާ ހަމަކޮށްފި އެވެ.
ރައުލް އާއި ބެންޒެމާ މިހާރު އޮތީ 323 ގޯލާ އެކު ރެއާލަށް ދެ ވަނަ އަށް އެންމެ ގިނަ ގޯލު ޖެހި ކުޅުންތެރިންގެ ގޮތުގަ އެވެ. ރައުލް އާއި ބެންޒެމާ އަށް ވުރެ ގިނައިން ރެއާލަށް ގޯލު ޖަހައިދިނީ އެންމެ ކުޅުންތެރިއެކެވެ. އެއީ 450 ގޯލު ޖަހައިދިން ކްރިސްޓިއާނޯ ރޮނާލްޑޯ އެވެ. މި ސީޒަނުގައި ބެންޒެމާ ވަނީ ރެއާލަށް ހުރިހާ މުބާރާތެއްގައި 42 ގޯލު ޖަހައިދީފަ އެވެ.
ލީގުގައި އެންމެ ފަހުން ކުޅުނު މެޗުގައި އެތުލެޓިކޯ މެޑްރިޑް އަތުން ބަލިވެފައި އޮތުމުން ރޭގެ މެޗަށް ރެއާލް ނުކުތީ އަލުން ފޯމަކަށް އެޅުމަށެވެ. އެ ގޮތުން ފުރަތަމަ ހާފުގައި އެކަނި ވެސް ރެލިގޭޝަނުގައި އޮތް ލެވަންޓޭ ކޮޅަށް ހަތަރު ގޯލު ޖެހި އެވެ.
މެޗުގެ 13 ވަނަ މިނިޓްގައި ރެއާލަށް ލީޑުނަގައިދިނީ ލޫކަ މޮޑްރިޗް ދިން ބޯޅައަކުން ފާލަންޑް މެންޑީ އެވެ. ބޯޅަ ހިފައިގެން އޭރިއާތެރެއަށް ވަދެ، މެންޑީ ޖެހި ބޯޅަ ވަނީ ގޯލުގެ ކައިރީ ކަނަށެވެ. މެޗުގެ 19 ވަނަ މިނިޓްގައި ވިނީޝިއުސް ޖޫނިއާ ނެގި ހުރަހަކުން ބެންޒެމާ ވަނީ ބޮލުން ގޯލެއް ޖަހައި، ރެއާލްގެ ލީޑުފުޅާކޮށްދީފަ އެވެ.
މޮޑްރިޗް ދިން ބޯޅައަކުން މެޗުގެ 33 ވަނަ މިނިޓްގައި ރެއާލްގެ ތިން ވަނަ ގޯލު ޖެހީ ރޮޑްރީގޯ އެވެ. މެޗުގެ 41 ވަނަ މިނިޓްގައި ރެއާލްގެ ފެޑެރީކޯ ވަލްވޭޑޭ ޖެހި ބޯޅަ އަމާޒުވީ ގޯލުގެ ހުރަސްދަނޑިއަށެވެ.
ގޯލު ޖެހުމަށް ފަހު ވިނީޝިއުސް އުފާފާޅުކުރަނީ.: ރޭގެ މެޗުގައި ފެނިގެންދިޔައީ ވިނީޝިއުސްގެ ފުރަތަމަ ކްލަބް ހެޓްރިކް-- ފޮޓޯ: އޭއެފްޕީ
އެކަމަކު، އޭގެ ހަތަރު މިނިޓް ފަހުން މޮޑްރިޗް ދިން ބޯޅައަކުން ވިނީޝިއުސް ވަނީ ރެއާލްގެ ހަތަރު ވަނަ ގޯލު ޖަހައިފަ އެވެ. މޮޑްރިޗް ވަނީ ފުރަތަމަ ހާފުގައި ލަނޑު ޖަހަން ފުރުސަތު ތަނަވަސްކޮށްދިނުމުން ހެޓްރިިކެއް ހަދައިފަ އެވެ.
ދެ ވަނަ ހާފްގައި ރެއާލްގެ ދެ ގޯލު ޖަހައި ވިނީޝިއުސް ވަނީ ހެޓްރިކެއް ހަދައިފަ އެވެ. އެ ގޮތުން މެޗުގެ 68 ވަނަ މިނިޓްގައި ވިނީޝިއުސް އޭނާގެ ދެ ވަނަ ގޯލު ޖެހީ ލެވަންޓޭގެ ކީޕަރު، ކާޑޭނިއާސް ކައިރިން ނައްޓާފައި ބެންޒެމާ ދިން ބޯޅައަކުންނެވެ. އަދި މެޗުގެ 83 ވަނަ މިނިޓްގައި ވިނީޝިއުސް ހެޓްރިކް ހެދި ގޯލު ޖެހީ ބެންޒެމާގެ ބަދަލުގައި ކުޅެން އެރި ލޫކަ ޔޯވިޗް ދިން ބޯޅައަކުންނެެވެ. މިއީ ވިނީޝިއުސް ކްލަބް ލެވަލްގައި ހެދި ފުރަތަމަ ހެޓްރިކް އެވެ.
ލީގުގެ އެއް ވަނައިގައި އޮތް ރެއާލަށް 36 މެޗުން ވަނީ 86 ޕޮއިންޓް ލިބިފަ އެވެ. ބާސެލޯނާ ދެ ވަނައިގައި އޮތީ 36 މެޗުން 72 ޕޮއިންޓާ އެކު އެވެ. ތިން ވަނައިގައި އެތުލެޓިކޯ މެޑްރިޑް އޮތީ 36 މެޗުން 67 ޕޮއިންޓް ހޯދައިގެންނެވެ. ހަތަރެއްގައި އޮތް ސެވިއްޔާ އަށް 36 މެޗުން ވަނީ 66 ޕޮއިންޓް ލިބިފަ އެވެ.
ލީގުގެ ފުލުގައި އޮތް ލެވަންޓޭ އަށް އޮތީ 36 މެޗުން 29 ޕޮއިންޓެވެ.
