ސިވިލް ކޯޓުގެ އިސް ގާޒީ އަބްދުﷲ އަލީ އެ ކޯޓުގެ ގަޒިއްޔާއެއް ބާތިލް ކުރުމުގައި އަމަލުކޮށްފައިވާ ގޮތް ބެލުމަށް ފަހު އޭނާއަށް ފިޔަވަޅު އަޅަން ޖުޑިޝަލް ސާވިސް ކޮމިޝަން (ޖޭއެސްސީ)އިން ނިންމައިފި އެވެ.
ޖޭއެސްސީން މިއަދު ނެރުނު ބަޔާނެއްގައިވާ ގޮތުން، ސިވިލް ކޯޓުގެ އިސް ގާޒީ އަބްދުﷲ ބައްލަވާ މައްސަލައަށް ހާޒިރުވާން އޮތް ފަރާތެއް މެޖިސްޓްރޭޓް ކޯޓަކަށް ހާޒިރުވާން އެ ދުވަހު އޮތުމުން، އެހެން ދުވަހަކަށް ފަސްކޮށްދޭން އެދުމުން ގާޒީ ވަނީ އޭގެ ބަދަލުގައި ގަޒިއްޔާ ބާތިލްކޮށްފަ އެވެ.
މި މައްސަލާގައި އަބްދުﷲ އަލީ އަމަލު ކޮށްފައި ވަނީ ޝަރުއީ ދާއިރާގެ ހައިބަތާއި އިތުބާރު ގެއްލޭ ފަދަ ގޮތެއްގެ މަތިން ފަނޑިޔާރުގެ ވާޖިބު އަދާ ކުރުމުގައި ތައައްސުބެއް އޮތް ކަން ފެންނަ ގޮތަކަށް، އަދުލުވެރިކަމާ މެދު ސުވާލު އުފެދިދާނެ ގޮތެއްގެ މައްޗަށް ކަމަށް ޖޭއެސްސީން ބުންޏެވެ.
އަބްދުﷲ އަލީގެ ބަހުންނާއި ލިޔެކިޔުންތަކުން ޖޭއެސްސީގެ ތަހުގީގަށް އެ ކަން ސާބިތުވެފައިވާ ކަމަށް ކަނޑައަޅައި، ޖޭސްސީން ނިންމީ އެއީ ފަނޑިޔާރުންގެ ގާނޫނުގެ 34 ވަނަ މާއްދާއާއި ފަނޑިޔާރުންގެ ސުލޫކީ މިންގަނޑުގައި ހިމެނޭ ދެ އަމަލަކާ ހިލާފަށް ކޮށްފައިވާ އަމަލެއް ކަމުގަ އެވެ.
މި މައްސަލާގައި ޖޭއެސްސީން އެޅި ފިޔަވަޅަކީ، އިސް ގާޒީ އަބްދުﷲ އަލީއަށް ނަސޭހަތް ދިނުމާއެކު ކޮމިޝަނުން ކަނޑައަޅާ ތަމްރީން ޕްރޮގްރާމެއް ފުރިހަމަ ކުރުމެވެ.
މިހާރު މި އޮތް ޖޭއެސްސީ އެކުލަވާލި ފަހުން އެ ކޮމިޝަނުން ގެންދަނީ ފަނޑިޔާރުންނާ ގުޅޭ ގޮތުން ހުށަހެޅޭ ގިނަ ޝަކުވާތަކެއް ބަލައި، ގިނަ އަދަދެއްގެ ފަނޑިޔާރުންނަށް ފިޔަވަޅު އަޅަމުންނެވެ. ބައެއް ފަނޑިޔާރުން ވަކިކުރަން މަޖިލީހަށް ފޮނުވިއިރު، މަޖިލީހުން ފަނޑިޔާރުންތަކެއް ވަކިކޮށްފައިވެ އެވެ.
