ކޮލޮމްބޯ، ސްރީލަންކާ (މޭ 12) - ސްރީލަންކާގައި އިސްތިއުފާ ދެއްވި ބޮޑު ވަޒީރު މަހިންދަ ރާޖަޕަކްސަ އާއި ގާތް ބޭފުޅުން ގައުމުން ފުރުން މަނާކޮށްފި އެވެ.
މަހިންދަ ރާޖަޕަކްސައާ އެކު ފުރުން މަނާ ކުރި 15 މީހުންގެ ތެރޭގައި ކުރީގެ ސްޕޯޓްސް މިނިސްޓަރު، ދަރިކަލުން ނަމާލް ރާޖަޕަކްސަ ވެސް ހިމެނިވަޑައިގަންނަވަ އެވެ.
އެ މީހުން ފުރުން މަނާކޮށް އަމުރު ނެރުނީ، ސަރުކާރާ ދެކޮޅަށް ސުލްހަވެރިކަމާ އެކު މުޒާހަރާ ކުރަމުން ދިޔަ ރައްޔިތުންނަށް ހަމަލާދީ، ބޮޑެތި ހަމަނުޖެހުންތަކެއް އުފެދުނު މައްސަލައިގަ އެވެ.
މިދިޔަ ހޯމަ ދުވަހު ސުލްހަވެރި މުޒާހަރާއަށް ހުރަސް އަޅައި، ހަމަނުޖެހުން ހިންގަން ފެށީ މަހިންދަ ރާޖަޕަކްސަގެ ސަޕޯޓަރުންނެވެ. ރައްދުގައި މުޒާހަރާގެ ބައިވެރިން ވެސް ހަމަލާދީ، ހިންގި ހަމަނުޖެހުމުގައި މިހާތަނަށް ނުވަ މީހުން މަރުވެ، 200 އަށް ވުރެ ގިނަ މީހުންނަށް އަނިޔާވެ، މުދަލަށް ބޮޑެތި ގެއްލުންތަކެއް ލިބިފައިވެ އެވެ.
ވެރިރަށް ކޮލޮމްބޯގެ މެޖިސްޓްރޭޓް ކޯޓުން ފުލުހުންނަށް އަމުރު ކުރީ ހޯމަ ދުވަހުގެ ހަމަނުޖެހުމާ ގުޅޭ ފުރިހަމަ ތަހުގީގެއް ހިންގުމަށެވެ.
ކޯޓް އޮފިޝަލަކު އޭއެފްޕީއަށް ބުނީ މަހިންދަ ރާޖަޕަކްސަ އާއި ގާތް ބޭފުޅުން ހައްޔަރު ކުރަން އެދި ކޯޓަށް ޕެޓިޝަނެއް ހުށަހަޅާފައިވާ ކަމަށެވެ.
"ކޯޓުން އެ ޕެޓިޝަން ބަލައިނުގަތީ، އެއީ ތުހުމަތު ކުރެވޭ ކޮންމެ މީހަކު ހައްޔަރު ކުރުމުގެ ބާރު ފުލުހަށް ލިބިފައި ވާތީ،" އޮފިޝަލް ބުންޏެވެ.
ހޯމަ ދުވަހުގެ ހަމަނުޖެހުންތައް ކޮންޓްރޯލުން ނެއްޓުމުން، މަހިންދަ ރާޖަޕަކްސަ އިސްތިއުފާ ދެއްވި އެވެ. ނަމަވެސް ރައްޔިތުން ބޮޑު ވަޒީރުގެ ގެކޮޅު ވަށާލައި، އެމަނިކުފާނު ހައްޔަރު ކުރަން ޑިމާންޑް ކުރި އެވެ.
ސިފައިންގެ ހާއްސަ އޮޕަރޭޝަނެއްގައި ބޮޑު ވަޒީރުގެ ރަސްމީ ގެކޮޅު ދޫކޮށް، ރައްކާތެރި ތަނަކަށް މަހިންދަ ރާޖަޕަކްސަ ބަދަލުކުރެއްވީ އަންގާރަ ދުވަހުގެ ފަތިހު އެވެ.
ރިޕޯޓުތައް ބުނާ ގޮތުން އުމުރުން 76 އަހަރުގެ މަހިންދަ ރާޖަޕަކްސަ މި ވަގުތު ހުންނެވީ ލަންކާގެ އެންމެ އިރުގައި އޮންނަ ނޭވަލް ފެސިލިޓީއެއްގަ އެވެ.
މިދިޔަ އަންގާރަ ދުވަހު ނަމާލް ރާޖަޕަކްސަ އޭއެފްޕީއަށް ވިދާޅުވީ، ރާޖަޕަކްސަ އާއިލާއިން ގައުމުން ދޫކޮށް ދިޔުމުގެ ވިސްނުމެއް ނުގެންގުޅޭ ކަމަށެވެ.
