މީން ދުވަހަކު އީދަށް ތައްޔާރު ނުވާ ވަރަށް ރިޔާސީ ގަނޑުވަރު ވެސް އީދަށް ދިއްލައި އެއޮތްގެން ޖަރީ ވަނީ އެވެ. މާދަމާ ބައްދަލުކުރާ މި އަހަރުގެ ފުރަތަމަ އީދަކީ ހާއްސަ އީދެކެވެ. ޕެންޑެމިކެއްގެ ގައިދުގައި ދެ އަހަރު ހޭދަކުރުމަށްފަހު އަންނަ ފުރަތަމަ މިނިވަން އީދެވެ. މި އީދުގެ ޖޯޝު އޮތްލެއް ކުޑަ އެއް ނޫނެވެ. ފޯރި ވެސް ކުޑަ އެއް ނުވާނެ އެވެ. އީދުގެ އުފާވެރިކަން އިހުސާސްކުރުމާއި މުނާސަބަތުގެ ހިތްހަމަޖެހުން ހާސިލުކުރުމަށް ލާންވީ ކުޑަ ހިތްވަރެކެވެ.
ހަނދާންތައް ތާޒާކޮށްލައި އީދުގެ އުފާ ހިތަށް ގެނެސްލާ!
ހަނދާންތައް ތާޒާކޮށްލައިފި ނަމަ އީދަކީ 'ފޫހި' މުނާސަބަތެއް ނޫނެވެ. އީދު އައުމުގެ މާކުރިން އީދަށްޓަކައި އުފާކުރުމާއި، އިންތިޒާރުކުރުމާއި، ރީތި ގޮތްގޮތަށް ފަހާނެ ހެދުން ޕްލޭން ކުރުމާއި، ގޭގައި ހާއްސަކޮށް ކައްކާނެ އެއްޗިއްސާއި އާއިލާގެ ތެރޭގައި މަޖާކޮށް ކުރާނެ ކަންކަން ޕްލޭން ކުރުމަކީ މީގެ އަހަރުތަކެއް ކުރިން އޮތް ސަގާފަތެވެ.
އޭރު އީދު އަންނަނީ މީހުންގެ ހިތްތަކަށެވެ. އީދުގެ ފޯރި މިހާރު ނެތީ ހިތްތަކުން އެ ޖޯޝު ފިލައިފައި އޮތުމުން ކަމަށް ވެދާނެ އެވެ.
އެހެންވީމަ، އީދުގެ ޖޯޝު އަލުން ގެންނަންވީ ހިތަށެވެ. ރަށުގައި ޝޯއެއް ނެތަތީ ނުވަތަ ވަކި ކަހަލަ ކާނިވަލެއް ނުބާއްވާތީ އެ ޖޯޝު ހިތުން ފޮހެނުލާންވީ އެވެ. މިގޮތަށް ވިސްނުން ބަދަލުކޮށްލުމުން އީދަށް ތައްޔާރު ވުމުގެ ފުރަތަމަ މަރުހަލާ ފުރިހަމަވީ އެވެ.
އީދުގައި ކުރާނެ ކަންތައްތައް ޕްލޭން ކޮށްލާ!
ކުޑަ އީދަށް ލިބެނީ ކުރު ބަންދެކެވެ. ވެރި ރަށް މާލޭގެ އިތުރުން ގިނަ ރަށްރަށުގައި ވެސް އީދު ފެށުމުގެ ގޮތުން މިހާރު ބޮޑު ޖަމާއަތުގައި އީދު ނަމާދުކުރެ އެވެ. އީދު ނަމާދުގައި ބައިވެރިވެލުމަކީ ވެސް އީދުގެ ޖޯޝު އާ ކޮށްލަން މިފަހަރު ޕްލޭންކޮށްލެވިދާނެ ކަމެކެވެ.
ކުޑައިރުގެ 'ވައިބް' ގައި އީދު ގެންނަން ބޭނުންވާ ނަމަ މިރެއަކީ ވެސް މުހިއްމު ރެއެކެވެ. އީދު ނަމާދުން އައިސް ސައި ބޯނެ އެއްޗެހި ތައްޔާރުކުރެވިދާނެ އެވެ.
ރަށްރަށުގައި އީދު ހޭދަކުރާ ގިނަ މީހުންނަށް މިފަހަރުގެ ކުޑަ އީދު 'ކުޑަ' އީދަކަށް ނުވާނެ އެވެ. އާންމުކޮށް ކުޑަ އީދު ފާހަގަ ނުކުރާހާ ބޮޑުކޮށް ބައެއް ރަށްރަށުގައި މާދަމާގެ އީދަށް ޕްލޭންތައް ރާވާފައިވެ އެވެ. ތަފާތު ކުޅިވަރު ތަކާއި މާލި ހެދުމާއި 'އީދު ހުޅު' ރޯކުރުމާއި ދެ ޖިންސް ވަކިން ފެން ޖެހުމުގެ ހަރަކާތްތައް ވެސް ބައެއް ރަށްތަކުގައި މިފަހަރު އެބަ އޮތެވެ.
މިދިޔަ އަހަރުގެ ފިތުރު އީދު ދުވަހު ހުޅުމާލޭގައި ބަޔަކު މޫދު ކުޅިވަރުތަކުގައި.
އީދު ޗުއްޓީ އަށް ނުގޮސް މާލޭގައި ތިބި މީހުންނަށް ކުރެވިދާނެ ކަންތައްތައް
- އާއިލާ އާ އެކު އީދު ދުވަހުގެ ހެނދުނުގެ ސައި ޕްލޭންކޮށްލުން
- ރައްޓެހިންނަށް ގުޅާލައި ހާލު ބަލައިލުން
- ދުއްވާ އެއްޗެހި ދުއްވުން މަނާ ވަގުތުގައި އާއިލާ ނުވަތަ ރައްޓެހިންނާ އެކު ހިނގާލަން ނިކުތުން
- ގޭގެ ޓެރެސް ނުވަތަ ބާބެކިއު އޭރިއާ އެއްގައި ބާބެކިއު އެއް ރާވައިލުން
- ބޮޑު ގުރޫޕަކާ އެކު މޫދަށް ދިއުން
- ޗަންދާ އެއްކޮށްގެން ހުޅުމާލޭގެ މޫދުކުޅިވަރު ތަޖުރިބާކޮށްލުން
- ގޭގެ ކުޑަކުދިން ހިމަނައިގެން އާއިލީ ކުޅިވަރެއް ރާވައިލުން
- ދުވުން ނުވަތަ ކަސްރަތެއް ފެއްޓުން
- އާއިލީ ޒުމްބާ ސެޝަނެެއް ޕްލޭންކޮށްލުން
- ދުރުގައި ތިބި ގާތް އާއިލާ އާއި މަންމަ އާއި ބައްޕަ އަށް ގުޅައި ތަހުނިޔާ ކިޔާލުން
މިއީ ހުސް، އީދުގެ އުފާ ފާހަގަކުރެވިދާނެ ގޮތް ގޮތެވެ.
titledesc
