އެމްއެމްޕީއާރުސީގެ ހިޔާނާތުގެ ފައިސާ ލިބުނު ކަމަށް ބެލެވޭ މީހުންގެ ނަންތައް ހިމެނޭ ލިސްޓެއް ރައްޔިތުންގެ މަޖިލީހުން އާންމުކުރީ ބައެއް ނަންތައް އުނިކުރުމަށް ފަހު ކަމަށާއި އަސްލު ލިސްޓު އަދި ވަރަށް އަވަހަށް އާންމު ވާނެ ކަމަށް އިކޮނޮމިކް މިނިސްޓަރު ފައްޔާޒު އިސްމާއީލް މިރޭ ވިދާޅުވެއްޖެ އެވެ.
އެމްޑީޕީގެ ޗެއާޕާސަން ކަމަށް ފައްޔާޒާ ވާދަކުރައްވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހްމީ (އިންތި) ގެ ޓީމުން ފައްޔާޒާއި ސަރުކާރަށް ތުހުމަތު ކުރާ އެއް ވާހަކައަކީ އެމްއެމްޕީއާރުސީ ހިޔާނާތާއި އެހެން ހިޔާނާތުގެ މައްސަލަތައް ވެސް ބަލަން ނުޅޭ ކަމުގު ތުހުމަތެވެ.
"ސަންގުޓީވީ" އިން ކުރިއަށް ގެންދިޔަ ބަހުސްގައި އިންތިގެ ޓީމުން ކުރާ ތުހުމަތުތަކާ ގުޅޭ ގޮތުން ކުރި ސުވާލުތަކުގެ ޖަވާބުގައި ފައްޔާޒު ވިދާޅުވީ އެ ޓީމުގެ އިސް ގިނަ ބޭފުޅުން ދައްކަވަނީ ހުސް ދޮގު ވާހަކަތައް ކަމަށެވެ.
"ހިޔާނާތުގެ މައްސަލަތައް ހަވާލު ކުރި ކޮމިޝަންގެ ރައީސަކަށް ހުންނެވި ބޭފުޅާ އައްސަދު ހުންނެވީ ވެސް އިންތިގެ ޓީމުގައި، އެ ތަހުގީގަށް ކުރިއެރުން ނުލިބުނު ނަމަ އެއީ އިންތިގެ ޓީމުގެ ކަމެއް،" ފައްޔާޒު ވިދާޅުވި އެވެ.
ހިޔާނާތުގެ މައްސަލަ ބެލުމުގެ ޝައުގުވެރިކަން ސަރުކާރުގެ ނެތް ކަމަށް ބުނާ ވާހަކައަށް ރައްދު ދެއްވަމުން ފައްޔާޒު ދެން ފާހަގަކުރެއްވި ކަމަކީ ރައްޔިތުންގެ މަޖިލީހުން އޭގެ ފައިސާ ލިބުނު މީހުންގެ ލިސްޓެއް ނެރުނީ ވެސް ވަކި ބަޔެއްގެ ނަންތައް އުނިކޮށްފައި ކަމަށެވެ.
"އެމްއެމްޕީއާރުސީ ހިޔާނާތުގެ ލިސްޓުން ނަންތައް އުނިކޮށްފައި ރައްޔިތުންގެ މަޖިލީހުން ނެރެނީ. ހަގީގީ ލިސްޓު އަދި އަޅުގަނޑުމެން ނެރޭނަން،" އިންތިއަށް ސަޕޯޓު ކުރައްވާ މެމްބަރުންތަކެއް ތިއްބެވި ކޮމިޓީން ނެރުނު ހިޔާނާތުގެ ލިސްޓަށް އިޝާރާތް ކުރައްވައި ފައްޔާޒު ވިދާޅުވި އެވެ.
"ޕާޓީއަށް ބޭނުމީ އެޑްމިނިސްޓްރޭޓަރެއް، އިންތިއަކަށް ނުވާނެ"
މިރޭ ކުރިއަށްގެންދިޔަ ބަހުސްގައި ފައްޔާޒާއި އިންތި ވެސް ތުހުމަތުތައްކޮށް ވާހަކަ ދައްކާފައިވެ އެވެ. އެކަކު އެނަކަކަށް ބަހުގެ ހޫނު ހަމަލާތަކެއް ވެސް ވަނީ ދެއްވައިފަ އެވެ.
