ސީރިއާއަށް ދަތުރު ކުރާ ރަޝިއާގެ ހުރިހާ މަތިންދާ ބޯޓަކަށް ތުރުކީގެ ވައިގެ ސަރަހައްދު ބަންދުކޮށްފައިވާ ކަމަށް އެ ގައުމުގެ ފޮރިން މިނިސްޓަރު މެވްލުތް ކަވުސޮގްލޫ ވިދާޅުވެއްޖެ އެވެ.
މިއީ ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން، ތުރުކީއިން މިހާތަނަށް ރަޝިއާއާ މެދު އެޅި އެންމެ ހަރުކަށި ފިޔަވަޅެވެ. ތުރުކީއަކީ ޒަމާނުއްސުރެ ރަޝިއާ އާއި ޔޫކްރެއިންއާ ވެސް ގާތް ގައުމެކެވެ.
ކަވުސޮގްލޫ ވިދާޅުވީ ތުރުކީގެ ނިންމުން ރަޝިއާގެ ފޮރިން މިނިސްޓަރު ސާގެއި ލެވްރޯވްއަށް އެންގުމަށް ފަހު، ރަޝިއާގެ ރައީސް ލެޑިމިއަ ޕުޓިންއަށް އަންގާފައިވާ ކަމަށެވެ.
"ދެ ތިން ދުވަސް ފަހުން ރަޝިއާއިން އަޅުގަނޑުމެންނަށް އެންގި، ޕުޓިން އަމުރެއް ނެރުއްވައިފި ކަމަށް. އެހެންވީމާ، ދެން ރަޝިއާއިން މި ސަރަހައްދަކަށް ނުވަންނާނެ،" އޭނާ ވިދާޅުވި އެވެ.
ކަވުސޮގްލޫ ވިދާޅުވީ އެ ނިންމުން ކުރިއަށް އޮތް ތިން މަހަށް ދެމި އޮންނާނެ ކަމަށެވެ. ތުރުކީގެ ނިންމުމާ ގުޅިގެން ރަޝިއާއިން އަދި ވަކި އެއްޗެއް ނުބުނެ އެވެ.
ރަޝިއާ އާއި ޔޫކްރެއިންއާ ދެމެދު ސުލްހައިގެ މަޝްވަރާގެ ދެ ބުރު މިހާތަނަށް ތުރުކީގައި ބާއްވާފައިވެ އެވެ. ނަމަވެސް އެދެވޭ ކުރިއެރުމެއް ނުލިބެ އެވެ.
ސީރިއާގެ ދާހިލީ ހަނގުރާމައިގައި އެ ގައުމުގެ ރައީސް ބައްޝާރުލް އަސަދުގެ ސަރުކާރަށް އެންމެ ބޮޑަށް ތާއީދު ކުރާ އެއް ގައުމަކީ ރަޝިއާ އެވެ.
