ސްރީ ލަންކާގައި އިންވެސްޓްކުރާ އެހެން ގައުމުތަކުގެ ރައްޔިތުންނަށް ދިގު މުއްދަތަށް އެ ގައުމުގައި ދިރިއުޅެވޭނެ ގޮތް މަގުފަހި ކުރަން "ރެޒިޑެންޓް" ވިސާ ދޫކުރަން ސަރުކާރުން ނިންމައިފި އެވެ.
ލަންކާ ސަރުކާރުން ނިންމީ ގެދޮރާ ބެހޭ ސިނާއަތް ނުވަތަ "ކޮންޑޮމީނިއަން ޕްރޮޕަޓީޒް" ގައި 75،000 އެމެރިކާ ޑޮލަރަށް ވުރެ ގިނައިން އިންވެސްޓް ކުރާ ނަމަ، އިންވެސްޓް ކުރާ މިންވަރަކަށް ބަލައި 5-10 އަހަރާ ދެމެދުގެ މުއްދަތަށް ވިސާ ދޫކުރުމަށެވެ.
އެގޮތަށް ވިސާ ލިބޭނެ ފަރާތްތަކުގެ ތެރޭގައި އިންވެސްޓް ކުރާ ބޭރު ރައްޔިތުންނާއި އެ މީހުންގެ އަނބިންނާއި ފިރިން އަދި މައިންބަފައިންނާއި ދަރިން ހިމެނެ އެވެ.
އޭގެ އިތުރުން "ގޯލްޑަން ޕެރެޑައިސް ވިސާ" ގެ ނަމުގައި މުޅިން އާ ޕްރޮގްރާމެއް ވެސް ލޯންޗު ކުރަން ވަނީ ނިންމާފަ އެވެ. އޭގެ ދަށުން ލަންކާގެ މަރުކަޒީ ބޭންކުން ކަނޑައަޅާ ކޮމާޝަލް ބޭންކުތަކުގެ ތެރެއިން ބޭންކެއްގައި މަދުވެގެން 100،000 އެމެރިކާ ޑޮލަރު ބަހައްޓައިފި ނަމަ، 10 އަހަރުގެ ވިސާ ލިބޭނެ އެވެ.
ބޭރު ފައިސާގެ ދަތިކަމާ ހެދި ޑޮލަރު ހޯދުމުގެ ބޭނުމުގައި އެ ނިންމުންތައް ނިންމި އިރު، އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ލަންކާއަށް ލަފާ ދެނީ ފައިސާއާ ގުޅޭ ސިޔާސަތު ވަރުގަދަކޮށް، ޓެކްސް މަތި ކުރުމަށެވެ.
އިގްތިސާދީ ކާރިސާއިން އަރައިގަތުމަށް ލަންކާއިން ވަނީ އައިއެމްއެފްގެ އެހީއަށް އެދިފަ އެވެ. އެކަމާ ގުޅޭ މަޝްވަރާތައް މިދިޔަ ހަފްތާގައި ކުރިއަށް ދިޔަ އެވެ. އައިއެމްއެފްގެ އިތުރުން ވޯލްޑް ބޭންކާ އެކު ވެސް ލަންކާ ސަރުކާރުން ދަނީ މަޝްވަރާ ކުރަމުންނެވެ.
ލަންކާ ރައީސްގެ އޮފީހުން އަންގާރަ ދުވަހު ބުނީ ވޯލްޑް ބޭންކުން 600 މިލިއަން ޑޮލަރު ދޭން އެއްބަސްވެފައިވާ ކަމަށެވެ. އެގޮތުން ފުރަތަމަ މަރުހަލާގައި ދޫކުރާނީ 400 މިލިއަން ޑޮލަރެވެ. އެއީ ލަންކާއަށް ބޭނުންވާ ޒަރޫރީ ތަކެތި އިމްޕޯޓް ކުރަން ފޯރުކޮށްދޭ ފައިސާ އެވެ.
