ބޮޑު ވަޒީރު މަހިންދަ ރާޖަޕަކްސަ މަގާމުން އިސްތިއުފާ ދޭން އުޅުއްވާ ކަމަށް ދެކެވޭ ވާހަކަ އަނެއްކާވެސް ދޮގުކޮށްފި އެވެ.
ބޮޑު ވަޒީރުގެ އޮފީހުން ބުނީ ޕާލިމެންޓުގެ މެޖޯރިޓީ އޮތީ އެމަނިކުފާނުގެ ފަޅީގައި ކަމަށާއި އެހެންކަމުން އިސްތިއުފާ ނުދެއްވާނެ ކަމަށެވެ.
މަހިންދަ ރާޖަޕަކްސަ އިސްތިއުފާ ދޭން ނިންމެވި ކަމަށް ވިދާޅުވީ ކުރީގެ މިނިސްޓަރު އުދެޔަ ގައްމަންޕިލަ އެވެ. އޭނާ ވިދާޅުވީ ބޮޑު ވަޒީރު މަގާމުން ދުރު ކުރަން ޕާލިމެންޓުގެ 120 މެމްބަރުން ބޭނުންވާ ކަމަށެވެ.
އެހެންވެ، ބުޑިސްޓް ފާދިރީންނާއި ބައެއް ސިޔާސީ ފަރާތްތަކާ ބައްދަލުކުރެއްވުމަށް ފަހު، އިސްތިއުފާ ދޭން ތައްޔާރަށް ހުންނެވި ކަމަށް މަހިންދަ ރާޖަޕަކްސަ ވިދާޅުވި ކަމަށް އޭނާ ނޫސްތަކަށް މައުލޫމާތު ދެއްވި އެވެ.
މީގެ ކުރިން ވެސް މަހިންދަ ރާޖަޕަކްސަ އިސްތިއުފާ ދޭން އުޅުއްވާ ކަމަށް ހަބަރު ފެތުރުމުން، ބޮޑު ވަޒީރުގެ އޮފީހުން އެކަން ދޮގުކުރި އެވެ.
މަހިންދަ ރާޖަޕަކްސަ ވިދާޅުވެފައި ވަނީ އިންތިގާލީ ސަރުކާރެއް ހެދުމަށް ކަމަށް ބުނެ އިސްތިއުފާ ދޭން އެދުން ބަލައިނުގަނެވޭނެ ކަމަށެވެ.
ސްރީ ލަންކާގެ އިގްތިސާދީ ކާރިސާއާ ގުޅިގެން މުޒާހަރާ ކުރާ އާންމުން ޑިމާންޑް ކުރަނީ ބޮޑު ވަޒީރާއި ރައީސް ގޮތަބަޔާ ރާޖަޕަކްސަގެ އިސްތިއުފާއަށެވެ.
އިންތިގާލީ ސަރުކާރެއް ގާއިމު ކުރުމަށް ރައީސް އާއި ބޮޑު ވަޒީރު ހިމެނޭ ގޮތަށް މުޅި ކެބިނެޓް އިސްތިއުފާ ދިނުމަށް ބައެއް ސިޔާސީ ފަރާތްތަކުން ދަނީ ޕްރެޝަރު ކުރަމުންނެވެ.
ނަމަވެސް މަހިންދަ ރާޖަޕަކްސަ ވިދާޅުވީ އެގޮތަށް އެދުން ބަލައިނުގަނެވޭނެ ކަމަށާއި އެމަނިކުފާނު ހުންނެވީ އިންތިގާލީ ސަރުކާރެއް އިސްވެ ހިންގަވަން ތައްޔާރަށް ކަމަށެވެ.
ކޮލޮމްބޯގައި ހުންނަ ރައީސް އޮފީހުގެ ކުރިމަތީގައި ޓެންޓު ޖަހައިގެން މުޒާހަރާ ކުރަމުންދާ މީހުންނާ ބައްދަލުކޮށް މަޝްވަރާ ކުރުމަށް ތައްޔާރު ކަމަށް ވެސް އެމަނިކުފާނު ތަކުރާރުކޮށް ވިދާޅުވި އެވެ.
ނަމަވެސް މުޒާހަރާގެ ބައިވެރިން މީގެ ކުރިން ބުނީ ބައްދަލުކުރަން ބޭނުން ނޫން ކަމަށާއި އެ މީހުންގެ ޑިމާންޑަކީ ރައީސް އާއި ބޮޑު ވަޒީރުގެ އިސްތިއުފާ ކަމަށެވެ.
އެކަމަކު އެ ދެ ބޭފުޅުން ވެސް ތަކުރާރުކޮށް ވިދާޅުވަމުން ދަނީ ފިއްތުންތައް ކުރިމަތި ކުރުވި ނަމަވެސް، އިސްތިއުފާ ނުދެއްވާނެ ކަމަށެވެ.
