އަދާވާތްތެރި ފައުޖުތަކާ ދެކޮޅަށް ރައްކާތެރިވުމުގެ ގޮތުން ނިޔުކްލިއާ ހަތިޔާރު ބޭނުން ކުރެވިދާނެ ކަމަށް އުތުރު ކޮރެއާގެ ލީޑަރު ކިމް ޖޮންގް އުން ވިދާޅުވެއްޖެ އެވެ.
އަސްކަރީ އިސް އޮފިޝަލުންނާ ބައްދަލުކުރައްވައި ކިމް ވިދާޅުވީ ގައުމުގެ ފައުޖުގެ "ބާރު ދެމެހެއްޓުމަށް" ހަމަލާއެއްގެ ބިރު ނެތް ނަމަވެސް "ރައްކާތެރިވުމުގެ ގޮތުން" ނިޔުކްލިއާ ހަތިޔާރު ބޭނުން ކުރެވޭނެ ކަމަށެވެ.
އުތުރު ކޮރެއާއިން ނިޔުކްލިއާ ހަތިޔާރު މުއްސަނދި ކުރަމުން ދިޔުން މުހިންމު ކަމަށާއި ގައުމުގެ ރައްކާތެރިކަން ކަށަވަރު ކުރުން ބިނާ ވަނީ އޭގެ މައްޗަށް ކަމަށް ކިމް ވިދާޅުވި އެވެ.
މިދިޔަ ހޯމަ ދުވަހު އޮތް އަސްކަރީ ޕެރޭޑެއްގައި ވެސް ކިމް ވިދާޅުވީ އުތުރު ކޮރެއާގެ "އަސާސީ މަސްލަހަތަށް" ނުރައްކާ އޮތް ނަމަ، ނިޔުކްލިއާ ހަތިޔާރު ބޭނުން ކުރެވޭނެ ކަމަށެވެ.
ދަތި ކުރުމުގެ ފިޔަވަޅުތައް ހަރުކަށި ކުރި ނަމަވެސް، އެ ގައުމުން ދަނީ ބެލިސްޓިކް މިސައިލާއި ނިޔުކްލިއާ ހަތިޔާރު މުއްސަނދި ކުރުމުގެ މަސައްކަތް ކުރިއަށް ގެންދަމުންނެވެ.
ފަސް އަހަރަށް ފަހު، މިދިޔަ މާޗް މަހު އެ ގައުމުން ވަނީ އިންޓަ ކޮންޓިނެންޓަލް ބެލިސްޓިކް މިސައިލެއް ޓެސްޓުކޮށްފަ އެވެ. ސެޓެލައިޓް ފޮޓޯތަކުން ފެންނަ ގޮތުގައި ނިޔުކްލިއާ ޓެސްޓު ކުރާ ސައިޓެއްގައި ވެސް ގިނަ މަސައްކަތްތަކެއް ދަނީ ކުރަމުންނެވެ.
އުތުރު ކޮރެއާއިން ނިޔުކްލިއާ ހަމަލާ ދޭން ފަސް ނުޖެހޭނެ ކަމަށް ބުނަމުންދާ އިރު، ވާދަވެރި ދެކުނު ކޮރެއާގެ އާ ރައީސް ޔޫން ސުކް ޔޯލް ވަރަށް އަވަހަށް މަގާމާ ހަވާލުވެވަޑައިގަންނަވާނެ އެވެ.
އެނެލިސްޓުން ބުނާ ގޮތުން ނިޔުކްލިއާ ހަމަލާ ދިނުމާ ގުޅޭ ގޮތުން ކިމް ތަކުރާރުކޮށް ވާހަކަ ދައްކަވަމުން ދަނީ، ދެކުނު ކޮރެއާގެ އާ ސަރުކާރާ އެކު މަޝްވަރާ ކުރަން ތައްޔާރު ނޫންކަން އެންގުމުގެ ގޮތުންނެވެ.
