ކޮލޮމްބޯ، ސްރީލަންކާ (މޭ 9) - ސްރީލަންކާގެ ރައީސް ގޮތަބަޔާ ރާޖަޕަކްސައަށް ސަޕޯޓު ކުރާ މީހުންނާއި ރައީސްއާ ދެކޮޅު މީހުންގެ މެދުގައި ހަމަނުޖެހުން ހިނގުމުން، ވެރިރަށް ކޮލޮމްބޯގައި ވަކި މުއްދަތެއް ނެތް ގޮތަށް ކާފިއު ހިންގަން ނިންމައިފި އެވެ.
އޭއެފްޕީއިން ބުނީ އެޕްރީލް ނުވަ ވަނަ ދުވަހުން ފެށިގެން ރައީސް އޮފީސް ބޭރުގައި ޓެންޓު ޖަހައިގެން ސުލްހަވެރިކަމާ އެކު މުޒާހަރާ ކުރަމުންދާ ރައްޔިތުންނަށް، ދަގަނޑު ހޮޅިބުރި އާއި ލަޓިބުރި ފަދަ ތަކެތިން ހަމަލާ ދިނީ ރައީސްގެ ސަޕޯޓަރުން ކަމަށެވެ.
ހަމަނުޖެހުމުގެ ސަބަބުން 20 މީހުންނަށް އަނިޔާވި އެވެ. ހަމަނުޖެހުން ކޮންޓްރޯލް ކުރަން ފުލުހުން ވަނީ ބާރު ސްޕީޑުގައި ފެން ޖަހައި، ކަރުނަ ގޭސް ވެސް ބޭނުންކޮށްފަ އެވެ. ރައީސްގެ ސަޕޯޓަރުން މަސައްކަތް ކުރީ ފުލުހުންގެ ލައިންތައް ފޫއަޅުވާލާފައި ގޮސް، މުޒާހަރާގެ ބައިވެރިންގެ ޓެންޓުތައް ރޫޅާލުމަށެވެ.
ރައީސް އޮފީސް ބޭރުގައި ޓެންޓު ޖަހައިގެން "ގޮތަ ގޯ ގަމަ" ގެ ނަމުން ގާއިމްކޮށްފައިވާ މުޒާހަރާ ކުރާ ސައިޓަކީ ރައީސް އާއި ބޮޑު ވަޒީރު މަހިންދަ ރާޖަޕަކްސަގެ އިސްތިއުފާއަށް ޑިމާންޑް ކުރާ މީހުން ތިބޭ ތަނެވެ. އެ މީހުން ބުނަނީ އިސްތިއުފާ ނުދެނީސް ގެތަކަށް ނުދާނެ ކަމަށެވެ.
މީގެ މަހެއް ކުރިން އެ މީހުން އެތަނުގައި ޓެންޓު ޖެހި ނަމަވެސް، މިހާތަނަށް އެއްވެސް ހަމަނުޖެހުމެއް އެ ތަނުގައި ހިނގާފައެއް ނުވެ އެވެ. ރައީސްގެ ސަޕޯޓަރުން އެ ތަނަށް ގޮސް، މުޒާހަރާގެ ބައިވެރިންނަށް ހަމަލާ ދިން އިރު، މިދިޔަ ހުކުރު ދުވަހުން ފެށިގެން އޮތީ ކުއްލި ނުރައްކަލުގެ ހާލަތު އިއުލާނުކޮށްފަ އެވެ.
