ލިވަޕޫލް (މެއި 7) - އިނގިރޭސި ޕްރިމިއާ ލީގުގައި މިރޭ ބްރައިޓަން އަތުން 4-0 އިން ލަދުވެތި ގޮތަކަށް ބަލިވެ މެންޗެސްޓާ ޔުނައިޓެޑަށް ގަދަ ހަތަރެއް ގެއްލުނުއިރު، ޓޮޓެންހަމް ހޮޓްސްޕާސްއާ 1-1 އިން އެއްވަރުވެ، ޕޮއިންޓަކުން ފުއްދާލަން ޖެހި ލީގު ހޯދުމުގެ ރޭހުގައި ލިވަޕޫލަށް އުނދަގޫ ހާލަތެއް ކުރިމަތިވެއްޖެ އެވެ.
ލިވަޕޫލް ހޯދި ޕޮއިންޓާ އެކު ވަނީ ލީގުގެ އެއް ވަނަ އަށް ޖެހިލައިފަ އެވެ. އެއް ވަނައިގައި އޮތް ލިވަޕޫލަށް 35 މެޗުން 83 ޕޮއިންޓް ލިބިފައިވާއިރު، ދެ ވަނައިގައި އޮތް މެންޗެސްޓާ ސިޓީ އަށް ވަނީ 34 މެޗުން 83 ޕޮއިންޓް ލިބިފަ އެވެ. އެއް ގޯލުގެ ތަފާތުން ލިވަޕޫލް ކުރީގައި އޮތްއިރު، މާދަމާރޭ ނިއުކާސަލް ޔުނައިޓެޑް އަތުން މޮޅުވެގެން ސިޓީ އަށް އެއް ވަނައިގައި ތިން ޕޮއިންޓުގެ ލީޑެއްނެގޭނެ އެވެ.
ލީގުގެ ތިން ވަނައިގައި އޮތް ޗެލްސީ އަށް ވަނީ 35 މެޗުން 67 ޕޮއިންޓް ލިބިފަ އެެވެ. ހަތަރެއްގައި އޮތް އާސެނަލަށް 34 މެޗުން 63 ޕޮއިންޓް ވަނީ ލިބިފަ އެވެ. އަދި ފަސް ވަނައިގައި އޮތް ޓޮޓެންހަމަށް 35 މެޗުން 62 ޕޮއިންޓް ލިބިފައިވާއިރު، ޔުނައިޓެޑް ހަ ވަަނައިގައި އޮތީ 37 މެޗުން 58 ޕޮއިންޓާ އެކު އެވެ. ޔުނައިޓެޑަށް ބާކީ އެއް މެޗު އޮތްއިރު، އެ މެޗުން މޮޅުވި ނަމަވެސް އެ ޓީމަށް ގަދަ ހަތަރަކަށް ވަދެވޭނެ އެއްވެސް ފުރުސަތެއް ނެތެވެ. މިއީ ޔުނައިޓެޑުން ފާއިތުވި 30 އަހަރު އެންމެ މަދުން ޕޮއިންޓް ހޯދާ ސީޒަނެވެ.
ބްރައިޓަންގެ ސައިސޭޑޯ (ކ) އާއި ބިސޫމާ ގޯލު ޖެހުމަށް ފަހު އުފާފާޅުކުރަނީ.--- ފޮޓޯ: އޭއެފްޕީ
ބްރައިޓަން ދަނޑުގައި މިރޭ އެ ޓީމަށް ލީޑުނަގައިިދިނީ މޮއިސެސް ސައިސޭޑޯ އޭރިއާބޭރުން ތިރިތިރިން ޖެހި ގޯލަކުންނެވެ. ފުރަތަމަ ހާފުގައި ދެ ވަނަ ގޯލެއް ޖަހަން ބްރައިޓަން އަށް ލިބުނު އެއްވެސް ފުރުސަތެއްގެ ބޭނުމެއް ނުހިފުނެވެ. އެކަމަކު، ދެ ވަނަ ހާފުގައި އެ ޓީމުން ވަނީ ތިން ގޯލު ޖަހައިފަ އެވެ. ދެ ވަނަ ހާފްގެ ކުޅުން ފެށިގެން ތިން ވަނަ މިނިޓްގައި ބްރައިޓަން އަށް ލީޑުފުޅާކޮށްދިނީ މާކް ކުކުރޭލާ އެެވެ.
