ކޮވިޑް-19 އިންކަމް ސަޕޯޓު ޕްރޮޖެކްޓުގެ ދަށުން އެޕްރެންޓިސްޝިޕް ޕްރޮގްރާމެއް ކުރިއަށް ގެންދިޔުމަށް އިކޮނޮމިކް މިނިސްޓްރީން ފެނަކަ ކޯޕަރޭޝަނާއެކު އެއްބަސްވުމެއްގައި ސޮއިކޮށްފި އެވެ.
މި އެއްބަސްވުމުގެ ދަށުން ފެނަކައިގެ އެޕްރެންޓިސްޝިޕް ޕްރޮގްރާމްގެ ތެރެއިން ވޯޓާ ޕްލާންޓު އެންޑު ސުވަރޭޖު އޮޕަރޭޓާސްގެ އިތުރުން، އިލެކްޓިރިކަލް އިންސްޓޯލޭޝަން އަދި މެއިންޓަނަންސް ދާއިރާއިން މީހުން ތަމްރީނު ކުރާނެ އެވެ.
މި ނޫހަށް މައުލޫމާތު ދެއްވަމުން ފެނަކައިގެ މެނޭޖިން ޑިރެކްޓަރު އަހްމަދު ސައީދު ވަނީ މި ޕްރޮގްރާމްގައި ބައިވެރިވާ ކޮންމެ ކުއްޖަކަށް 5،000ރ. ގެ އެލަވަންސެއް ދޭން ހަމަޖެހިފައިވާކަން ހާމަކުރައްވާފަ އެވެ.
"ފުރަތަމަ ބުރުގައި 90 ކުދިން ތަމްރީނު ކުރާނީ. އިކޮނިމިކް މިނިސްޓްރީގެ ވެބްސައިޓް މެދުވެރުކޮށް އެޕްލައިކުރެވޭނެ. ދެން ސަރުކާރު ހުޅުވުނީމަ، ބަންދަށް ފަހު ހުޅުވުނީމަ (މެއި 8) ކުދިން ނަގަން ފަށާނަން،" މިއަދު މި ނޫހަށް މައުލޫމާތު ދެއްވަމުން ސައީދު ވިދާޅުވި އެވެ.
މިއީ ވަޒީފާގެ ބާޒާރަށް ނުކުންނަ މީހުންނަށް ވާޒިފާގެ މާހައުލަށް ބޭނުންވާނެ ތަމްރީނާއި ހުނަރު ހޯދައިދިނުމުގެ ގޮތުން އިކޮނޮމިކް މިނިސްޓްރީން ކުރިއަށްގެންދާ ޕްރޮޖެކްޓުގެ ބައެކެވެ.
އެ މިނިސްޓްރީން ވަނީ ފެނަކައިގެން އިތުރުން، އެމްއޭސީއެލް، އެމްޓީސީސީ އަދި ވެމްކޯ އާއި އެޗްޑީސީ އާއެކު ވެސް އެޕްރެންޓިސްޝިޕް ޕްރޮގްރާމް ކުރިއަށް ގެންދަން އެއްބަސްވެފަ އެވެ.
