މިލާން (އޭޕްރީލް 27) - އިޓާލީގެ އަންހެން ފުޓްބޯޅައިގެ އެންމެ މަތީ ޑިވިޝަން، ސެރިއާ އަށް ޕްރޮފެޝަނަލް ހައިސިއްޔަތު ދޭން ނިންމާފައިވަނީ އިޓަލީގެ ފުޓްބޯޅަ ފެޑެރޭޝަނުން އިއުލާނުކޮށްފި އެވެ.
މިހާތަނަށް އިޓަލީގައި އަންހެން ފުޓްބޯޅަ އަށް ދީފައިވާ އަހައްމިއްޔަތުކަން ނިސްބަތުން ކުޑަވެފައި އޮތީ ސެމީ ޕްރޮފެޝަނަލްކޮށް ގިނަ ކަންތައްތަކެއް ހަމަޖެހިފައި އޮތުމުންނެވެ. އެކަމަކު، ދާދި ފަހުން އިޓަލީގެ ފުޓްބޯޅަ ފެޑެރޭޝަނުން ފާސްކުރި ގަވާއިދުގައިވާ ގޮތުން އަންނަ ސީޒަނުން ފެށިގެން އިޓަލީގެ އަންހެން ފުޓްބޯޅައިގެ ލީގު، އިޓާލިއަން ސެރިއާގައި އެޑްމިނިސްޓްރޭޝަނުން ފެށިގެން ހުރިހާ ކަމެއް ކުރިއަށްދާނީ ޕްރޮފެޝަނަލް މިންގަނޑަށް ފައްތައިގެންނެވެ.
"މިއީ އިޓަލީގެ ފުޓްބޯޅައިގައި ތާރިހީ ފިޔަވަޅެއް. އަންހެން ފުޓްބޯޅަ ޕްރޮފެޝަނަލް އުސޫލުގެ ތެރެއިން ހިނގައިގަތުމަކީ އިޓަލީގެ ފުޓްބޯޅަ މިހާރު އޮތް ހަރުފަތް މައްޗަށް ޖައްސާލެވޭނެ ސަބަބެއް،" އިޓަލީގެ ފުޓްބޯޅަ ފެޑެރޭޝަންގެ ރައީސް ގަބްރިއެލް ގްރަވީނާ ވިދާޅުވި އެވެ.
އިޓަލިގެ އަންހެން ފުޓްބޯޅައިގެ އެންމެ ފަހުން ހަތަރު ފަހަރުގެ ޗެމްޕިއަންކަން ހޯދީ ޔުވެންޓަސް އިންނެވެ. ޖެހިޖެހިގެން ފަސް ވަނަ ފަހަރަށް އިޓަލީގެ ޗެމްޕިއަންކަން ހޯދުމާ ޔުވެންޓަސް އޮތީ ގާތުގަ އެވެ. މިހާރު ކުރިއަށްދާ އިޓަލީގެ އަންހެން ލީގުގެ އެއް ވަނައިގައި ޔުވެންޓަސް އޮތީ ދެ ވަނައިގައި އޮތް ރޯމާ އަށް ވުރެން ފަސް ޕޮއިންޓް އިތުރަށް ހޯދައިގެންނެވެ. ލީގުގައި ބާކީ އޮތީ ދެ މެޗެވެ.
އަންހެން ފުޓްބޯޅަ ލީގު ޕްރޮފެޝަނަލް އުސޫލުން ކުރިއަށްގެންދަން ނިންމި ނިންމުމަށް ޔުވެންޓަސް އިން ވަނީ މަރުހަބާ ކިޔައިފަ އެވެ.
