ފައިދާ އިތުރުކުރުމުގެ ގޮތުން ޔޫޓިލިޓީ ވިޔަފާރީގެ އިތުރުން ރިއަލް އެސްޓޭޓް ވިޔަފާރިއަށް ވަނުމަށް ސްޓެލްކޯއިން ނިންމާފައިވާ ކަމަށް އެ ކުންފުނީގެ މެނޭޖިން ޑިރެކްޓަރު އަހްމަދު ޝަރީފް ވިދާޅުވެއްޖެ އެވެ.
އެ މަސައްކަތްތައް ކުރިއަށް ގެންދިޔުމަށް ސްޓެލްކޯގެ އާޓިކަލްސް އޮފް އެސޯސިއޭޝަނަށް ބަދަލުތަކެއް ގެނެސް އިކޮނޮމިކް މިނިސްޓްރީއަށް ހުށަހަޅާފައިވާ ކަމަށް "އަދަދު" އަށް ދެއްވި ހާއްސަ އިންޓަވިއުއެއްގައި ޝަރީފް ހާމަކުރެއްވި އެވެ.
"އަޅުގަނޑުމެންގެ ބޯޑުން ނިންމައިފިން ރިއަލް އެސްޓޭޓް ބިޒްނަސްއަށް ވަދެވޭ ގޮތަށް، އަދި އެހެނިހެން ވިޔަފާރިތަކަށް ވެސް ވަދެވޭ ގޮތަށް،" ޝަރީފް ވިދާޅުވި އެވެ.
މިވަގުތު ސްޓެލްކޯއަށް އާމްދަނީ ލިބެމުންދަނީ ކަރަންޓުގެ ހިދުމަތް ފޯރުކޮށްދީގެން ރައްޔިތުންގެ އަތުން ނަގަމުންދާ ޓެރިފުންނެވެ. އެގޮތަށް ހޯދާ އާމްދަނީއަކީ 'އަންރިލައިބަލް' އެއްޗެއްގެ ގޮތުގައި ޝަރީފް ސިފަކުރެއްވި އެވެ.
"ކުންފުނީގެ ފައިދާ ޖެއްސުމަށްޓަކައި އަޅުގަނޑުމެން އެހެން ބިޒްނަސްތަކަށް ޑައިވާސިފައި ކުރަމުން މިދަނީ،" ބޯޑުގެ ނިންމުމާ ގުޅޭގޮތުން ވާހަކަ ދައްކަމުން ޝަރީފް "އަދަދު" އަށް ވިދާޅުވި އެވެ.
މިވަގުތު ވެސް ހުޅުމާލޭން އެ ކަމަށް ބޭނުންވާ ބިން ހޯދުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އާ އެކު މަސައްކަތްތަކެއް ސްޓެލްކޯއިން ދަނީ ކުރަމުންނެވެ. އަދި، ވިލިމާލެއިން ބިން ހޯދުމަށް ސިޓީ ކައުންސިލާއެކު ދަނީ މަސައްކަތް ކުރަމުންނެވެ.
"ދެވަނަ ބޭނުމަކީ ތެލަށް ބަރޯސާވާ މިންވަރު ކުޑަކުރުމަށް ފަހު އެހެން ދިމަދިމާލުން ލިބޭ އާމްދަނީ ބޭނުންކޮށްގެން ރައްޔިތުންނަށް ދޭ ހިދުމަތުގެ އަގު ކުޑަކޮށްލުން،" ޝަރީފް ވިދާޅުވި އެވެ.
ވަރަށް އަވަހަށް ރިއަލް އެސްޓޭޓް މާކެޓަށް ވަދެވޭނެ ކަމަށް ޝަރީފް ވިދާޅުވި އެވެ. އޭގެ އިތުރުން ފެން އުފެއްދުމުގެ މާކެޓަށް ވަނުމުގެ ވިސްނުންތަކެއް ވެސް ސްޓެލްކޯއިން ގެންގުޅެ އެވެ.
"މިހާރު ވެސް އަޅުގަނޑުމެންގެ ފެން އުފެއްދުމުގެ ކެޕޭސިޓީ އެބަހުރި ހަމަ ރާއްޖޭގެ ބޮޓޮލްޑް ފެން އުފައްދާ ކުންފުންޏަކާ އެއްވަރަށް،" ކުރިއަށް އޮތް އަހަރު ތެރޭގައި ފެނުގެ މާކެޓަށް ވަދެވޭނެ ކަމަށް އޭނާ ވިދާޅުވި އެވެ.
