ދައުލަތުގެ މާލިއްޔަތު ގަވައިދާ އެއް ގޮތަށް އެމްއެންޑީއެފްގެ މަޝްރޫއުތަކެއް މާލީ އަދި ފަންނީ ގާބިލުކަން ނުބަލައި ސިފައިންގެ ކޯޕަރޭޓިވް (ސިފްކާ)އާ ހަވާލުކުރި މައްސަލައެއް އޮޑިޓު އޮފީހުން ފާހަގަކޮށްފި އެވެ.
އެމްއެންޑީއެފްގެ 2020 ވަނަ އަހަރުގެ އޮޑިޓު ރިޕޯޓުގައި ބުނެފައިވަނީ "ސިންގަލް ސޯސް ޕްރޮކިއުމަންޓް" ގެ އުސޫލުން ހިދުމަތް ނުވަތަ ތަކެތި ހޯދާއިރު، ޕްރޮކިޔުމަންޓްގެ އަގު 35،000 ރުފިޔާއަށް ވުރެ ބޮޑުވާނަމަ، އެ މަސައްކަތެއް ހަވާލުކުރާ ފަރާތުގެ މާލީ އަދި ފަންނީ ގާބިލުކަން ޔަގީންކުރަންޖެހޭނެ ކަމަށް މާލިއްޔަތު ގަވައިދުގައި ބަޔާންކޮށްފައިވާ ކަމަށެވެ.
ނަމަވެސް، 2020 ވަނަ އަހަރުގެ ތެރޭގައި ނިންމަން އެމްއެންޑީއެފްއިން ސިފްކޯއާ ހަވާލުކުރި ބައެއް މަސައްކަތްތަކަށް އެޑްވާންސްގެ ގޮތުގައި ގިނަ އަދަދެއްގެ ފައިސާ ދީފައިވާއިރު، މި މަސައްކަތްތައް ނުނިމި ދިގުލައިގެން ގޮސްފައިވާ ކަން އޮޑިޓު އޮފީހުން ފާހަގަކުރި އެވެ.
މިގޮތުން، 2020ގައި ނިންމާ ގޮތަށް ސިފްކޯއާ ހަވާލުކުރި ޖުމްލަ 25 މިލިއަން ރުފިޔާގެ ތަފާތު ތިން މަޝްރޫއުއެއް އޮޑިޓު ރިޕޯޓުގައި ވަނީ ފާހަގަކޮށްފަ އެވެ.
އުސޫލާ ހިލާފަށް ސިފްކޯއާ ހަވާލުކުރި މަސައްކަތްތައް
- އެމްއެންޑީއެފްގެ ނުވަ ބުރީގެ އިމާރާތަށް ފަރްނީޗަރު ސަޕްލައި ކުރުން - 1.59 މިލިއަން
- ޅ. މާފިލާފުށި ކޮމްޕޮސިޓް ޓްރެއިނިން ސެންޓަރު (ފޭސް 1)ގެ މަސައްކަތް - 16.49 މިލިއަން
- އެމްއެންޑީއެފްގެ ހުޅުލެ ޕޯސްޓް ރީލޮކޭޓް ކުރުމުގެ މަސައްކަތް - 6.9 މިލިއަން
މީގެ ތެރެއިން އެމްއެންޑީއެފްގެ އިމާރާތަށް ފަރުނީޗަރު ސަޕްލައި ކުރުމުގެ މަސައްކަތުގެ އަގު އެކީގައި އެޑްވާންސްކޮށް ދީފައިވާކަން ރިޕޯޓުގައި ފާހަގަކޮށްފައިވެ އެވެ.
"މިގޮތަށް މަސައްކަތްތައް ލަސްވެފައިވަނީ މަސައްކަތްތައް ހަވާލު ކުރުމުގައި، ހަވާލު ކުރާ ކުންފުނީގެ އޮޕަރޭޝަނަލް ކެޕޭސިޓީ ރަނގަޅަށް ބަލާފައިނުވާތީ ކަމަށް ބެލެވެ އެވެ،" އޮޑިޓު އޮފީހުން ބުންޏެވެ.
