ބައިނަލް އަގްވާމީ މަސައްކަތްތެރިންގެ ދުވަސް، "މޭ ޑޭ" އާ ދިމާކޮށް މަސައްކަތްތެރިންގެ ކަންބޮޑުވުންތައް ސަރުކާރުގެ ސަމާލު ކަމަށް ގެނައުމަށް ހިނގާލުމެއް ބާއްވައިފި އެވެ.
ރާއްޖޭގެ މަސައްކަތްތެރިންގެ ޔޫނިއަންތައް ތަމްސީލް ކުރާ މައި ޖަމިއްޔާ ކަމަށްވާ މޯލްޑިވްސް ޓްރޭޑް ޔޫނިއަން ކޮންގުރެސް (އެމްޓީޔޫސީ)އިން ބޭއްވި އެ ހިނގާލުން މިއަދު ހަވީރު ފެށީ ރަސްފަންނު ސަރަހައްދުންނެވެ.
ރަސްފަންނުން ފެށި ހިނގާލުން ބޮޑުތަކުރުފާނު މަގުން ގޮސް، އަމީނީ މަގު ހުރަސްކޮށް، ހިނގާލުން ނިންމާލީ ކާނިވާ ސަރަހައްދު ކައިރިންނެވެ.
މަަސައްކަތްތެރިންގެ ކަންބޮޑުވުތަކުގެ އަޑު އުފުލަން ބޭއްވި މޭޑޭ ރެލީ - ފޮޓޯ: އަބްދުﷲ އިޔާން | އަދަދު
ރެލީގެ ބައިވެރިން އެކި ޝުއޫރުތައް ލިޔެފައިވާ ބޯޑުތައް ހިފައިގެން ތިއްބެވެ. "މިނިމަމް ވޭޖް ރިވިއު ކުރޭ"، "މަސައްކަތްތެރިންނަށް ވަޒީފާގެ ބިރު ދެއްކުން ހުއްޓާލާ"، "ޓީޗަރުންގެ އޯޓީ ލިމިޓު ނުކުރޭ"، "ސިއްހީ ދާއިރާގެ މުސާރަތައް ވެސް ބޮޑުކުރޭ"، ފަދަ ޝުއޫރުތައް އޭގެ ތެރޭގައި ހިމެނެ އެވެ.
މަަސައްކަތްތެރިންގެ ކަންބޮޑުވުތަކުގެ އަޑު އުފުލަން ބޭއްވި މޭޑޭ ރެލީ - ފޮޓޯ: އަބްދުﷲ އިޔާން | އަދަދު
ބައެއް ގާނޫނުތަކަށް އިސްލާހު ގެންނަން ވެސް ރެލީގެ ބައިވެރިން ހިފައިގެން ތިބި ބެނާތަކާއި ބޯޑުތަކުގައި ލިޔެފައިވެ އެވެ.
މަަސައްކަތްތެރިންގެ ކަންބޮޑުވުތަކުގެ އަޑު އުފުލަން ބޭއްވި މޭޑޭ ރެލީ - ފޮޓޯ: އަބްދުﷲ އިޔާން | އަދަދު
މި ރެލީ އެންމެ ފުރަތަމަ ބާއްވަން ރާވާފައި އޮތީ މަޖީދީ މަގު ހުރަސްކޮށްދާ ގޮތަށެވެ. ނަމަވެސް އެ ގޮތަށް ރެލީ ބާއްވަން ފުރުސަތު ނުދެވޭނެ ކަމަށް ފުލުހުން ބުންޏެވެ.
ފުލުހުން ބުނި ގޮތުގައި މަޖީދީ މަގުގައި ރެލީ ބާއްވަން ހުއްދަ ނުދިނީ ރޯދަ މަހުގެ ހަވީރު ވަގުތު އެ މަގުގެ ޓްރެފިކް ބޮޑުވެ ބާރު ބޮޑުވާތީ އެވެ.
ފަހުން އެމްޓީޔޫސީއާ މަޝްވަރާ ކުރުމަށް ފަހު، އަމީނީ މަގު ހުރަސްކޮށް ގެންދާ ގޮތަށް ރެލީ ބާއްވަން ހުއްދަ ދިނީ އެވެ.
