އިގްތިސާދީ ކާރިސާއާ ގުޅިގެން ރައީސް އާއި ބޮޑު ވަޒީރުގެ އިސްތިއުފާއަށް ޑިމާންޑުކޮށް އާއްމުން މުޒާހަރާ ކުރަމުންދާ ސްރީލަންކާގައި އަނެއްކާވެސް ކުއްލި ނުރައްކަލުގެ ހާލަތު އިއުލާނުކޮށްފި އެވެ.
ރައީސްގެ މީޑިއާ ޑިވިޝަނުން ހުކުރު ދުވަހުގެ ރޭ ބުނީ ދަންވަރު 12:00 އިން ފެށިގެން ކުއްލި ނުރައްކަލުގެ ހާލަތު އިއުލާން ކުރަން ރައީސް ގޮތަބަޔާ ރާޖަޕަކްސަ ނިންމަވާފައިވާ ކަމަށެވެ.
އެގޮތަށް ނިންމެވީ އާއްމުންގެ ރައްކާތެރިކަމަށްޓަކައި ގާނޫނު ނެގެހެއްޓުމުގެ ބޭނުމުގައި އަދި ޒަރޫރީ މުދަލާއި ހިދުމަތް މެދުކެނޑުމެއް ނެތި ފޯރުކޮށްދިނުމުގެ ބޭނުމުގައި ކަމަށް ބުންޏެވެ.
ކުއްލި ނުރައްކަލުގެ ހާލަތު އިއުލާންކޮށްފައިވާ އިރު، ރައީސް އާއި ބޮޑު ވަޒީރު މަހިންދަ ރާޖަޕަކްސަގެ އިސްތިއުފާއަށް ޑިމާންޑުކޮށް ކުރަމުންދާ މުޒާހަރާތައް ދަނީ ހޫނުވަމުންނެވެ.
ބޮޑު ވަޒީރުގެ ގެކޮޅާއި ޕާލިމެންޓަށް ވަންނަން މުޒާހަރާގެ ބައިވެރިން ކޮންމެ ދުވަހަކު ވެސް މަސައްކަތް ކުރެ އެވެ. އެ މީހުން ހުއްޓުވަނީ ކަރުނަ ގޭސް ޖަހައި، ބާރުގެ ބޭނުންކޮށްގެންނެވެ.
އެޕްރީލް މަހު ފެށި މުޒާހަރާތަކުގައި ފުލުހުން ބަޑި ޖެހުމުން މިހާތަނަށް އެކަކު މަރުވެފައިވާ އިރު، ގިނަ ބަޔަކަށް އަނިޔާވެފައިވެ އެވެ. އޭގެ އިތުރުން ހައްޔަރު ކުރާ އަދަދު ވެސް ދަނީ އިތުރުވަމުންނެވެ.
އެޕްރީލް މަހު ވެސް ލަންކާގައި ކުއްލި ނުރައްކަލުގެ ހާލަތު އިއުލާނު ކުރި އެވެ. ނަމަވެސް އެ ފަހަރު ޕްރެޝަރު ބޮޑުވެ، މާ ގިނަ ދުވަސްތަކެއް ނުވެ އެ ހާލަތު އުވާލި އެވެ.
މި ފަހަރު ކުއްލި ނުރައްކަލުގެ ހާލަތު އިއުލާންކޮށްފައިވާ އިރު، ބޮޑު ވަޒީރު މަހިންދަ ރާޖަޕަކްސަގެ އިސްތިއުފާއަށް ރައީސް ވަނީ ހުކުރު ދުވަހުގެ ރޭ އެދިވަޑައިގެންފަ އެވެ.
