ސްރީ ލަންކާގައި އުފެދިފައިވާ ސިޔާސީ ހަލަބޮލިކަން ނިމުމަކަށް ގެނައުމަށް ބޮޑު ވަޒީރުގެ މަގާމުން މަހިންދަ ރާޖަޕަކްސަ އިސްތިއުފާ ދެއްވުމަށް ރައީސް ގޮތަބަޔާ ރާޖަޕަކްސަ އެދިވަޑައިގެންފި އެވެ.
ލަންކާގެ ނޫސްތަކުން ބުނީ ރައީސް އެގޮތަށް އެދިވަޑައިގެންނެވީ ބޮޑު ވަޒީރާއި ކެބިނެޓް މިނިސްޓަރުންނާ އެކު ހުކުރު ދުވަހުގެ ރޭ ބޭއްވި ހާއްސަ ބައްދަލުވުމެއްގައި ކަމަށެވެ.
ޑެއިލީ މިރާ ނޫހުން ބުނީ އާ ސަރުކާރަކަށް އިގްތިސާދީ ކާރިސާ ހައްލުކޮށް، ވަގުތުން ވަގުތަށް ހައްލެއް ގެނެވޭ ނަމަ، އެ ސަރުކާރަށް އެއްބާރުލުން ދޭނެ ކަމަށް މަހިންދަ ރާޖަޕަކްސަ ބައްދަލުވުމުގައި ވިދާޅުވި ކަމަށެވެ.
ނަމަވެސް ބޮޑު ވަޒީރު ކަމުން އިސްތިއުފާ ދެއްވުމާ މެދު ރަސްމީކޮށް އެއްވެސް އެއްޗެއް ވިދާޅުވެފައެއް ނުވެ އެވެ. މީގެ ކުރިން މަހިންދަ ރާޖަޕަކްސަ ވިދާޅުވީ އިސްތިއުފާ ނުދެއްވާނެ ކަމަށެވެ.
ބޭރު ފައިސާ ހުސްވެ، އިގްތިސާދީ ކާރިސާއެއް އުފެދުމުން ލަންކާގެ ރައްޔިތުން މަގުތަކަށް ނުކުމެ ކުރަމުންދާ މުޒާހަރާގައި ޑިމާންޑް ކުރަނީ ބޮޑު ވަޒީރާއި ރައީސްގެ އިސްތިއުފާ އަށެވެ.
ލަންކާގައި ސިޔާސީ ގޮތުން ނުފޫޒު ގަފަ ރާޖަޕަކްސަ އާއިލާގެ ދެ ބޭފުޅުން ސަރުކާރުގެ އެންމެ މަތީގައި ތިއްބެވި އިރު، ދެ ބޭފުޅުން ވެސް ވިދާޅުވަނީ އިސްތިއުފާ ނުދެއްވާނެ ކަމަށެވެ.
