ޕެރިސް (އޭޕްރީލް 28) - އަންނަ ސީޒަނުގައި ވެސް ކީލިއަން އެމްބާޕޭ ފެންނާނީ ޕީއެސްޖީން ކަމަށް އެ ޓީމުގެ ކޯޗު މައުރީސިއޯ ޕޮޗެޓީނޯ ބުނެފި އެވެ.
އެމްބާޕޭ، ޕީއެސްޖީގައި ހުރީ އަންނަ ޖޫން މަހުގެ ނިޔަަލަށް ހަދާފައިވާ ކޮންޓްރެކްޓެއްގަ އެވެ. އެމްބާޕޭ، ސްޕެއިނުގެ ގަދަބާރު ރެއާލް މެޑްރިޑަށް ދާން ނިންމާފައިވާ ކަމަށް ރިޕޯޓްތައް ބުނެ އެވެ. އަދި ޕީއެސްޖީން ޕޮޗެޓީނޯގެ ކޮންޓްރެކްޓް އުވާލައި، އެ ޓީމުގެ ކޯޗުކަން އެންޓޯނިއޯ ކޮންޓޭއާ ހަވާލުކުރަން މަޝްވަރާކުރަން ފަށާފައިވާ ކަމަށް ފްރާންސާއި އިނގިރޭސި ނޫސްތަކުން ވަނީ ރިޕޯޓްކޮށްފަ އެވެ.
މި ސީޒަނުގެ ޗެމްޕިއަންސް ލީގުގެ ދެ ވަނަ ބުރުން ޕީއެސްޖީ ކެޓުމުން ޕޮޗެޓީނޯ އަށް އެ ޓީމުގެ ކޯޗުކަން ގެއްލޭނެ ކަމަށް މީޑިއާތަކުން ވަނީ ރިޕޯޓްކޮށްފަ އެވެ. އެކަމަކު، ދާދި ފަހުން ޕީއެސްޖީން ފްރާންސްގެ ޗެމްޕިއަންކަން ހޯދުމުން ޕޮޗެޓީނޯއާ އެކު ޕީއެސްޖީން ކުރިއަށްދާނެ ކަމުގެ އިޝާރާތެއް ޕީއެސްޖީގެ ސްޕޯޓިން ޑިރެކްޓަރު ލިއޮނާޑޯ ވަނީ ދީފަ އެވެ.
މުސްތަގުބަލާ ބެހޭގޮތުން އަމާޒުވި ސުވާލުތަކަށް ޖަވާބުދެމުން ޕޮޗެޓީނޯ ބުނީ އަންނަ ސީޒަނުގައި އޭނާ އާއި އެމްބާޕޭ ފެންނާނީ ޕީއެސްޖީން ކަމަށެެވެ. އަދި އެއީ އޭނާގެ ހިތް އެދޭ ގޮތް ކަމަށާއި މި ވަގުތު ވިސްނަނީ ވެސް ހަމައެކަނި އެ ގޮތަށް ކަމަށް ޕޮޗެޓީނޯ ވަނީ ބުނެފަ އެވެ.
"އަހަންނަށް 100 ޕަސެންޓް ޔަގީންކަން އެބައޮތް،" އޭނާ އާއި އެމްބާޕޭގެ މުސްތަގުބަލާ ބެހޭގޮތުން ޕޮޗެޓިނޯ ބުންޏެވެ.
ކުރިން ޓޮޓެންހަމާއި ސައުތެމްޓަނަށް ކޯޗުކޮށްދިން ޕޮޗެޓީނޯ ޕީއެސްޖީގެ ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. އެ އެއްބަސްވުން އާ ކުރަން ޕީއެސްޖީން އެއްވެސް އިރެއްގައި މަޝްވަރާކޮށްފައިވޭތޯ އެހުމުން ޕޮޗެޓީނޯ ބުނީ އަދި އެ ފަދަ ވާހަކަތަކެއް ނުދެކެވޭ ކަމަށެވެ.
ޕީއެސްޖީގައި މަޑުކުރަން އެމްބާޕޭ ނިންމައިފިނަމަ އޭނާ އަށް ބޯނަހެއްގެ ގޮތުގައި 150 މިލިއަން ޕައުންޑް (195 މިލިއަން ޑޮލަރު) ދޭން އެ ކްލަބްގެ މެނޭޖްމަންޓުން ނިންމާފައިވާ ކަމަށް ސްޕެއިނުގެ ކުޅިވަރު އެނަލިސްޓް ގިލެމް ބަލަގޫ ވަނީ ބުނެފަ އެވެ.
ސްޕެއިނުގެ މީޑިއާތަކުން ރިޕޯޓްކުރާ ގޮތުގައި އެމްބާޕޭ ވަނީ ރެއާލް މެޑްރިޑަށް ބަދަލުވާން އަނގަބަހުން އެއްބަސްވެފަ އެވެ. އެކަމަކު، ފްރާންސްގެ ނޫހަކަށް ދާދި ފަހުން ދިން އިންޓަވިއުއެއްގައި އެމްބާޕޭ ބުނީ މުސްތަގުބަލާ ބެހޭގޮތުން ގޮތެއް ނިންމައި އަންނަ ސީޒަނުގައި ކުޅޭނެ ވަކި ކްލަބެއް އަދި ނުނިންމާ ކަމަށެވެ.
