ބައިނަލްއަގްވާމީ ޑީލްތައް ހޯދަން ޗައިނާއިން ރިޝްވަތު ދޭ ކަމަށް އޮސްޓްރޭލިއާގެ ޑިފެންސް މިނިސްޓަރު ޕީޓާ ޑަޓަން ތުހުމަތު ކުރައްވައިފި އެވެ.
ޗައިނާއިން ދާދި ފަހުން ވަނީ ޕެސިފިކް ކަނޑުގައި އޮންނަ ސޮލޮމޮން އައިލެންޑްސްއާ އެކު ޑިފެންސް އެއްބަސްވުމެއްގައި ސޮއިކޮށްފަ އެވެ.
ސޮލޮމޮން އައިލެންޑްސްއަކީ ޒަމާނުއްސުރެ އެމެރިކާ އާއި އޮސްޓްރޭލިއާއާ ގާތް ގުޅުމެއް ބާއްވާ ގައުމެކެވެ. އެހެންވެ، ޗައިނާއާ އެކު އެފަދަ އެއްބަސްވުމެއްގައި ސޮއިކުރުމުން އެ ދެ ގައުމަށް ހައިރާންކަން ލިބުނެވެ.
އޮސްޓްރޭލިއާއާ އެންމެ 2000 ކިލޯމީޓަރު ދުރުގައި އޮންނަ ސޮލޮމޮން އައިލެންޑްސްއާ އެކު ޗައިނާއިން އެފަދަ އެއްބަސްވުމަކަށް ދިޔުމުން، ޕެސިފިކް ކަނޑުގައި ޗައިނާގެ އަސްކަރީ ނުފޫޒު ފެތުރުމުގެ ބިރު އެބަ އޮތެވެ.
"ޗައިނާއިން އަޅުގަނޑުމެން ގަބޫލު ކުރާ އުސޫލުތަކަކަށް ނުބަލާ. އެފްރިކާގައި ކަން ހިނގި ގޮތަށް ބަލައިފި ނަމަ، ފެންނާނެ ކޮރަޕްޝަން އޮތް މިންވަރު،" ޑަޓަން ސްކައި ނިއުސްއަށް ވިދާޅުވި އެވެ.
"އެކަހަލަ އުސޫލުތައް ގެންގުޅޭ ބަޔަކާ އަޅުގަނޑުމެންނަށް ދުވަހަކު ވެސް ވާދައެއް ނުކުރެވޭނެ. އަޅުގަނޑުމެން ގަބޫލުކުރާ ގޮތްތަކެއް ހުރޭ އަދި އަޅުގަނޑުމެން އަމަލު ކުރާ ގާނޫނުތަކެއް ހުރޭ."
އެހެން ނަމަވެސް ސޮލޮމޮން އައިލެންޑްސްއާ އެކު ސޮއިކުރި އެއްބަސްވުމެއްގައި ކޮރަޕްޝަން ހިމެނޭ ކަމަށް އޭނާ ސީދާ ވިދާޅެއް ނުވެ އެވެ.
"މިއަދުގެ ހަގީގަތަކީ ޗައިނާ ބަދަލުވެއްޖެކަން. ބޭރުގެ ކަންކަމަށް ނުފޫޒު ފޯރުވަން ޖެހިލުމެއް ނުވާނެ. އެހެން ގައުމުތައް ފަހަތަށް ޖައްސައި ޑީލްތައް ހޯދަން ރިޝްވަތު ވެސް ދޭނެ. މިއަދުގެ ޗައިނާގެ ހަގީގަތަކީ އެއީ."
ސޮލޮމޮން އައިލެންޑްސް އާއި ޗައިނާ ސޮއިކުރި އެއްވަސްވުމުގެ ޑްރާފްޓެއް މިދިޔަ މަހު ލީކުވި އިރު، އޭގައިވާ ގޮތުން ޗައިނާ ކަނޑުގެ ސިފައިންނަށް ސޮލޮމޮން އައިލެންޑްސްގައި ތިބެވޭނެ އެވެ.
އެހެންވެ، އެމެރިކާގެ ވަފުދެއް މިދިޔަ ހުކުރު ދުވަހު ސޮލޮމޮން އައިލެންޑްސްގެ ވެރިރަށް ހޮނިއަރާއަށް ދަތުރުކޮށް، ޗައިނާގެ ދާއިމީ އަސްކަރީ ނުފޫޒު އެ ތަނުގައި ބޭއްވުމާ ދެކޮޅަށް އިންޒާރު ދިނެވެ.