މީގެ އިތުރުން، ދައުލަތުގެ ބަޖެޓުން ކުރާ ހޭދައަކީ މަސައްކަތްތައް ނިންމާ މިންވަރަކުން ހެދޭ "ޕްރޮގެރެސިވް ޕޭމަންޓް" ތަކަކަށް ނުހެދޭނަމަ، މަސައްކަތްތައް ނިންމުމަށް ކޮންޓްރެކްޓަރުން ދޭ އަހަމިއްޔަތުކަން ކުޑަވެ، މަސައްކަތްތައް ނުނިމި ދިގުލައިގެން ދިއުމަށް މަގުފަހިވާނެކަން ވެސް އެ ރިޕޯޓުގައި ވަނީ ފާހަގަކޮށްފަ އެވެ.
އެހެންކަމުން، ދައުލަތުގެ މާލިއްޔަތު ގަވައިދުގައި ބަޔާންކޮށްފައިވާ ގޮތަށް އެފަދަ މަސައްކަތް ހަވާލުކުރާ ފަރާތަކީ އެ މަސައްކަތް ކުރެވޭނެ މާލީ އަދި ފަންނީ ގާބިލުކަން ހުރި ފަރާތެއްތޯ ބެލުމަށް އޮޑިޓު އޮފީހުން ވަނީ ލަފާދީފަ އެވެ.
އަދި މަސައްކަތުގެ އެއްބަސްވުމުގެ މުއްދަތު އިތުރުކޮށްދޭންޖެހޭ ހާލަތެއް މެދުވެރިވެއްޖެނަމަ، މުއްދަތު ހަމަވުމުގެ ކުރިން ލިޔެކިޔުމުން އެކަން ކުރުމަށް ވެސް ވަނީ އަންގައިފަ އެވެ.
ލިބެންޖެހޭ ފައިސާ ހޯދަން މަސައްކަތް ނުކުރޭ
އެމްއެންޑީއެފްގެ 2020ގެ އޮޑިޓު ރިޕޯޓުގައި އިތުރަށް ބުނެފައިވަނީ ދައުލަތުގެ އޮފީސްތަކަށް ލިބެންޖެހޭ ފައިސާ ހޯދަން، ޖުމްލަ 14 ދުވަހުގެ މުއްދަތުގެ ތެރޭގައި ލިޔުމުން ހަނދާކޮށްދޭންޖެހޭނޭ ކަމަށް މާލިއްޔަތު ގަވައިދުގައި ބަޔާންކޮށްފައިވާ ކަމަށެވެ.
އަދި އިތުރުކުރެވުނު މުއްދަތުގައިވެސް ފައިސާ ނުދައްކައިފިނަމަ ފައިސާ ހޯދުމުގެ މައްސަލަ ޝަރީއަތަށް ހުށަހަޅައިގެން ކުރިއަށް ގެންދަވާނެ ކަމަށް އެ ގަވައިދުން ލާޒިމުކުރާ ކަމަށް އޮޑިޓު އޮފީހުން ބުންޏެވެ.
ނަމަވެސް، އެމްއެންޑީއެފުން މާލިއްޔަތު ގަވައިދާ އެއް ގޮތަށް އެ އިދާރާއަށް ލިބެންޖެހޭ ފައިސާ ހޯދަން އަމަލުކޮށްފައިނުވާ ކަމަށް އެ ރިޕޯޓުގައި ބުނެފައިވެ އެވެ.
މިގޮތުން، 2019ވަނަ އަހަރުގެ ނިޔަލަށް އެމްއެންޑީއެފަށް ލިބެންޖެހޭ ފައިސާގެ ގޮތުގައި 4.52 މިލިއަން ރުފިޔާ މާލީ ބަޔާނުގައި ބުނެފައިވީ ނަމަވެސް، އެ ފައިސާ ހޯދަން މާލިއްޔަތު ގަވައިދުގައި ބުނާ ފިޔަވަޅުތައް އަޅާފައިނުވާ ކަމަށް އޮޑިޓު އޮފީހުން ވަނީ ފާހަގަކޮށްފަ އެވެ.
އެ މައްސަލައަކީ އޭގެ ކުރީ އަހަރުގެ ރިޕޯޓުގައި ވެސް ފާހަގަކޮށްފައިވާ މައްސަލައަކަށްވާއިރު، މާލިއްޔަތު ގަވައިދާ އެއް ގޮތަށް އެ ފައިސާ އަނބުރާ ހޯދަން އަޅަންޖެހޭ ފިޔަވަޅުތައް އެޅުމަށް އޮޑިޓު އޮފީހުން ވަނީ އަންގައިފަ އެވެ.
