ސްރީ ލަންކާގައި 1000 އަށް ވުރެ ގިނަ ޓްރޭޑް ޔޫނިއަން އެކުވެ، ބުރާސްފަތި ދުވަހު ބޮޑު އިހުތިޖާޖެއް ފަށަން ތައްޔާރުވެއްޖެ އެވެ.
ގިނަ ދާއިރާތަކެއްގެ މަސައްކަތްތެރިން ކުރާ އިހްތިޖާޖުގައި ސަރުކާރަށް ގޮވާލަނީ ރައްޔިތުން ޑިމާންޑަށް އިޖާބަ ދިނުމަށް ފަހު އިސްތިއުފާ ދިނުމަށެވެ.
ތައުލީމާއި ދަތުރުފަތުރާއި، ގެދޮރު ވިއްކުމާއި ބަނދަރާއި ހަކަތައިގެ ސިނާއަތާއި، ބޭންކާއި ޕޯސްޓު ހިދުމަތުގެ އިތުރު ސިއްހީ ދާއިރާގެ މީހުން ވެސް އިހްތިޖާޖުގައި ބައިވެރިވެ އެވެ.
ބުރާސްފަތި ދުވަހުގެ އިހްތިޖާޖުގެ އިތުރުން، ބޮޑު އެއްވުމަކާއި ހިނގާލުމެއް ބާއްވަން ވެސް ޓްރޭޑް ޔޫނިއަންތަކުން ވަނީ ރާވާފަ އެވެ.
ލަންކާގެ މަސައްކަތްތެރިން އިހްތިޖާޖަށް ތައްޔާރުވަމުންދާ އިރު، ކޮލޮމްބޯގައި ހުންނަ ރައީސް އޮފީސް ބޭރުގައި ގިނަ ބަޔަކު ޓެންޓު ޖަހައިގެން މުޒާހަރާ ކުރާތާ 20 ދުވަސް ވެއްޖެ އެވެ.
އެ މީހުންގެ ޑިމާންޑަކީ ރައީސް ގޮތަބަޔާ ރާޖަޕަކްސަ އާއި ބޮޑު ވަޒީރު މަހިންދަ ރާޖަޕަކްސަ އިސްތިއުފާ ދިނުމެވެ. ނަމަވެސް އިސްތިއުފާ ނުދެއްވާނެ ކަމަށް ދެ ބޭފުޅުން ވެސް ވިދާޅުވެ އެވެ.
އިގްތިސާދީ ކާރިސާއެއް ކުރިމަތިވެފައިވާ ލަންކާގައި މިދިޔަ ޖެނުއަރީ މަހުން ފެށިގެން ޒަރޫރީ ތަކެތީގެ އަގު 140 ޕަސެންޓް މަތިވެފައިވާ ކަމަށް އެ ގައުމުގެ މަރުކަޒީ ބޭންކުގެ ތަފާސްހިސާބުން ދައްކަ އެވެ.
