ސްރީލަންކާގެ އިގްތިސާދީ ކާރިސާ ގޯސްވަމުން ދާތީ މުޒާހަރާ ކުރަމުންދާ ޔުނިވާސިޓީ ދަރިވަރުން އާދީއްތަ ދުވަހު ބޮޑު ވަޒީރު މަހިންދަ ރާޖަޕަކްސަގެ އިސްތިއުފާއަށް ޑިމާންޑުކޮށް އެމަނިކުފާނުގެ ގެކޮޅު ކައިރިއަށް އެއްވެއްޖެ އެވެ.
ރެކޯޑް މިންވަރަށް އިންފްލޭޝަން މަތިވެ، ތެލާއި ކާބޯތަކެއްޗާއި ބޭހުގެ ދަތިކަން ކުރިމަތިވެ، ކޮންމެ ދުވަހަކު ވެސް ކަރަންޓު ކަނޑަމުން ދާތީ ރުޅިގަދަވެފައި ތިބި އާންމުން މަގުތަކަށް ނުކުމެ މުޒާހަރާ ކުރަމުންދާތާ ހަފްތާތަކެއް ވެއްޖެ އެވެ.
މިއީ 1948 ވަނަ އަހަރު އިނގިރޭސިންގެ އަތުން މިނިވަންކަން ލިބުނު ފަހުން ލަންކާއަށް ކުރިމަތިވި އެންމެ ބޮޑު އިގްތިސާދީ ކާރިސާ އެވެ.
ބޮޑު ވަޒީރުގެ ގެކޮޅު ކައިރިއަށް އާދީއްތަ ދުވަހު އެއްވި ދަރިވަރުން ވަނީ ފުލުހުންގެ ބެރިކޭޑްތައް މަތިން އަރައިގެން، ގޭގެ ގޯތި ތެރެއަށް ވަންނަން މަސައްކަތް ކޮށްފަ އެވެ. ފުލުހުން ވަނީ މުޒާހަރާ ފެތުރުން ހުއްޓުވުމުގެ ގޮތުން ގިނަ މަގުތަކެއް ވެސް ބަންދުކޮށްފަ އެވެ.
ފުލުހުން ބުނީ މުޒާހަރާގެ ބައިވެރިން ޖަމާވި ވަގުތު މަހިންދަ ރާޖަޕަކްސަ ގެކޮޅުގައި ނޫޅުއްވާ ކަމަށާއި މާ ގިނައިރުތަކެއް ނުވެ މުޒާހަރާގެ ބައިވެރިން ވެސް ސުލްހަވެރިކަމާ އެކު ދުރަށް ޖެހުނު ކަމަށެވެ.
ބޮޑު ވަޒީރުގެ އިތުރުން، އެމަނިކުފާނުގެ ކޮއްކޯފުޅު ރައީސް ގޮތަބަޔާ ރާޖަޕަކްސަގެ އިސްތިއުފާއަށް ވެސް އާންމުން ދަނީ ޑިމާންޑް ކުރަމުންނެވެ. ރައީސް އޮފީސް ބޭރުގައި އެތައް ހާސް ބަޔަކު ޓެންޓު ޖަހައިގެން ތިބޭތާ މިހާރު ދެ ހަފްތާއަށް ވުރެ ގިނަ ދުވަސް ވެއްޖެ އެވެ.
