އެމްޓީސީސީގެ ފައިދާއިން ހިއްސާއަކަށް 3.50 ރުފިޔާ ބަހާގޮތަށް ހުށަހަޅަން އެ ކުންފުނީގެ ބޯޑުން ނިންމައިފި އެވެ.
އެމްޓީސީސީއަށް މިދިޔަ އަހަރު ސާފު ފައިދާގެ ގޮތުގައި 224 މިލިއަން ރުފިޔާ ލިބުނެވެ. މީގެ ތެރެއިން ޓެކުހަށް ކެނޑުމަށްފަހު ބާކީވީ 44 މިލިއަން ރުފިޔާ އެވެ. ހިއްސާގެ ފައިދާގެ ގޮތުގައި ބަހަނީ، 28.1 މިލިއަން ރުފިޔާ އެވެ.
ބޯޑުގެ ނިންމުން އަހަރީ އާންމު ޖަލްސާގައި ފާސްކުރާނީ ކުންފުނީގެ ހިއްސާދާރުންނެވެ.
އެމްޓީސީސީން ކުރިން ކުރި އިއުލާނެއްގައިވާ ގޮތުގައި މި ޖަލްސާގައި ބައިވެރިވެވޭނީ އޭޕްރިލް 18 ގެ ކުރިން ރަޖިސްޓްރީކޮށްފައިވާ ހިއްސާދާރުންނަށެވެ. މި މުއްދަތުގެ ކުރިން ރަޖިސްޓްރީކޮށްފައިވާނަމަ ހިއްސާގެ ފައިދާ ވެސް ލިބޭނެ އެވެ.
މިދިޔަ އަހަރަކީ އެމްޓީސީއަށް ހުރިހާ ގޮތަކުން ވެސް ރަނގަޅު އަހަރެކެވެ. އެ ކުންފުންޏަށް ލިބުނު ޖުމުލަ ފައިދާއަކީ ކުންފުނީގެ 41 އަހަރުގެ ދިގު ތާރީހުގައި ރެކޯޑެކެވެ. ނަމަވެސް ސާފު ފައިދާ އޭގެ ކުރީ އަހަރަށް ވުރެ ކުޑަ އެވެ.
އުމްރާނީ ތަރައްގީގައި މުހިންމު ރޯލެއް އަދާކުރާ އެމްޓީސީސީގެ މައިގަނޑު ވިޔަފާރިއަކީ ބޮޑެތި ހާބަރާއި އެއާޕޯޓުތައް ފަދަ ބޮޑެތި ކޮންސްޓްރަކްޝަން ޕްރޮޖެކްޓުތަކާއި ޑްރެޖިން އަދި ބިން ހިއްކުމުގެ އިތުރުން ޓްރާންސްޕޮޓޭޝަނާއި މެރިން އިންޖިއަނިއަރިން އެވެ.