މެޗުގެ 57 ވަަނަ މިނިޓްގައި ޔުނައިޓެޑްގެ އޭރިއާތެރެއިން ޕަސްކާލް ގްރޮސް ވަނީ ބްރައިޓަންގެ ތިން ވަނަ ގޯލު ޖަހައިފަ އެވެ. އޭގެ ތިން މިނިޓް ފަހުން ޑެނީ ވެލްބެކް ކުރި އެޓޭކެއްގައި ބްރައިޓަންގެ ހަތަރު ވަނަ ގޯލު ޖެހީ ލެއަންޑްރޯ ޓްރޮސާޑް އެވެ. މި ގޯލު ޖަހަން ޓްރޮސާޑް ބޯޅަ ގޯލަށް ވައްދާލީ އަތުން ކަމަށް އެޕީލްކުރުމުން ގޯލު ބަލައިގަންނަން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފަ އެވެ.
ޔުނައިޓެޑުން ގޯލެއް ޖަހަން ރަނގަޅު ތިން ހަމަލާ ފޮނުވާލި އެވެ. ބަދަލަކަށް ކުޅެން އެރި އެޑިންސަން ކަވާނީ އާއި ހެރީ މެގުއާ ބޮލުން ފޮނުވާލި ބޯޅަތަކާއި އޭރިއާބޭރުން ބްރޫނޯ ފެނާންޑޭސް ޖެހި ޝޮޓް ބްރައިޓަންގެ ސްޕެއިން ކީޕަރު ރޮބާޓް ސަންޗޭޒް ވަނީ މަތަކޮށްފަ އެވެ.
ލަނޑު ޖެހުމަށް ފަހު ލިވަޕޫލް ކުޅުންތެރިން އުފާފާޅުކުރަނީ.-- ފޮޓޯ: އޭއެފްޕީ
ލިވަޕޫލް ދަނޑުގައި މިރޭ ޓޮޓެންހަމް އިން ވަނީ ރަނގަޅު ކުޅުމެއް ދައްކައިފަ އެވެ. ފުރަތަމަ ހާފުގައި ލިވަޕޫލްގެ ވާޖިލް ވެން ޑައިކް ބޮލުން ޖެހި ބޯޅައެއް ގޯލުގެ ހުރަސްދަނޑީގައި ޖެހިފައި ބޭރަށް ދިޔައިރު، ޓޮޓެންހަމްގެ ޕިއޭ އެމީލް ހޮއިބިއާ އޭރިއާބޭރުން ޖެހި ބޯޅަ ބޭރުވީ ދަނޑީގައި ޖެހިފަ އެވެ. ޓޮޓެންހަމުން މެޗުގެ 56 ވަނަ މިނިޓްގައި ލީޑުނެގީ ސޮން ހެއުން މިން ޖެހި ގޯލުންނެވެ. މިއީ ލީގުގައި ސޮން ޖެހި 20 ވަނަ ގޯލެވެ.
ނަތީޖާ ހަމަހަމަކުރަން ލިވަޕޫލުން ކެނޑިނޭޅި ކުރަމުންދިޔަ މަސައްކަތް ކާމިޔާބުވީ ނަސީބުގެ އެހީއާ އެކުގަ އެވެ. މެޗުގެ 74 ވަނަ މިނިޓްގައި ލިވަޕޫލްގެ ކޮލަމްބިއާ ފޯވާޑް ލުއިސް ޑިއާޒް ޖެހި ބޯޅަ ގޯލަށް ވަނީ ޓޮޓެންހަމްގެ ރޮޑްރީގޯ ބެންޓަކޫރު ފައިގައި ޖެހިފަ އެވެ.
މެޗުގެ ފަހު ކޮޅުގައި ޓޮޓެންހަމަށް އަލުން ލީޑުނަގަން ލިބުނު ފުރުސަތުގެ ބޭނުން ނުހިފުނުއިރު، އިތުރު ވަގުތުގެ ފަހު ކޮޅުގައި ޑިއާޒް ގޯލަށް ޖަހަން އުޅުނު ބޯޅައެއް ޓޮޓެންހަމްގެ ފުލްބެކް، އެމަަސަން ރޯޔާލް ވަނީ ރަނގަޅަށް ޑިފެންސްކޮށްފަ އެވެ.
