މީގެ ތިން އަހަރު ކުރިން އައްޑޫ ސިޓީ ގަމުގައި ހިނގި މަރާމާރީއެއްގައި މީހެއްގެ ގައިގެ 11 ތަނަށް ވަޅި ހަރައިގެން އަނިޔާވި މައްސަލައެއްގައި ދައުލަތުން ހުށަހެޅި ހެކިންގެ ބަހުގައި ބުރަދަނެއް ނެތް ކަމަށް ބެލެވޭތީ ދައުވާ އުފުލި މީހާގެ މައްޗަށް ކުށް ސާބިތު ނުވާ ކަމަށް ކްރިމިނަލް ކޯޓުން ކަނޑައަޅައިފި އެވެ.
އޭޕްރީލް 17، 2019 ގައި ހިނގި އެ މާރާމާރީއާ ގުޅިގެން ސ. ފޭދޫ، ހަވީރީނާޒް، އިއުތިސާމް މުހައްމަދުގެ މައްޗަށް ކުރި ދައުވާގައިވާ ގޮތުން އޭނާ ތިން އިންޗީގެ ތިލައެއް އިންނަ ވަޅިއެއް ސ. ހިތަދޫ، އިތާމުތްގެ، މުހައްމަދު ފާރިހްގެ ބުރަކަށީގެ 11 ތަނަކަށް ހަރާފައިވާ ކަމަށެވެ.
މި މައްސަލަ ސާބިތު ކުރަން ދައުލަތުން ހުށަހެޅި ޝަފައީ ނުވަ ހެކިން ވެސް ޝަރީއަތަށް ހާޒިރުވެފައިވެ އެވެ. އޭގެ ތެރޭގައި ހިމެނެނީ އާންމުންގެ ތިން މީހުންނާއި، މައްސަލަ ތަހުގީގު ކުރުމުގައި ހަރަކާތްތެރިވި ފުލުހުންގެ ހަތަރު އޮފިސަރަކާއި، ފާރިހަށް ލިބުނު އަނިޔާ ތަހުލީލު ކުރި ޑޮކްޓަރެކެވެ.
މީގެ ތެރެއިން ޝަރީއަތަށް ހާޒިރުވެ ހެކިބަސް ދިން އާންމުންގެ ތިން މީހުން ވެސް ބުނެފައި ވަނީ، މާ ގިނަ ދުވަސް ވެފައި އޮތް ކަމަކަށް ވާތީ، އެ ދުވަހު މާރާމާރީއެއް ހިނގިކަން ހަނދާނުގައި ނެތް ކަމަށެވެ. އަދި ދައުވާ ލިބޭ ފަރާތަކީ ކާކު ކަން ވެސް ނޭނގޭ ކަމަށް އެ ތިން މީހުން ބުންޏެވެ.
އަނިޔާ ލިބުނު ފަރާތުގެ އެކުވެރިއެއް ވެސް އޭގެ ތެރޭގައި ހިމެނޭއިރު، އޭނާ ބުނީ ފާރިސްއަށް މާރާމާރީއެއްގައި އަނިޔާއެއް ލިބުނު ކަން އެނގުނު ނަމަވެސް އެ ކަން ހިނގި ގޮތެއް ހަނދާނުގައި ނެތް ކަމަށެވެ. ފުލުހުންނަށް ބަޔާނެއް ދިން ކަން ވެސް ހަނދާނުގައި ނެތް ކަމަށް ބުނިއިރު، އޭނާ ދިން ކަމަށް ދައުލަތުން ބުނާ ބަޔާން އަޑުއަހަން ވެސް ބޭނުން ނުވާ ކަމަށް އޭނާ ބުންޏެވެ.
މާރާމާރީ ހިންގި ކަމުގެ ދައުވާ އުފުލުނު މީހާ ދިން ހަމަލާތަކެއް ކަމަށް ބުރަދަން ދެވެން އޮތީ ފުލުހުން ދިން ހެކިބަސްތަކުންނެވެ. ނަމަވެސް ބައެއް ފުލުހުންނަށް އެއީ ސީދާ ތުހުމަތު ކުރާ މީހާ ކުރި ކަމެއް ބުނެނުދެވޭ ކަން ވެސް ފާހަގަކޮށްލެވެ އެވެ.
ދައުވާ ލިބޭ ފަރާތުން ދިފާއީ ހެކިންގެ ގޮތުގައި 22 ހެއްކެއް ހުށަހެޅި ނަމަވެސް އޮކްޓޯބަރު 14، 2021 ގައި ބޭއްވި ޝަރީއަތުގެ އަޑުއެހުމުގައި ދިފާއީ ހެކިންގެ ހެކިބަސް ނުނަގާ ކުރިއަށް ގެންދަން ދިފާއުން އެދުމުން އެ މީހުންގެ ހެކިބަސް ޝަރީއަތުން ހޯދާފައެއް ނުވެ އެވެ.
މި މައްސަލައިގެ ހުކުމުގައި ވަނީ، މާރާމާރީއެއްގައި ފާރިހަށް އަނިޔާވެފައިވާ ކަން ސާބިތުވިޔަސް، އެ ކަން ކުރީ ދައުވާ ލިބޭ ފަރާތުން ކަން ސާބިތު ކުރަން ވެގެން ދައުލަތުން ހުށަހެޅި ހެކި ގަރީނާތަކުން އެއްވެސް ޝައްކެއް ނެތް މިންވަރަށް އެކަން ސާބިތު ކޮށްދެވިފައި ނުވާ ކަމުގަ އެވެ.
