ކޮލޮމްބޯ، ސްރީލަންކާ (މޭ 7) - ހުކުރު ދުވަހުގެ ރޭ ސްރީ ލަންކާގައި އިއުލާނު ކުރި ކުއްލި ނުރައްކަލުގެ ހާލަތު ނިމުމަކަށް ގެންނަން އެމެރިކާ އާއި ޔޫރަޕްގެ ޑިޕްލޮމެޓުން ޕްރެޝަރު ކުރަމުން އެބަ ދެ އެވެ.
ރައީސް ގޮތަބަޔާ ރާޖަޕަކްސަ ކުއްލި ނުރައްކަލުގެ ހާލަތު އިއުލާން ކުރެއްވީ އިހްތިޖާޖާއި މުޒާހަރާތަކާ ގުޅިގެން ގައުމު ހުއްޓުމަކަށް އައިސްފައި ވާތީ އެވެ. އާއްމުން ޑިމާންޑް ކުރަނީ ސަރުކާރުގެ އިސްތިއުފާ އަށެވެ.
ބޭރު ފައިސާ ހުސްވެ، ޒަޒޫރީ ތަކެތި ލިބުން ދަތިވެ، ކަރަންޓު ކަނޑަމުން ދާތީ ރައްޔިތުން ނުކުމު މުޒާހަރާ ކުރާތާ މަހަކަށް ވުރެ ގިނަ ދުވަސް ވެއްޖެ އެވެ.
އެމެރިކާ ސަފީރު ޖޫލީ ޗުންގް ވިދާޅުވީ ދެ ވަނަ ފަހަރަށް ކުއްލި ނުރައްކަލުގެ ހާލަތު އިއުލާނު ކުރުމުން "ކަންބޮޑުވާ" ކަމަށާއި ލަންކާއަށް ބޭނުން ވަނީ ދިގު ރާސްތާގެ ހައްލުތަކެއް ކަމަށެވެ.
"ކުއްލި ނުރައްކަލުގެ ހާލަތު އިއުލާނު ކުރުމުން ދިގު ރާސްތާގެ ހައްލެއް ނުލިބޭނެ،" އޭނާ ކުރެއްވި ޓްވީޓުގައި ވިދާޅުވި އެވެ.
ޔޫރަޕިއަން ޔޫނިއަން (އީޔޫ) އިން ބުނީ ކުއްލި ނުރައްކަލުގެ ހާލަތު އިއުލާން ކުރުމުން ހާލަތު އިތުރަށް ގޯސްވުމުގެ ނުރައްކާ އޮންނާނެ ކަމަށެވެ. އޭގެ އިތުރުން ރައްޔިތުންގެ މުޒާހަރާތައް ކުރިއަށް ދަނީ އާއްމުކޮށް ސުލަހްވެރިކޮށް ކަމަށް ފާހަގަކުރި އެވެ.
ރައީސްގެ މީޑިއާ ޑިވިޝަނުން ހުކުރު ދުވަހުގެ ރޭ ބުނީ ދަންވަރު 12:00 އިން ފެށިގެން ކުއްލި ނުރައްކަލުގެ ހާލަތު އިއުލާން ކުރަން ނިންމެވީ އާއްމުންގެ ރައްކާތެރިކަމަށްޓަކައި ގާނޫނު ނެގެހެއްޓުމުގެ ބޭނުމުގައި އަދި ޒަރޫރީ މުދަލާއި ހިދުމަތް މެދުކެނޑުމެއް ނެތި ފޯރުކޮށްދިނުމުގެ ބޭނުމުގައި ކަމަށެވެ.
ކުއްލި ނުރައްކަލުގެ ހާލަތުގައި ސިފައިންނަށް މީހުން ހައްޔަރު ކުރުން ފަދަ ބޮޑެތި ބާރުތަކެއް ލިބިދޭ އިރު، ޕާލިމެންޓުން ފާސްނުކޮށް ގާނޫނު ހެދުމުގެ ބާރު ރައީސަށް ލިބިދެ އެވެ.
އެޕްރީލް މަހު ވެސް ލަންކާގައި ކުއްލި ނުރައްކަލުގެ ހާލަތު އިއުލާނު ކުރި އެވެ. ނަމަވެސް އެ ފަހަރު ޕްރެޝަރު ބޮޑުވެ، މާ ގިނަ ދުވަސްތަކެއް ނުވެ އެ ހާލަތު އުވާލި އެވެ.
