އިގްތިސާދީ ކާރިސާއިން އަރައިގަތުމަށް ސްރީލަންކާއިން އިންޓަނޭޝަނަލް މަނިޓަރީ ފަންޑް (އައިއެމްއެފް)އާ އެކު މަޝްވަރާ ކުރަމުން ދާތީ ޗައިނާއިން ލޯނު ހޯދަން ދަތިވެދާނެ ކަމަށް ޗައިނާ ސަފީރު ވިދާޅުވެއްޖެ އެވެ.
ނޫސްވެރިންނަށް މައުލޫމާތު ދެއްވަމުން ޗައިނާއިން ލަންކާއަށް ކަނޑައަޅާފައި ހުންނަ ސަފީރު ގީ ޒެންހޯންގް ވިދާޅުވީ ޗައިނާއިން ހޯދަން މަސައްކަތް ކުރާ 2.5 ބިލިއަން ޑޮލަރުގެ ލޯނަށް އަސަރުކޮށްފާނެ ކަމަށެވެ.
ލަންކާ ސަރުކާރާއި އައިއެމްއެފްއާ މެދު ކުރިއަށް ގެންދާ މަޝްވަރާ ޗައިނާއިން ވަރަށް ގާތުން ބަލަމުންދާ ކަމަށް އޭނާ ވިދާޅުވި އެވެ. އަދި ދަރަނި ރީސްޓްރަކްޗާ ކުރުމަކީ އައިއެމްއެފްގެ މުހިންމު ޑިމާންޑަކަށް ވާނެ ކަމަށް އޭނާ ވިދާޅުވި އެވެ.
އެހެން ނަމަވެސް، ޗައިނާއަކީ ދަރަނި ރީސްޓްރަކްޗާ ކުރުމުގެ ސިޔާސަތު ގެންގުޅޭ ގައުމެއް ނޫނެވެ. އެހެންވެ، ދާދި ފަހުން ވެސް ސްރީލަންކާއަށް ވަނީ ޗައިނާގެ ބޭންކުތަކަށް ދަރަނި އަދާ ކުރަން ޗައިނާ ސަރުކާރުން އިތުރު ލޯނެއް ނަގަން އެދި ހުށަހަޅަން މަޖުބޫރުވެފަ އެވެ.
ޗައިނާ ސަފީރު އިޝާރާތް ކުރެއްވި 2.5 ބިލިއަން ޑޮލަރުގެ ލޯނަކީ އޭރު ލަންކާއިން ހުށަހެޅި ލޯނެވެ. ލަންކާއިން އެދިފައި ވަނީ ޖުލައި މަހުގެ ކުރިން އަދާ ކުރަން ޖެހޭ ދަރަނި ދެއްކުމަށް އެއް ބިލިއަން ޑޮލަރުގެ ލޯނަކާއި ޗައިނާއިން ޒަރޫރީ ތަކެތި އެތެރެ ކުރަން 1.5 ބިލިއަން ޑޮލަރުގެ ކްރެޑިޓް ލައިނަކަށެވެ.
ޗައިނާގެ ބޭންކްތަކަށް ލޯންތައް އަނބުރާ ދެއްކުމަށް މި އަހަރު އެކަނިވެސް 100 މިލިއަން ޑޮލަރަށް ވުރެ ބޮޑު އަދަދެއް ލަންކާއިން ހޭދަކުރަން ޖެހެ އެވެ.
ލަންކާއިން ވަނީ އެއް ބިލިއަން ޑޮލަރުގެ ކްރެޑިޓް ލައިނެއްގައި އިންޑިއާއާ އެކު ވެސް ސޮއިކޮށްފަ އެވެ. އެއީ ޒަރޫރީ ކާބޯތަކެއްޗާއި ބޭސް އިމްޕޯޓް ކުރުމަށެވެ. އޭގެ އިތުރުން އިންޑިއާއިން ތެޔޮ ގަންނަން 500 މިލިއަން ޑޮލަރުގެ ކްރެޑިޓް ލައިނެއް ވެސް އޭގެ ކުރިން ދޫކުރި އެވެ.
