ކޮލޮމްބޯ، ސްރީލަންކާ (މޭ 12) - ސްރީލަންކާގެ ބޮޑު ވަޒީރު ކަމަށް އަނެއްކާވެސް ރަނިލް ވިކްރަމަސިންހަ އައްޔަނުކުރައްވައިފި އެވެ.
ރައީސް ގޮތަބަޔާ ރާޖަޕަކްސަގެ ކުރިފުޅުމަތީގައި ރަނިލް މަގާމުގެ ހުވާކުރެއްވީ ބުރާސްފަތި ދުވަހު އެވެ. ރައީސްގެ ބޭބޭފުޅު، ކުރީގެ ބޮޑު ވަޒީރު މަހިންދަ ރާޖަޕަކްސަ ގައުމުން ފުރުން ވަނީ މަނާކޮށްފަ އެވެ.
ރަނިލް ވަނީ މީގެ ކުރިން ފަސް ފަހަރެއްގެ މަތިން ބޮޑު ވަޒީރުކަން ކުރައްވާފަ އެވެ. އުމުރުން 73 އަހަރުގެ ރަނިލްއަށް ކުރިމަތިވެވަޑައިގަންނަވާ އެންމެ ބޮޑު މަސައްކަތަކީ އިގްތިސާދީ ހާލަތު ރަނގަޅު ކުރުމެވެ.
"ހުކުރު ދުވަހުގެ ވަގުތެއްގައި އާ ކެބިނެޓް އައްޔަނު ކުރާނެ ކަމަށް ބެލެވޭ،" ރައީސްގެ ތަރުޖަމާނު ސުދޭވާ ހެޓިއަރައްޗީ އޭއެފްޕީއަށް ވިދާޅުވި އެވެ.
ބުދަ ދުވަހުގެ ރޭ ޓީވީ މެދުވެރިކޮށް ގައުމާ މުހާތަބު ކުރައްވަމުން އުމުރުން 72 އަހަރުގެ ރައީސް ގޮތަބަޔާ ވިދާޅުވީ ރައީސްގެ ބާރުތައް ކުޑަ ކުރަން މަސައްކަތް ކުރައްވާނެ ކަމަށެވެ.
ލަންކާގައި މުޒާހަރާ ކުރާ ފަރާތްތަކުގެ އެއް ޑިމާންޑަކީ ރައީސް ވެސް އިސްތިއުފާ ދެއްވުމެވެ. ނަމަވެސް އިސްތިއުފާ ދެއްވަން އެމަނިކުފާނު ބޭނުމެއް ނުވެ އެވެ.
އެހެންކަމުން، ބެލެވޭ ގޮތުގައި ރައީސްގެ ބާރުތައް ކުޑަ ކުރައްވާނެ ކަމަށް ވިދާޅުވީ މަގާމުގައި ދެމިހުންނަވައި، އިދިކޮޅު ޕާޓީތައް ހިތްހަމަޖެއްސުމުގެ ބޭނުމުގަ އެވެ.
