ޕެރިސް (އޭޕްރީލް 30) - ފްރެންޗް ލީގުގެ ޗެމްޕިއަންކަން ޖެހިޖެހިގެން 10 ވަަނަ ފަހަރަށް ކަށަަވަރުކޮށްފައިވާ ޕީއެސްޖީން މިރޭ ކުޅުނު މެޗުގައި ސްޓްރާސްބާގް އިން ފަހު ވަގުތު 3-3 އިން އެއްވަރުކޮށްފި އެވެ.
އެންމެ ފަހުން ކުޅުނު މެޗަށް ފަހު ޕީއެސްޖީ އަށް ލީގު ކަށަވަރުވެފައި އޮތުމުން ރޭގެ މެޗަށް އެ ޓީމުން ނުކުތީ މާ ބޮޑު ޕްރެޝަރެއް ނެތި އެވެ. ރޭގެ ނަތީޖާ އަށް ފަހު ޕީއެސްޖީ އެއް ވަނައިގައި އޮތީ 35 މެޗުން 79 ޕޮއިންޓާ އެކު އެވެ. ދެ ވަނައިގައި އޮތް މާސޭ އަށް 34 މެޗުން ވަނީ 65 ޕޮއިންޓް ލިބިފަ އެވެ. ރޭ، ޕީއެސްޖީ އަތުން ޕޮއިންޓެއް ހޯދި، ސްޓްރާސްބާގް އޮތީ 35 މެޗުން 57 ޕޮއިންޓާ އެކު ލީގުގެ ފަސް ވަނައިގަ އެވެ. އެކަމަކު، މި ހަފްތާގައި ނީސް ކުޅޭ މެޗުން ޕޮއިންޓެއް ހޯދިޔަސް، ސްޓްރާސްބޯ ހަ ވަނަ އަށް ވެއްޓޭނެ އެވެ.
ސްޓްރާސްބާގް ދަނޑުގައި ރޭ އެ ޓީމުން ވަނީ ތިން ވަނަ މިނިޓްގައި ލީޑުނަގައިފަ އެވެ، މި ގޯލު ޖެހީ ކުރިން ޕީއެސްޖީ އަށް ވެސް ކުޅުނު ކެވިން ގަމެއިރޯ އެވެ. މެޗުގެ 11 ވަނަ މިނިޓްގައި ސްޓްރާސްބާގް އިން ދެ ވަނަ ގޯލެއް ޖެހި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައެއްނުގަނެ އެވެ. މެޗުގެ 23 ވަނަ މިނިޓްގައި ނޭމާ ދިން ބޯޅައަކުން ކީލިއަން އެމްބާޕޭ ވަނީ ޕީއެސްޖީ އަށް އެއްވަރުކޮށްދީފަ އެވެ.
ސްޓްރާސްބާގްގެ ދެ ކުޅުންތެރިން ކައިރިން ޕީއެސްޖީގެ މެސީ (ކ) ބޯޅަ ހިފައިގެންދަނީ.--- ފޮޓޯ: އޭއެފްޕީ
ދެ ވަނަ ހާފްގައި ހަތަރު މިނިޓް ތެރޭ ޕީއެސްޖީން ދެ ގޯލު ޖަހައި ރަނގަޅު ލީޑެއްނެގި އެވެ. އެ ގޮތުން މެޗުގެ 64 ވަނަ މިނިޓްގައި އަޝްރަފް ހަކީމީ ޕީއެސްޖީ އަށް ލީޑުނަގައިދިނީ އެމްބާޕޭ ދިން ބޯޅައަކުންނެވެ. އޭގެ ހަތަރު މިނިޓް ފަހުން، މެޗުގެ 68 ވަނަ މިނިޓްގައި އެމްބާޕޭ އިތުރު ގޯލެއް ޖެހި އެވެ.
އަމިއްލަ ސަޕޯޓަރުންގެ ކުރިމަތީގައި ކުޅުނު ސްޓްރާސްބާގް އިން އެއްވަރުކުރީ މެޗުގެ ފަހު 15 މިނިޓް ތެރޭ ދެ ގޯލު ޖަހައިގެންނެވެ. މެޗުގެ 75 ވަނަ މިނިޓްގައި ސްޓްރާސްބާގްގެ ހަމަދު ޑިއާލޯގެ ރަނގަޅު އެޓޭކެއް ހުއްޓުވަން އުޅުމުގެ ތެރޭގައި ޕީއެސްޖީގެ މާކޯ ވެރާޓީ އަތުން ބައިކޮޅަށް ގޯލެއް ވަދެ، ސްޓްރާސްބާގް އަށް އުންމީދެއް ލިބުނެވެ. ސްޓްރާސްބާގް އިން އެއްވަރުކުރި ގޯލު ޖެހީ އިތުރު ވަގުތުގެ ދެ ވަނަ މިނިޓްގަ އެވެ. މިއީ އެންތަނީ ޝާޝީ ޖެހި ގޯލެކެވެ.
މި މެޗުގެ ކުރިން ޕީއެސްޖީގެ ކޯޗު މައުރީސިއޯ ޕޮޗެޓީނޯ ވަނީ އަންނަ ސީޒަނުގައި އޭނާ އާއި އެމްބާޕޭ ހުންނާނީ ޕީއެސްޖީގައި ކަން "100 ޕަސެންޓް ޔަގީން" ކަމަށް ބުނެފަ އެވެ.
އެކަމަކު، ރޭގެ މެޗަށް ފަހު އެމްބާޕޭ ބުނީ އޭނާ އެ ހާލަތުގައި ވާހަކަ ދެއްކީ އެމްބާޕޭ އެ ވަގުތު ހުރީ ޕީއެސްޖީގައި ކަމަށް އިޝާރާތްކޮށް ކަމަށާއި މާނަ އޮޅޭ ގޮތަށް އެ ވާހަކަ ގެނައީ މީޑިއާ އިން ކަމަށެވެ.
ޕީއެސްޖީގެ ކޯޗު ކަމަށް ޓޮޓެންހަމް ހޮޓްސްޕާސްއާ ހަވާލުވެހުރި އިޓަލީގެ ކޯޗު އެންޓޯނިއޯ ކޮންޓޭ ގެންނަން އުޅޭ ކަމަށް އަޑުފެތުރުނުއިރު، އޭނާ ވަނީ އެއީ ހަގީގަތެއް ނެތް "ފޭކް" ހަބަރެއް ކަމަށް ބުނެފަ އެވެ.
