ކޮލޮމްބޯ، ސްރީލަންކާ (މޭ 9) - ސްރީލަންކާގެ ބޮޑު ވަޒީރުގެ ރަސްމީ ގެކޮޅު، ޓެމްޕަލް ޓްރީޒްގެ އެތެރެއިން ބަޑި ޖަހާފައިވާ ކަމަށް އޭއެފްޕީއިން ރިޕޯޓުކޮށްފި އެވެ.
ބޮޑު ވަޒީރުގެ މަގާމުން މަހިންދަ ރާޖަޕަކްސަ ހޯމަ ދުވަހު އިސްތިއުފާ ދެއްވި ނަމަވެސް، ބޮޑު ވަޒީރުގެ ރަސްމީ ގެކޮޅު ކައިރިން މުޒާހަރާގެ ބައިވެރިން ގޮސްފައެއް ނުވެ އެވެ.
މުޒާހަރާ ކުރާ މީހުން ރުޅިގަދަވީ މަހިންދަ ރާޖަޕަކްސަ އާއި ރައީސް ގޮތަބަޔާ ރާޖަޕަކްސަގެ ސަޕޯޓަރުން، ސުލްހަވެރި މުޒާހަރާއަށް ހުރަސް އަޅައި، ހަމަނުޖެހުން އުފެއްދުމުންނެވެ.
ހޯމަ ދުވަހުގެ މެންދުރުން ފެށިގެން އެތައް ހާސް ބަޔަކު ޓެމްޕަލް ޓްރީޒް ކައިރިއަށް ޖަމާވެ، މައި ގޭޓް ފޫ އަޅުވާލައި، އެތެރެއަށް ވަދެވޭތޯ ދަނީ މަސައްކަތް ކުރަމުންނެވެ.
އޭއެފްޕީގެ ރިޕޯޓަރުން ބުނީ ހޯމަ ދުވަހުގެ ރޭގެ ވަގުތެއްގައި އެ އިމާރާތުގެ ތެރެއިން ބަޑި ޖެހި ކަމަށެވެ. މުޒާހަރާގެ ބައިވެރިން ފޮނުވާލެވޭތޯ ފުލުހުން ވެސް ދަނީ ގިނަ މަސައްކަތްތަކެއް ކުރަމުންނެވެ.
އެގޮތުން ކަރުނަ ގޭސް ޖަހައި، ވައިގެ ތެރެއަށް ބަޑި ޖަހާފައިވެ އެވެ. އޭއެފްޕީއިން ބުނި ގޮތުގައި އިސްތިއުފާ ދެއްވި މަހިންދަ ރާޖަޕަކްސަ އާއި ބައެއް ގާތް ބޭފުޅުން އަދިވެސް ތިއްބެވީ ބޮޑު ވަޒީރުގެ ރަސްމީ ގެކޮޅުގަ އެވެ.
ހަމަނުޖެހުންތަކުގައި 180 އަށް ވުރެ ގިނަ މީހުންނަށް އަނިޔާވެފައިވާ ކަމަށް ރިޕޯޓުކޮށްފައިވެ އެވެ. މިހާތަނަށް ފަސް މީހުން މަރުވެފައިވާ ކަމަށް އޭއެފްޕީއިން ބުނެ އެވެ.
