ކޫއްޑޫ ފިޝަރީޒް ކޮމްޕްލެކްސްއަށް މަސް ކިރުމުގައި ކަނޑައަޅާފައި އޮތް ލިމިޓް ދޫކޮށްލައި ދޯނިފަހަރުން ބާނާ ހުރިހާ މަހެއް އިއްޔެއިން ފެށިގެން ކިރަން ނިންމައިފި އެވެ.
މިފްކޯއިން ބުނީ އެ ކުންފުނިން އަބަދުވެސް މަސައްކަތްކުރަނީ މަސްވެރިންނަށް ދެވޭ ހިދުމަތުގެ ފެންވަރު ރަނގަޅުކުރުމަށާއި ހިދުމަތް އަވަސް ކުރުމަށާއި މަސްވެރިންގެ ކަންބޮޑުވުންތައް ބަލައިގަނެ، ދެވޭ ހިދުމަތަކީ މަސްވެރިންނަށް ފަސޭހަ ހިދުމަތަކަށް ހެދުމަށް ކަމަށެވެ.
"މި ފުރުސަތުގައި މަސްވެރިންގެ ފަރާތުން އަބަދުވެސް ލިބޭ އެހީތެރިކަމާއި އެއްބާރުލެއްވުމަށް ޝުކުރު ދަންނަވަން،" މިފްކޯއިން ނެރުނު ބަޔާނުގައި ބުނެފައިވެ އެވެ.
ދެކުނުގެ އަތޮޅުތަކުގެ މަސްވެރިކަން ތިޔާގިވެ، މިފްކޯގެ ސެންޓަރުތަކާއި ބޯޓުފަހަރުގެ ފްރީޒިން ކެޕޭސިޓީއަށް ވުރެ ކިރަންޖެހޭ މަހުގެ މިންވަރު އިތުރުވެގެން ދިޔުމުން، ދޯންޏަކުން ފަސް ޓަނުގެ މަސް ކިރަން ނިންމީ އޭޕްރީލް 6 ގަ އެވެ.
މަސް ކިރާ މިންވަރު އެގޮތަށް ލިމިޓްކުރުމުން ބައެއް މަސްވެރިން ކޫއްޑޫ ބަނދަރުގައި މުޒާހަރާކޮށް، އެ ބަނދަރުގެ އޮޕަރޭޝަންތައް ހުއްޓުވައިލި އެވެ. އެކަމާ ގުޅިގެން އޭރު ކިޔޫގައި ތިބި ދޯނިފަހަރުން ބާނާފައި ހުރި ހުރިހާ މަހެއް ކިރަން ނިންމުމަށް ފަހު، މަސް ކިރާ މިންވަރު ލިމިޓްކުރި އެވެ.
