އިންތިގާލީ ސަރުކާރެއް ހެދުމަށް ކަމަށް ބުނެ އިސްތިއުފާ ދޭން އެދުން ބަލައިނުގަނެވޭނެ ކަމަށް ސްރީ ލަންކާގެ ބޮޑު ވަޒީރު މަހިންދަ ރާޖަޕަކްސަ ވިދާޅުވެއްޖެ އެވެ.
ސްރީ ލަންކާގެ އިގްތިސާދީ ކާރިސާއާ ގުޅިގެން މުޒާހަރާ ކުރާ އާއްމުން ޑިމާންޑް ކުރަނީ ބޮޑު ވަޒީރާއި ރައީސް ގޮތަބަޔާ ރާޖަޕަކްސަގެ އިސްތިއުފާއަށެވެ.
އިންތިގާލީ ސަރުކާރެއް ގާއިމް ކުރުމަށް ރައީސް އާއި ބޮޑު ވަޒީރު ހިމެނޭ ގޮތަށް މުޅި ކެބިނެޓް އިސްތިއުފާ ދިނުމަށް ބައެއް ސިޔާސީ ފަރާތްތަކުން ދަނީ ޕްރެޝަރު ކުރަމުންނެވެ.
ނަމަވެސް މަހިންދަ ރާޖަޕަކްސަ ވިދާޅުވީ އެގޮތަށް އެދުން ބަލައިނުގަނެވޭނެ ކަމަށާއި އެމަނިކުފާނު ހުންނެވީ އިންތިގާލީ ސަރުކާރެއް އިސްވެ ހިންގަން ތައްޔާރަށް ކަމަށެވެ.
ކޮލޮމްބޯގައި ހުންނަ ރައީސް އޮފީހުގެ ކުރިމަތީގައި ޓެންޓު ޖަހައިގެން މުޒާހަރާ ކުރަމުންދާ މީހުންނާ ބައްދަލުކޮށް މަޝްވަރާ ކުރުމަށް ތައްޔާރު ކަމަށް ވެސް އެމަނިކުފާނު އަނެއްކާ ވެސް ވަނީ ވިދާޅުވި އެވެ.
ނަމަވެސް މީގެ ކުރިން މުޒާހަރާގެ ބައިވެރިން ބުނީ ބައްދަލުކުރަން ބޭނުން ނޫން ކަމަށާއި އެ މީހުންގެ ޑިމާންޑަކީ ރައީސް އާއި ބޮޑު ވަޒީރުގެ އިސްތިއުފާ ކަމަށެވެ.
އެކަމަކު އެ ދެ ބޭފުޅުން ވެސް ތަކުރާރުކޮށް ވިދާޅުވަމުން ދަނީ ފިއްތުންތައް ކުރިމަތި ކުރުވި ނަމަވެސް، އިސްތިއުފާ ނުދެއްވާނެ ކަމަށެވެ.
