އެމްޑީޕީގެ ޗެއާޕާސަން ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ކުރައްވާ ކެމްޕޭންގައި އިސްކޮށް އުޅުއްވާ، ގަލޮޅު އުތުރު ދާއިރާގެ މެމްބަރު އަދި މަޖިލީހުގެ ނައިބު ރައީސް އީވާ އަބްދުﷲ އަށް ރައީސް އިބްރާހީމް މުހައްމަދު ސޯލިހުގެ އުފަން ރަށް، ޅ. ހިންނަވަރުން ބަޔަކު ހުރަސް އެޅި ކަމަށް ބެލެވިއްޖެ އެވެ.
އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް މަޖިލީހުގެ ރައީސް މުހައްމަދު ނަޝީދު ފޮނުއްވި މެސެޖެއްގައި ވިދާޅުވީ އީވާ ހިންނަވަރަށް ވަޑައިގެންނެވުމުން "ބަޔަކު ފޮނުވައިގެން "ބޭވީ" ކަމަށެވެ. އެ މެސެޖްގައި އެމަނިކުފާނު ހަގީގަތުގައި ވިދާޅުވީ "ބޭލީ"އޭ ކަމެއް ނުވަތަ "ބެވީ" އޭ ކަމެއް ސާފެއް ނުވެ އެވެ.
"ދެން އިބޫއަށް ގަލޮޅުން އެހެން ހަދަންވީތަ؟" ވަޓްސްއެޕް ގްރޫޕަށް ފޮނުއްވި މެސެޖްގައި ރައީސް ނަޝީދު ވިދާޅުވި އެވެ.
އެކަން ހިނގައި ދިޔަ ގޮތް އޮޅުން ފިލުވަން އީވާއާ ގުޅަން ކުރި މަސައްކަތް ކާމިޔާބެއް ނުވި އެވެ. މެސެޖަކަށް ވެސް ޖަވާބެއް ނުދެއްވަ އެވެ.
އިމްތިޔާޒްގެ ކެމްޕޭން ޓީމުގެ ތަރުޖަމާން އަދި މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވީ އެކަމާ ބެހޭ ގޮތުން ކޮމެންޓެއް ކުރައްވަން އެދިވަޑައިނުގަންނަވާ ކަމަށެވެ.
"އޭގައި ތާށިވެފައި ތިބޭކަށް ބޭނުމެއް ނޫން. އަޅުގަނޑުމެންގެ މުޅި ފޯކަސް މިހިރީ އިންތި ކެމްޕޭން ބާރަށް ކުރިއަށް ގެންދިއުމަށް،" އޭނާ ވިދާޅުވި އެވެ.
ވަހީދުގެ ވާހަކައިން ވެސް އެނގުނު ގޮތުގައި ހިންނަވަރުގައި އިމްތިޔާޒްގެ ކެމްޕޭންޓީމާ ދެކޮޅަށް ބަޔަކު ކަންތައްތަކެއް ކުރި އެވެ. އެކަމަކު ކުރީ ސީދާ ކޮން ކަމެއްކަން ސާފެއް ނުވެ އެވެ.
