ކޮލޮމްބޯ، ސްރީލަންކާ (މޭ 10) - ރުޅި ގަދަވެފައި ތިބި ގިނަ އަދަދެއްގެ އާއްމުން ބޮޑު ވަޒީރުގެ ރަސްމީ ގެކޮޅު ވަށާލުމުން، ސިފައިންގެ ހާއްސަ އޮޕަރޭޝަނެއްގައި އަންގާރަ ދުވަހުގެ ހެނދުނު މަހިންދަ ރާޖަޕަކްސަ ރައްކާތެރި ތަނަކަށް ގެންގޮސްފި އެވެ.
ޑޮލަރު ހުސްވެ، ޒަރޫރީ މުދާ ނުލިބި، ކަރަންޓު ކަނޑަމުން ދާތީ ސަރުކާރުގެ އިސްތިއުފާއަށް ގޮވާލައި ސްރީލަންކާ ރައްޔިތުން މުޒާހަރާ ކުރާތާ ދެ މަސް ވެއްޖެ އެވެ. ރައީސް އޮފީސް ކުރިމަތީގައި ޓެންޓު ޖަހައިގެން އެޕްރީލް ނުވަ ވަނަ ދުވަހުން ފެށިގެން ދިޔައީ ސުލްހަވެރިކަމާ އެކު އަޑު އުފުލަމުންނެވެ.
ނަމަވެސް ސަރުކާރުގެ ސަޕޯޓަރުން އަންގާރަ ދުވަހުގެ ހެނދުނު އެ ސަރަހައްދަށް ގޮސް، ޓެންޓުތައް ރޫޅާލައި މުޒާހަރާގެ ބައިވެރިންނަށް ހަމަލާ ދިނުމުން ހަމަނުޖެހުން އުފެދުނެވެ. އެއާއެކު މަހިންދަ ރާޖަޕަކްސަ ބޮޑު ވަޒީރު ކަމުން އިސްތިއުފާ ދެއްވި އެވެ.
އެކަމަކު މުޒާހަރާގެ ބައިވެރިން ރުޅިގަދަވެ، ގޮވަމުން ދިޔައީ މަހިންދަ ރާޖަޕަކްސަ ހައްޔަރު ކުރުމަށެވެ. ސަރުކާރަށް ނިސްބަތްވާ ސިޔާސީ މީހުންނާއި ޕާލިމެންޓް މެމްބަރުންގެ ގެތަކުގައި ހުޅު ޖަހައި، ހިންގި ހަމަނުޖެހުމުގައި ފަސް މީހުން މަރުވެ، 180 އަށް ވުރެ ގިނަ މީހުންނަށް އަނިޔާވި އެވެ.
ގިނަ ސިޔާސީ ފަރާތްތަކެއްގެ ގެތައް ކައިރިއަށް އާއްމުން ޖަމާވެ ހަމަނުޖެހުން ހިންގި އިރު، ކޮލޮމްބޯގައި ހުންނަ ބޮޑު ވަޒީރުގެ ރަސްމީ ގެކޮޅު ޓެމްޕަލް ޓްރީޒް ވެސް އޮތީ ވަށާލައިފަ އެވެ. އެ ތަނުގެ މައި ގޭޓު ފޫއަޅުވާލައި، ޕާކުކޮށްފައި އޮތް އުޅަނދެއްގައި ރޯކޮށް، މީހުން މަސައްކަތް ކުރީ އިމާރާތުގެ ތެރެއަށް ވަނުމަށެވެ.
އެ ހަމަނުޖެހުން ހިންގަމުން ދިޔަ އިރު، މަހިންދަ ރާޖަޕަކްސަ އާއި އާއިލާ އަދި ސިޔާސީ ގާތް ބޭފުޅުން ތިއްބެވީ ދެ ފަންގިފިލާގެ އިމާރާތުގެ ތެރޭގަ އެވެ. ބައެއް ރިޕޯޓުތައް ބުނާ ގޮތުން އިމާރާތުގެ ތެރެއިން ވެސް ބަޑި ޖަހާ އަޑު އިވުނެވެ.
އަންގާރަ ދުވަހުގެ ފަތިހު ސިފައިން ހިންގި އޮޕަރޭޝަނެއްގައި މަހިންދަ ރާޖަޕަކްސަ އާއި އާއިލާ ރައްކާތެރި ތަނަކަށް ބަދަލުކޮށްފައިވާ ކަމަށް ސިފައިން އޭއެފްޕީއަށް ބުންޏެވެ. ޓެމްޕަލް ޓްރީޒްގެ ގޯތި ތެރެއަށް އެ ވަގުތު ވެސް 10 ޕެޓްރޯލް ބޮން އެއްލި ކަމަށް ސިފައިން ބުންޏެވެ.
ބޮޑެތި ހަމަނުޖެހުންތަކާ ގުޅިގެން ލަންކާގައި ކާފިއު ހިންގަމުންދާ އިރު، މުޒާހަރާގެ ބައިވެރިން ދަނީ މަހިންދަ ރާޖަޕަކްސަގެ ކޮއްކޯފުޅު ރައީސް ގޮތަބަޔާ ރާޖަޕަކްސަގެ އިސްތިއުފާއަށް ވެސް ޑިމާންޑް ކުރަމުންނެވެ.
