ސްރީ ލަންކާގައި ސޭލްސް ޓެކްސް މަތި ކުރުން ނޫން ގޮތެއް ނެތް ކަމަށް ފިނޭންސް މިނިސްޓަރު އަލީ ސަބްރީ ވިދާޅުވެއްޖެ އެވެ.
ބީބީސީއަށް ދެއްވި އިންޓަވިއުއެއްގައި ސަބްރީ ވިދާޅުވީ މުދަލާއި ހިދުމަތުގެ އަގުން ނަގާ ޓެކްސް 2019 ވަނަ އަހަރު ކުޑަ ކުރުމަކީ ސަރުކާރަށް ހެދުނު ގޯހެއް ކަމަށެވެ.
އޭނާ ވިދާޅުވީ ކޮންމެ ދުވަހަކު ބޭނުންވާ ޒަރޫރީ ތަކެތި އިމްޕޯޓް ކުރަން އެކަނިވެސް ކުރިއަށް އޮތް އަށް މަސް ދުވަހަށް ހަތަރު ބިލިއަން ޑޮލަރު ބޭނުންވާ ކަމަށެވެ.
"ޓެކްސް މަތި ކުރަން އެބަ ޖެހޭ. އަޅުގަނޑުމެންގެ ހަރަދާއި ލިބޭ އާމްދަނީއާ ދެމެދުގައިވާ ބާގަނޑު ފޫބެއްދޭނެ ގޮތެއް އެބަ ހޯދަން ޖެހޭ،" ސަބްރީ ވިދާޅުވި އެވެ.
އޭނާ ވިދާޅުވީ މިހާރު ޓެކްސްގެ ގޮތުގައި ނަގާ މިންވަރަކީ ލަންކާ ފަދަ ގައުމަކަށް "ދެމެހެއްޓެނިވި މިންވަރެއް ނޫން" ކަމަށެވެ. މިހާރު ޓެކްސްގެ ގޮތުގައި ނަގަނީ އަށް ޕަސެންޓެވެ.
ނަމަވެސް 2019 ވަނަ އަހަރުގެ ކުރިން ޓެކްސްގެ ގޮތުގައި ނަގަމުން ދިޔައީ 15 ޕަސެންޓެވެ. ސަބްރީ ވިދާޅުވީ 13 ނުވަތަ 14 ޕަސެންޓަށް ޓެކްސް މަތި ކުރަން ޖެހޭ ކަމަށެވެ.
ރައީސް ގޮތަބަޔާ ރާޖަޕަކްސަ ވެރިކަމަށް ވަޑައިގެންނެވިތާ ކުޑަ ދުވަސްކޮޅެއްގެ ތެރޭގައި ޓެކްސް ކުޑަ ކުރީ ކެމްޕެއިން ވައުދެއް ފުއްދުމުގެ ގޮތުންނެވެ.
ޓެކްސް ކުޑަ ކުރުމުން ވިޔަފާރިވެރިންނަށް ލުއިތަކެއް ލިބި، އިގްތިސާދީ ހަރަކާތް ފުޅާ ކުރެވޭނެ ކަމަށް އޭރު ލަންކާ ސަރުކާރުން ބުންޏެވެ.
އެކަމަކު ސަބްރީ ވިދާޅުވީ އެއީ ގޯސް ނިންމުމެއް ކަމަށާއި އިގްތިސާދީ ކާރިސާ ކުރިމަތިވުމުން އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީއަށް އެދުނީ ވެސް މާ ލަހުން ކަމަށެވެ.
ސަރުކާރުން އައިއެމްއެފްގެ އެހީއަށް އެދުން ފަސްކުރީ ސަރުކާރު ކޯލިޝަނުގައި ހިމެނޭ ބައެއް ފަރާތްތަކުން އެކަމާ ދެކޮޅު ހަދާތީ އެވެ.
އައިއެމްއެފްގެ އެހީ ހޯދާ ނަމަ، ހަރަދު ކުޑަކޮށް ޓެކްސް މަތި ކުރަން ޖެހޭނެ ކަމަށް ބުނެ، އެ ފަރާތްތަކުން ކަންބޮޑުވުން ފާޅުކުރި އެވެ.
