ޕެރިސް (އޭޕްރީލް 23) - ފްރެންޗް ލީގުގައި މިރޭ ލެންސާ 1-1 އިން އެއްވަރުވި ނަމަވެސް ޕީއެސްޖީން 10 ވަނަ ފަހަރަށް ފްރެންޗް ލީގުގެ ޗެމްޕިއަންކަން ހޯދައި ރެކޯޑަކާ ހަމަކޮށްފި އެެވެ.
ބާކީ ހަތަރު މެޗު އޮއްވައި ޕީއެސްޖީން ފްރެންޗް ލީގުގެ ޗެމްޕިއަންކަން ހޯދުމާ އެކު އެ ޓީމުން ވަނީ ސެއިން އެޓިއެންގެ ކާމިޔާބީގެ ރެކޯޑާ ހަމަކޮށްފަ އެވެ. ދެ ޓީމުން ވެސް ވަނީ ޖުމްލަ 10 ފަހަރު ފްރެންޗް ލީގު ޗެމްޕިއަންކަން ހޯދައިފަ އެވެ.
މިއީ ގަތަރުގެ މަހުޖަނު ނާސިރު އެލް ހެއްލާފީ ޕީއެސްޖީއާ ހަވާލުވި ފަހުން އެ ޓީމުން ލީގު ކާމިޔާބުކުރި އަށް ވަނަ ފަހަރެވެ. އަދި މިިދިޔަ 10 އަހަރު ތެރޭ ލީގު ކާމިޔާބުކުރާ އަށް ވަނަ ފަހަރު ވެސް މެ އެވެ. ޕީއެސްޖީ އޮތީ ލީގުގެ ދެ ވަނައިގައި އޮތް މާސޭ އަށް ވުރެ 16 ޕޮއިންޓް ކުރީގަ އެވެ. ޕީއެސްޖީ އަށް 34 މެޗުން 78 ޕޮއިންޓް ލިބިފައިވާއިރު، މާސޭގެ އޮތީ 33 މެޗުން 62 ޕޮއިންޓެވެ.
މިރޭ ޕީއެސްޖީ ދަނޑުގައި ކުޅުނު މެޗުގެ ފުރަތަަމަ ހާފުގައި އެ ޓީމަށް ލަނޑު ޖަހައިދޭން ކީލިއަން އެމްބާޕޭ، އަޝްރަފް ހަކީމީ އަދި ނޭމާ އަށް ލިބުނު ފުރުސަތުތަކުގައި ގޯލަށް ބޯޅަ ފޮނުވާލެވޭ ގޮތެއްނުވި އެވެ.
ލެންސް ޓީމުގެ ޑިފެންޑަރު ކެވިން ޑަންސޯ އަށް މެޗުގެ 58 ވަަނަ މިނިޓްގައި ދެ ވަނަ ރީނދޫ ކާޑާ އެކު ރަތް ކާޑެއް ދެއްކުމުން މެޗުގެ ފަހު 35 ވަރަކަށް މިނިޓް އެ ޓީމުން ކުޅުނީ އެއް ކުޅުންތެރިއަކު މަދުކޮށެެވެ.
ލެންސްގެ ކުޅުންތެރިއަކު މަދުވިތާ މާގިނައިރެއްނުވެ، ޕީއެސްޖީން ގޯލު ޖެހި އެވެ. ޕީއެސްޖީ އަށް ލީޑުނަގައިިދިނީ އަނިޔާ އަށް ފަހު މިރޭ ޓީމަށް އެނބުރި އައި ލިއޮނަލް މެސީ އެވެ. މެޗުގެ 68 ވަނަ މިނިޓްގައި ނޭމާ ދިން ބޯޅައަކުން އޭރިއާބޭރުން މެސީ ފޮނުވާލި ޝޮޓް އަމާޒުވީ ގޯލުގެ މަތީ ކަނަށެެވެ.
އެއް ކުޅުންތެރިއަކު މަދުކޮށް ކުޅެން ޖެހުނު ނަމަވެސް ލެންސުން ވަނީ ހިތްވަރުކޮށް މެޗުގެ 88 ވަނަ މިނިޓްގައި އެއްވަރުކޮށްފަ އެވެ. ޕީއެސްޖީ ސިއްސުވާލުމަށް ފަހު މި ގޯލު ޖެހީ ކޮރެންޓީން ޖީން އެވެ.
މިރޭގެ ނަތީޖާއާ އެކު މިއީ ޕީއެސްޖީ ކޯޗަކަށް ހުރި އާޖެންޓީނާގެ މައުރީސިއޯ ޕޮޗެޓީނޯގެ ކޯޗިން ކެރިއަރުގައި ލީގެއް ކާމިޔާބު ކުރެވުނު ފުރަތަމަ ފަހަރެވެ. އަނެއްކޮޅުން، ޕީއެސްޖީގެ ތަރި މެސީ މި ވަނީ އޭނާގެ ކެރިއަރުގައި ފުރަތަމަ ފަހަރަށް ސްޕެނިޝް ލީގު ނޫން ލީގެއް ކާމިޔާބުކޮށްފަ އެެވެ. މެސީ ވަނީ ބާސެލޯނާއާ އެކު 10 ފަހަރު ސްޕެނިޝް ލީގުގެ ޗެމްޕިއަންކަން ހޯދައިފަ އެވެ.
