ކޮލޮމްބޯ، ސްރީލަންކާ (މޭ 9) - ސްރީލަންކާގައި ހޯމަ ދުވަހު ހިނގަން ފެށި ހަމަނުޖެހުމުގައި މިހާތަނަށް ފަސް މީހުން މަރުވެ، 180 އަށް ވުރެ ގިނަ މީހުންނަށް އަނިޔާވެއްޖެ އެވެ.
މަރުވި މީހުންގެ ތެރޭގައި ޕާލިމެންޓް މެމްބަރަކު ވެސް ހިމެނެ އެވެ. މަރުވީ ވެރިކަން ކުރާ ޕާޓީގެ ޕާލިމެންޓް މެމްބަރު އަމަރަކީރްތި އަތުކޮރަލަ އެވެ.
ފުލުހުން ބުނީ އޭނާ ވަނީ ހަމަނުޖެހުމުގެ ތެރެއިން ދެ މީހެއްގެ ގަޔަށް ބަޑި ޖަހާފައި ކަމަށެވެ. އޭގެ ތެރެއިން 27 އަހަރުގެ ފިރިހެނަކު ވަނީ މަރުވެފަ އެވެ.
އެއަށްފަހު، އޭނާ ދިރިއުޅޭ ގެ ކައިރިއަށް މުޒާހަރާގެ ބައިވެރިން އެއްވުމުން، އަމިއްލައަށް ބަޑި ޖަހައި މަރުވީ ކަމަށް ފުލުހުން ބުންޏެވެ.
ފުލުހުން އިތުރަށް ބުނީ ވެރިކަން ކުރާ ޕާޓީއަށް ނިސްބަތްވާ އެހެން ޕާލިމެންޓް މެމްބަރަކު ވީރަކެޓިޔަ އަވަށުގައި މުޒާހަރާގެ ބައިވެރިންގެ ތެރެއަށް ބަޑި ޖެހުމުން، ދެ މީހުން މަރުވެ، ފަސް މީހުންނަށް އަނިޔާވި ކަމަށެވެ.
ކޮލޮމްބޯ ނޭޝަނަލް ހޮސްޕިޓަލްގެ ތަރުޖަމާނު އޭއެފްޕީއަށް ވިދާޅުވީ އެ ހޮސްޕިޓަލުގައި އަނިޔާވެގެން 181 މީހުންނަށް ފަރުވާދެމުންދާ ކަމަށެވެ. އެހެން ހޮސްޕިޓަލްތަކުގައި އަށް މީހުންނަށް ދަނީ ފަރުވާދެމުންނެވެ.
