ހުޅުމާލެ ފޭސް އެކެއްގެ ހަތް ބިމެއްގައި މެދު ފަންތީގެ އާމްދަނީ ލިބޭ މީހުންނަށް ހާއްސަކޮށް މިކްސް ޔޫސް އެޕާޓްމެންޓް ބިލްޑިންތަކެއް އަޅައިދޭނެ ފަރާތްތަކެއް ހޯދަން ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ) އިން އިއުލާންކޮށްފި އެވެ.
އެޗްޑީސީން އިއުލާންކުރި ހަތް ބިމަކީ 26،400 އަކަފޫޓާއި 34،300 އަކަފޫޓުގެ ހަތް ބިމެވެ. އެ ބިންތަކަކީ ހުޅުމާލެ ފޭސް އެކެއްގެ ވެމްކޯ ކުނިކޮށި ކައިރިން އެޕޯލޯ ޓަވަރުތަކާއި ޖެހިގެން ފިތުރޯނު މަގާއި ކުރެދިމާ ހިނގުން ގުޅޭ ކަންމައްޗަށް ވާ ގޮތަށް އޮތް ހަތަރު ބިމަކާއި ސެންޓްރަލް ޕާކު ކައިރިން ރެއިންކްރެސްޓް ޓަވަރުތަކުގެ ކުރިމައްޗަށް ރީތިގަސްމަގަށް ވާ ގޮތަށް އޮތް ތިން ބިމެވެ.
އެ ބިންތަކުގައި އެޗްޑީސީން އަޅަން ނިންމާފައިވަނީ 14 ފަންގިފިލާގެ ޓަވަރުތަކެކެވެ. އެ ޓަވަރުތަކުގެ ތިރީ ފަންގިފިލާތައް ވިޔަފާރީގެ ބޭނުމަށް ހާއްސަކުރާއިރު އެހެން ފަންގިފިލާތަކުގައި ހަދާނީ މީހުން ދިރިއުޅެން ދެ ކޮޓަރިއާއި ތިން ކޮޓަރީގެ އެޕާޓްމެންޓްތަކެކެވެ. ދެ ކޮޓަރީގެ އެޕާޓްމެންޓްތަކުގައި 700 އަކަފޫޓު ހުންނަން ޖެހޭ އިރު، ތިން ކޮޓަރީގެ ތަންތަނުގައި 900 އަކަ ފޫޓު ހުންނަންވާނެކަމަށް އެޗްޑީސީގެ އެ އިއުލާނުގައި ބުންޏެވެ.
އެޗްޑީސީން ތަރަައްގީކުރަން ހުޅުވާލި ބިންތަކުގެ ތަފްސީލު.
އެ އިއުލާނުގައި ބުނީ އެ ތަންތަން ނިންމުމަށްފަހު ވިއްކާ ދެ ކޮޓަރީގެ އެޕާޓްމެންޓްތަކުގެ 60 ޕަސެންޓް ތަންތަނުގެ އަގު 1.5 މިލިއަން ރުފިޔާގައި ހިފަހައްޓަން ވާނެ ކަމަށެވެ. އަދި އަގު ހިފެހެއްޓިފައިވާ ތިން ކޮޓަރީގެ ތަންތަން 2.5 މިލިއަނަށްވުރެ ބޮޑު އަގުގައި ވިއްކައިގެން ނުވާނެ ކަމަށް ވެސް އިއުލާނުގައި ވެ އެވެ. އެތަންތަން ވިއްކަން ވާނީ ހައުސިން މިނިސްޓްރީން އެކަމަށްޓަކައި ކަނޑައަޅާ ގައިޑްލައިންތަކާއި އެއްގޮތަށް ކަމަށް ވެސް އެޗްޑީސީގެ އިއުލާނުގައި ބުންޏެވެ.
އިމާރާތްކުރާ ކުންފުނީގެ އަމިއްލަ ހަރަދުގައި ޓަވަރުތައް އަޅަން ދޫކުރާ އި ބިންތަކުގައި، އެތަންތަނުގައި އެއްގަމު އުޅަނދު ޕާކު ކުރާނެ ޖާގަތަކެއް ވެސް ބަހައްޓަން ޖެހެ އެވެ.
އެޗްޑީސީން ބުނިގޮތުގައި އެ ބިންތަކުގެ ތެރެއިން ތިން ބިމެއްގައި މިހާރުވެސް ފައުންޑޭޝަންތަކެއް އެބަހުއްޓެވެ. އެކަމަކު މިހާރު ހުރި ކޮންކްރީޓް ފައުންޑޭޝަންތަކަކީ އެންމެ އެކަށީގެންވާ ފައުންޑޭޝަންތަކެއް ނޫނެވެ. އެއީ ސެންޓްރަލް ޕާކު ކައިރިން ރީތިގަސް މަގަށް ވާ ގޮތަށް އޮންނަ ތިން ބިމެވެ.
އެޗްޑީސީން ތަރައްގީކުރަން ދޫކުރާ ބިންތައް.
އެ ފައުންޑޭޝަންތައް ރަނގަޅުކުރުމުގެ މަސައްކަތް ވެސް ކުރަން ޖެހޭނީ އެތަންތަން ތަރައްގީކުރާ ފަރާތުންނެވެ.
އެ ހަތް ބިމުގައި އަޅާ އިމާރާތްތަކަކީ ތިން އަހަރު ދުވަސް ތެރޭ ނިންމަން ހަވާލުކުރާ ތަންތަނެވެ.
އެ މަސައްކަތަށް ޝައުގުވެރިވާ ފަރާތްތަކަށް އަންނަ މަހުގެ 24 ވަނަ ދުވަހު އޮންލައިންކޮށް ޕްރީ ޕްރޮޕޯޒަލް ބައްދަލުވުމެއް ބާއްވާނެ އެވެ. މިމަހުގެ 31 ވަނަ ދުވަހު މައުލޫމާތު ސާފުކުރަން ހުޅުވާލާއި، މައުލޫމާތު ސާފުކުރަން އެދޭ ފަރާތްތަކަށް، ޖޫން ހަވަނަ ދުވަހު އެޗްޑީސީން ޖަވާބުދޭނެ އެވެ.
ހާޒިރުވެގެން މައުލޫމާތު ދޭ ސެޝަނެއް އޭގެ ފަހުން ޖޫން 19 ވަނަ ދުވަހު ބާއްވަން ހަމަޖެހިފައިވާއިރު، އެޗްޑިސީގެ ހާއްސަ ޕޯޓަލް މެދުވެރިކޮށް ޕްރޮޕޯޒަލް ބަލައިގަންނަން ފަށާނީ ޖޫން ހަޔަކުން ފެށިގެން އެމަހުގެ 23ގެ ނިޔަލަށެވެ.