އިންތިއަށް ވަރަށް ބޮޑަށް ފާޑު ވިދާޅުވަމުން ފައްޔާޒު ވިދާޅުވީ އިންތިއަކީ އިދާރީ ކަންކަމުގެ ތަޖުރިބާ އެއްވެސް ވަރަކަށް އޮތް ބޭފުޅެއް ނޫން ކަމަށެވެ. އެހެންކަމުން ފައްޔާޒުގެ ޝިއާރާ އެއް ގޮތަށް "އެމްޑީީޕީ ހިންގާލަން" ބޭނުންވަނީ ފައްޔާޒު ފަދަ "އެފެކްޓިވް އެޑްމިނިސްޓްރޭޓަރެއް" ކަމަށް އޭނާ ވިދާޅުވި އެވެ.
އެ ވާހަކައިގެ ރައްދުގައި އިންތި ވިދާޅުވީ އެމްޑީޕީއަކީ ކުންފުންޏެއް ނޫން ކަމަށާއި ސިޔާސީ ޕާޓީއެއްގެ މަސައްކަތަކީ އިންސާނީ މަސައްކަތެއް ކަމަށެވެ. ސިޔާސީ މަސައްކަތުގެ ތަޖުރިބާގެ އިތުރުން އޭނާއަކީ ވަކީލެއް ކަމުގައި ވާތީ އެ ތަޖުރިބާ ހުންނަވާނެ ކަމަށް އިންތި ވިދާޅުވި އެވެ.
ނަޒާހަތްތެރިއެއް ކަމަށް ވިދާޅުވެ އިންތި ހައްދަވަނީ ދޮގު ކަމަށް ވެސް ފައްޔާޒު ވިދާޅުވެފައިވެ އެވެ. ވަޒީފާގެ ބޭނުމަށް އިންތި ވެސް އޭނާއަށް ގުޅުއްވާފައިވާ ކަމަށް ފައްޔާޒު މިރޭ ވިދާޅުވި އެވެ. މި ކަންކަން އިންތި ދޮގު ކުރައްވައި އޭނާ ދިފާއު ކުރައްވަން މަސައްކަތް ކުރައްވާފައި ވެސް ވެ އެވެ.
ފޯރިގަދަ ބަހުސެއް މިރޭ ފެނިގެން ދިޔައިރު، އަންނަ ހޮނިހިރު ދުވަހު ބާއްވާ އިންތިހާބު ކާމިޔާބު ކުރާ ޗެއާޕާސަން އެމްޑީޕީގެ ދެން އޮންނަ ކޮންގްރެސްގެ ރިޔާސަތު ބަލަހައްޓަވާނެ އެވެ. "ދެވަނަ އުކުޅަސް ކޮންގްރެސް" އަށް ޕާޓީގެ ރައީސް މުހައްމަދު ނަޝީދުގެ ގިނަ ހުށަހެޅުއްވުންތަކެއް ހުރިއިރު، މި އިންތިހާބުގެ ފޯރިގަދަ ވެފައި ވަނީ މި ސަބަބުތަކާ ހުރެ އެވެ.
އެމްޑީޕީގެ އެތެރޭގައި ރައީސް އިބްރާހީމް މުހައްމަދު ސޯލިހްގެ ފެކްޝަނަކާއި ރައްޔިތުންގެ ރައީސް ނަޝީދުގެ ފެކްޝަނެއް ވެސް އުފެދި، މި އިންތިހާބުގައި ވެސް މި ފެންނަނީ މި ދެ ފެކްޝަންގެ ވާދަވެރިކަމެވެ. ރައީސްގެ ތާއީދު އޮތީ ފައްޔާޒަށެވެ. އަދި ނަޝީދު ތާއީދު އޮތީ އިންތިއަށެވެ.
އެމްޑީޕީގެ އެތެރޭގެ އިންތިހާބަކީ ސިޔާސީ ޕާޓީއަކުން ރާއްޖޭގައި ބާއްވާ އެންމެ ބޮޑު އެއް އިންތިހާބެވެ. އެ އިންތިހާބުގައި ވޯޓުލުމުގެ ހައްގު ލިބޭ މެމްބަރުންގެ އަދަދު 90،000 އަށް ވުރެ އިތުރެވެ. ނަމަވެސް މީގެ ކުރީގެ އިންތިހާބުތަކުގައި ވޯޓު ދީފައި ވަނީ ހައްގު ލިބޭ މީހުންނާ އަޅާބަލާއިރު އެވްރެޖްކޮށް މަދުންނެވެ.
