ދުނިޔޭގެ އެންމެ މޮޅު ބާސްކެޓްބޯޅަ ކުޅުންތެރިންގެ ތެރޭގައި ހިމެނޭ ލެބްރޮން ޖޭމްސް ޗުއްޓީ ހޭދަކުރުމަށް ރާއްޖެއަށް އައިސްފި އެވެ. އޭނާ ޗުއްޓީ ހޭދަކުރަމުން އަންނަނީ ބ. އަތޮޅުގައި އޮންނަ ފޯ ސީޒަންސް ޕްރައިވެޓު އައިލެންޑުގަ އެވެ.
ލެބްރޮންގެ ޓީމް، އެމެރިކަން ބާސްކެޓްބޯލް އެސޯސިއޭޝަން (އެންބީއޭ) ގެ "ލޮސްއެންޖަލިސް ލޭކާސް' އަށް ނާކާމިޔާބު ސީޒަނަކަށް ފަހު ރާއްޖެއަށް އައިސް ޗުއްޓީ ހޭދަކުރަނިކޮށް ނަގާފައިވާ ޕޯސްޓެއް ސޯޝަލް މީޑިއާގައި އިއްޔެ ވަނީ ދައުރުވެފަ އެވެ. އެ ވީޑިއޯ އަށް މާޔޫސްވެފައި ތިބި، އެންބީއޭ ފޭނުން ވަނީ މަސްހުނި ޝުއޫރުތަކެއް ފާޅުކޮށްފަ އެވެ.
ފަހު ސީޒަން ކާމިޔާބު ނުކުރެވުނަސް، ލެބްރޮން ވަނީ އެންބީއޭ އަށް މިދިޔަ 18 ސީޒަނުގައި ކުޅެ މޮޅު ކާމިޔާބީތަކެއް ހޯދައިދީފަ އެވެ. އޭނާ ވަނީ އެންބީގެ ޗެމްޕިއަން ކަމާއި އެންބީއޭގެ އެންމެ މޮޅު ކުޅުންތެރިޔާގެ މަގާމު ހަތަރު ފަހަރު ހޯދާފަ އެވެ.
ކުޅިވަރު ދުނިޔޭގައި "ކިންގް ޖޭމްސް" ގެ ނަމުން މަޝްހޫރު ލެބްރޮން އަކީ މިހާތަނަށް އުފެދުނު އެންމެ މޮޅު އެއް ބާސްކެޓް ބޯޅަ ކުޅުންތެރިޔާ، މައިކަލް ޖޯޑަން އާ ވެސް ހުނަރުގެ ގޮތުން ގިނަ ބަޔަކު އަޅާ ކިޔާ ކުޅަދާނަ ކުޅުންތެރިއެކެވެ.
