ޖެނީވާ، ސްވިޓްޒަލޭންޑް (މޭ 4) - ކޮވިޑް ފަތުރާ ވައިރަހުގެ އޮމިކްރޯން ވޭރިއެންޓުގެ މުޅިން އާ ދެ ސަބްވޭރިއެންޓަކާ ހެދި ދެކުނު އެފްރިކާގައި ކޭސްތައް އިތުރު ވާން ފަށާފައިވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ހަލުވިކަމާ އެކު ފެތުރޭ އޮމިކްރޯން ވެސް އެންމެ ފުރަތަމަ ފެނުނީ މިދިޔަ ނޮވެމްބަރު މަހު ދެކުނު އެފްރިކާ އިންނެވެ. އެ ވޭރިއެންޓު ހަލުވިކަމާ އެކު ފެތުރި މިހާރު ހުރިހާ ގައުމެއްގައި ވެސް "ޑޮމިނެންޓް" ވޭރިއެންޓަކަށް ވަނީ ވެފަ އެވެ.
އޮމިކްރޯންގެ ގިނަ ސަބްވޭރިއެންޓްތަކެއް ދެނެގަނެފައިވެ އެވެ. އޭގެ ތެރެއިން މިހާތަނަށް އެންމެ ބޮޑަށް ފެތުރިފައި ވަނީ ބީއޭ.2 އެވެ.
ނަމަވެސް އެންމެ ފުރަތަމަ އޮމިކްރޯން ވޭރިއެންޓް ދެނެގަތް ސައިންޓިސްޓުން މިހާރު ބުނަނީ މުޅިން އާ ދެ ސަބްވޭރިއެންޓް ކަމުގައިވާ ބީއޭ.4 އަދި ބީއޭ.5 ގެ ސަބަބުން އެ ގައުމުގައި ކުއްލިއަކަށް ކޭސްތައް ވަރަށް ބޮޑަށް މަތިވަމުންދާ ކަމަށެވެ.
އެ ދެ ސަބްވޭރިއެންޓުން ބަލިވާ މިންވަރު ބޮޑުވާނެތޯ އަދި ބުނަން ނޭނގޭ ކަމަށް ޑަބްލިއުއެޗްއޯއިން ބުނެ އެވެ. ނަމަވެސް ވެކްސިން ޖެހުމުން ބަލީގައި ސީރިއަސްވުން ކުޑަވެ، މަރުތައް މަދު ކުރެވޭ ކަމަށް ޑަބްލިއުއެޗްއޯއިން ބުންޏެވެ.
ދެކުނު އެފްރިކާގައި މިހާތަނަށް 3.8 މިލިއަން ކޮވިށް ކޭސް ރިޕޯޓުކޮށްފައިވާ އިރު، 100،000 އަށް ވުރެ ގިނަ މީހުން މަރުވެފައިވެ އެވެ. އެކަމަކު އެ ގައުމުގައި ވެކްސިންގެ ދެ ޑޯޒް ފުރިހަމަކޮށްފައި ވަނީ އާބާދީގެ 45 ޕަސެންޓަށް ވުރެ މަދު ބަޔެކެވެ.
ކޭސްތައް މަދުވާން ފެށުމުން، މިދިޔަ އެޕްރީލް މަހު ހުރިހާ ފިޔަވަޅުތަކެއް އުވާލި ނަމަވެސް، މިހާރު ވަނީ ވަރަށް ބޮޑަށް މަތި ވާން ފަށާފައި ކަމަށް ޑަބްލިއުއެޗްއޯގެ ތަފާސްހިސާބުން ދައްކަ އެވެ.
