ކޮލޮމްބޯ، ސްރީލަންކާ (މޭ 5) - އިގްތިސާދީ ކާރިސާއާ ގުޅިގެން ރައީސް ގޮތަބަޔާ ރާޖަޕަކްސަގެ އިސްތިއުފާއަށް ޑިމާންޑް ކުރަން އެއްވި ބައެއް ދަރިވަރުން ޕާލިމެންޓުގެ ތެރެއަށް ވަންނަން އުޅުމުން ފުލުހުން ކަރުނަ ގޭސް ޖަހައިފި އެވެ.
ޕާލިމެންޓު ކައިރިއަށް އެއްވީ އިންޓާ ޔުނިވާސިޓީ ސްޓުޑަންޓްސް ފެޑެރޭޝަންގެ ދަރިވަރުންނެވެ. ގިނަ ޔުނިވާސިޓީތަކުގެ ދަރިވަރުން ހިމެނޭ އެ ގްރޫޕުން، މަގުމަތީގައި ހުރި ދަގަނޑު ބެރިކޭޑްތައް ދުރަށް ޖެއްސުމަށް ފަހު ޕާލިމެންޓާ ދިމާލަށް ދާން މަސައްކަތް ކުރި އެވެ.
ފުލުހުން ކަރުނަ ގޭސް ޖެހީ އެ މީހުން ހުއްޓުވުމަށެވެ. މުޒާހަރާގެ ބައިވެރިން ދުރަށް ޖެހެން ފެށުމުން ވެސް، މެދުކެނޑުމެއް ނެތި ފުލުހުން ކަރުނަ ގޭސް ޖަހަމުން ދިޔަ ކަމަށް މަންޒަރު ދުށް މީހުން ބުނެ އެވެ. ބައެއް ކަރުނަ ގޭސް ފުޅިތައް ވެއްޓުނީ ދިޔަތަ އުޔަނަ ޕާކްގެ ފިހާރަތައް ކައިރިއަށެވެ.
ބޭރު ފައިސާ ހުސްވެ، އިގްތިސާދީ ކާރިސާއެއް ކުރިމަތިވުމުން ލަންކާގެ 22 މިލިއަން މީހުންނަށް ވަނީ ކާބޯތަކެއްޗާއި، ތެލާއި، ބޭހުގެ ދަތިކަން ކުރިމަތިވެފަ އެވެ. އެހެންވެ، އެތައް ހާސް ބަޔަކު މުޒާހަރާ ކުރަނީ ރައީސް އާދި ބޮޑު ވަޒީރު މަހިންދަ ރާޖަޕަކްސަގެ އިސްތިއުފާއަށް ޕްރެޝަރު ކުރުމަށެވެ.
ނަމަވެސް ރައީސް އާއި ބޮޑު ވަޒީރު ވެސް އިސްތިއުފާ ނުދެއްވާނެ ކަމަށް ތަކުރާރުކޮށް ވަނީ ވިދާޅުވެފަ އެވެ.
ލަންކާގެ ޓްރޭޑް ޔޫނިއަންތަކުން ވަނީ ހުކުރު ދުވަހު މަސައްކަތް ހުއްޓާލައިގެން އިހްތިޖާޖް ކުރަން ނިންމާފަ އެވެ. އިހްތިޖާޖަށް ތާއީދު ކުރާކަން ހާމަ ކުރުމުގެ ގޮތުން ހުކުރު ދުވަހުގެ ހެނދުނު އެއް ގަޑިއިރަށް ހުރިހާ ފައްޅިތަކުން ރަނގަބީލް ޖެހުމަށް އެ މީހުން އެދިފައިވެ އެވެ.
ބުދަ ދުވަހު ފިނޭންސް މިނިސްޓަރު އަލީ ސަބްރީ ވިދާޅުވީ ކުރިއަށް އޮތް ދެ އަހަރު ވެސް ގިނަ އިގްތިސާދީ ގޮންޖެހުންތައް ކުރިމަތިވާނެ ކަމަށެވެ. އޭނާ ވިދާޅުވީ މި ވަގުތު ބޭރު ފައިސާގެ ރިޒާވްގައި ހުރީ 50 މިލިއަން ޑޮލަރު ކަމަށެވެ.
ރަސްމީ ތަފާސްހިސާބުން ދައްކާ ގޮތުގައި ބޭރު ފައިސާގެ ރިޒާވްގައި 1.7 ބިލިއަން ޑޮލަރު އެބަ ހުއްޓެވެ. ނަމަވެސް އޭގެ ތެރެއިން ބޮޑު ބަޔަކީ ޗައިނާގެ ކަރަންސީ ސްވޮޕަކުން ލިބުނު ބޭރު ފައިސާ އެވެ. އެ ފައިސާ ބޭނުން ކުރެވޭނީ ހަމައެކަނި ޗައިނާގެ މުދާ އިމްޕޯޓް ކުރުމަށެވެ.
ސަބްރީ ވިދާޅުވީ އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީއަށް އެދުން ލަސް ކުރުމަކީ ސަރުކާރަށް ހެދުނު ގޯހެއް ކަމަށެވެ. ދަރަނި ދައްކާނެ ފައިސާ ނެތުމުން، 51 ބިލިއަން ޑޮލަރުގެ ބޭރު ދަރަނި ޑިފޯލްޓް ކުރަން ނިންމިކަން ލަންކާއިން އިއުލާން ކުރީ މިދިޔަ އެޕްރީލް މަހު އެވެ.
