ކޮލޮމްބޯ، ސްރީލަންކާ (މޭ 10) - ސްރީލަންކާގައި ލޫޓުވައި، މުދަލަށް ގެއްލުންދޭ މީހަކު ފެނިއްޖެ ނަމަ ވަގުތުން ބަޑި ޖެހުމަށް ޑިފެންސް މިނިސްޓްރީން ސިފައިންނަށް އަމުރުކޮށްފި އެވެ.
"އާއްމު މުދާ ލޫޓުވައި، މީހުންގެ ފުރާނައަށް ނުރައްކާވާ ފަދަ އަމަލެއް ހިންގާ މީހަކު ފެނިއްޖެ ނަމަ، ވަގުތުން ބަޑި ޖަހަން ސަލާމަތީ ފައުޖުތަކަށް ވާނީ އަމުރުކޮށްފައި،" ޑިފެންސް މިނިސްޓްރީން ބުންޏެވެ.
ހޯމަ ދުވަހު ވެރިރަށް ކޮލޮމްބޯ އާއި އެހެން ސިޓީތަކުގައި ބޮޑެތި ހަމަނުޖެހުންތައް ހިންގާފައިވާ އިރު، މަގުތައް ޕެޓްރޯލް ކުރަން ސިފައިންނާއި، ނޭވީ އަދި ވައިގެ ފައުޖުގެ އެތައް ހާސް މެމްބަރުން ވަނީ ނެރިފަ އެވެ.
އަންގާރަ ދުވަހު ފުލުހުން ބުނީ ހަމަނުޖެހުންތަކުގައި އަށް މީހުން މަރުވި އިރު، އޭގެ ތެރޭގައި ދެ ފުލުހުން ހިމެނޭ ކަމަށެވެ. ޖުމްލަ 65 ގެއަށް ގެއްލުން ލިބިފައިވާ އިރު، 41 ގޭގައި ހުޅުޖެހި އެވެ.
ރަސްމީ ތަފާސްހިސާބުން ދައްކާ ގޮތުގައި ހޯމަ ދުވަހު އާއި އެ ދުވަހުގެ ރޭ ހިންގި ހަމަނުޖެހުންތަކުގައި 88 ކާރާއި ބަސް އަދި އެތައް ސަތޭކަ ސައިކަލަށް ގެއްލުން ލިބުނެވެ.
މިދިޔަ ހުކުރު ދުވަހުން ފެށިގެން ސްރީލަންކާގައި ކުއްލި ނުރައްކަލުގެ ހާލަތު އިއުލާނުކޮށްފައިވާ އިރު، ތުހުމަތު ކުރެވޭ މީހުން ހުއްޓުވުމާއި ބަންދު ކުރުމުގެ ބާރު ސިފައިންނަށް ލިބިދެ އެވެ.
އެޕްރީލް ނުވަ ވަނަ ދުވަހުން ފެށިގެން ސުލްހަވެރިކަމާ އެކު މުޒާހަރާ ކުރަމުން ދިޔަ މީހުންނަށް، ސަރުކާރުގެ ސަޕޯޓަރުން ހަމަލާ ދިނުމުން އުފެދުނު ހަމަޖެހުމާ ހެދި، ދެ ދުވަހަށް ކާފިއު އިއުލާނުކޮށްފައިވެ އެވެ.
ވެރިރަށް ކޮލޮމްބޯގައި ހުންނަ މައި ހޮސްޕިޓަލުން ބުނީ ހަމަނުޖެހުންތަކުގައި 219 މީހުންނަށް އަނިޔާވެގެން ފަރުވާ ކުރަން ގެނައި ކަމަށެވެ. އެހެން ހޮސްޕިޓަލްތަލަށް ހަ މީހުން ގެންދިޔަ އެވެ.
އަންގާރަ ދުވަހުގެ މެންދުރު، ލަންކާގެ އެންމެ އިސް ފުލުހަށް ވެސް ހަމަލާދީ، އޭނާގެ އުޅަނދުގައި ހުޅުޖެހި އެވެ. އެކަން ކުރީ، ސުލްހަވެރި މުޒާހަރާއަށް ހަމަލާ ދޭން ފުރުސަތު ދިން ކަމަށް ތުހުމަތުކޮށެވެ.
