ފުޓްބޯޅައިގެ ހަރަކާތްތަކުން ސަސްޕެންޑްކޮށްފައިވާ ރާއްޖޭގެ ފުޓްބޯޅައިގެ ގަދަބާރު، ވިކްޓަރީ ސްޕޯޓްސް ކްލަބް އަލުން ފުޓްބޯޅަ އަށް ނެރުމަށް ކުރަން ޖެހޭ މަސައްކަތްތައް ކުރަން ފަށައިފި އެވެ.
ވިކްޓަރީން ކުޅުންތެރިންނާއި ކޯޗުންނަށް ނުދީ ހުރި މުސާރަ ދޭށާއި ކްލަބް ލައިސަންސްގެ ކަންކަން ފުރިހަމަކުރަން އެފްއޭއެމުން ދިން މުއްދަތުގައި އެކަންކަންކޮށްފައި ނުވާތީ އެ އެސޯސިއޭޝަނުން އެ ކްލަބް ސަސްޕެންޑްކުރީ 2019 ވަނަ އަހަރުގެ ޑިސެމްބަރު މަހުގެ ތެރޭގަ އެވެ. ވިކްޓްރީން މުސާރަ ނުދޭ ދިވެހި ކުޅުންތެރިންނާއި ބިދޭސީ ކުޅުންތެރިންގެ މައްސަލަ އެފްއޭއެމާއި ފީފާގައި އެބައޮތެވެ.
މިދިޔަ މަހު ވިކްޓްރީގެ ޗެއާޕާސަންގެ މަގާމުން ޑރ. އިބްރާހިމް ނާޝިދު (ނާޝް) އާއި ބޯޑުގެ ބައެއް މެމްބަރުން އިސްތިއުފާ ދެއްވައިފަ އެވެ. މި މަހު 29 ވަނަ ދުވަހު ވިކްޓްރީގެ އިންތިހާބު ބާއްވަން މަސައްކަތްކުރަމުން އަންނައިރު، އެކަންކަން ބެލެހެއްޓުމަށް އިންޓަރިމް ޗެއާމަނެއްގެ ގޮތުގައި ހަވާލުވެހުރީ ކުރިން ވިކްޓަރީ އަށް ކޯޗުކޮށްދިން މުހައްމަދު އާދަމް އެވެ.
ވިކްޓަރީން 2018 ވަނަ އަހަރު ބޭއްވި އެ ކްލަބްގެ އިންތިހާބުގައި ބޯޑަށް އިންތިހާބުވި މެމްބަރުން.
މިއަދު "އަދަދު" އިން ކުރި ސުވާލަކަށް މުހައްމަދު ބުނީ ވިކްޓަރީ އަލުން ގެނެވޭތޯ ކުރާ މަސައްކަތުގައި ފުރަތަމަ ކުރަން ޖެހޭ ކަމަކީ ކްލަބްގެ ހިންގާ ބޯޑު އިންތިހާބު ކުރުން ކަމަށެވެ. އަދި މި މަހު 29 ވަނަ ދުވަހު ބާއްވާ އިންތިހާބަށް އަދި އެއްވެސް ފަރާތަކުން ކުރިމަތިނުލާ ކަމަށް ވެސް މުހައްމަދު ވަނީ ބުނެފަ އެވެ.
"އަޅުގަނޑުމެން އެފްއޭއެމާ ވާހަކަ ދައްކައިގެން ހޯދި ހޯދުމުން އެނގެން އޮތީ ހައެއް ނޫނީ ހަތް ލައްކަ ރުފިޔާއޭ މި އުޅެނީ ކްލަބް އެކްޓިވް ހާލަތަށް އަންނަން ނުދެއްކި. ދެން ފީފާގައި އޮތް ބޭރު ކުޅުންތެރިންގެ މުސާރައިގެ މައްސަލަ ހައްލުކޮށްފައި، ދެން މި ކްލަބުން މުސާރަ ނުދެވި ހުރި ދިވެހި ކުޅުންތެރިންނާ އެކު ފައިސާ ދެވޭނެ ގޮތުގެ އެއްބަސްވުންތަކެއް ހެދޭތޯ މި ބަލަނީ. ފުރަތަމަ ކަމަކަށް އިންތިހާބު މި އޮތީ، އެކަން މި ބަލަނީ،" އެންމެ ފަހުން ވިކްޓަރީ ލީގުގައި ވާދަކުރިއިރު ކޯޗުކަން ކުރި މުހައްމަދު ބުންޏެވެ.
ވިކްޓަރީގެ މަގާމުތަކަށް ކުރިމަތިލުމުގެ މުއްދަތު ހަމަވާނީ މި މަހު 28 ވަނަ ދުވަހަށެވެ. އިންތިހާބު އޮތީ އޭގެ އަނެއް ދުވަހުގަ އެވެ.
ވިކްޓަރީން، 2019/2020 ލީގު މެޗުތަކަށް ހާޒިރުނުވާ މައްސަލަ އާއި ކުޅުންތެރިންނާއި ކޯޗުންނަށް ދޭން ޖެހޭ މުސާރަ ނުލިބިގެން އެ ފަރާތްތަކުން ހުށަހަޅާފައިވާ މައްސަލަ އާއި ކްލަބް ލައިސަންސްއާ ގުޅޭ ގޮތުން ހަމަކުރަން ޖެހޭ ލިޔެކިޔުންތައް ހަމަކޮށްފައިނުވާތީ އެފްއޭއެމުން ތަކުރާރުކޮށް ދިން އިންޒާރާ އެއްގޮތަށް އަމަލުނުކުރާތީ އެންމެ ފަހުން އެ ކްލަބް ސަސްޕެންޑްވީ އެވެ.
ސަސްޕެންޑްކުރިއިރު، ވިކްޓަރީން ތުހުމަތުކުރީ އެ އަދަބަކީ އެ ކްލަބުން އިސްވެ، އެފްއޭއެމްގެ ލީޑަޝިޕް ބަދަލުކުރަން މަސައްކަތްކުރާތީ ކުރި ކަމެއް ކަމަށެވެ.
މިހާރު އޮތްގޮތުން ވިކްޓަރީން މި މަސް ތެރޭ އިންތިހާބެއް ބާއްވައިގެން އާ ބޯޑުގެ ދަށުން ކްލަބް ހިންގަން ފަށައިގެން ކްލަބްގެ ސަސްޕެންޝަން އުވާލެވިދާނެ އެވެ. އެއީ ކުޅުންތެރިންނަށް ދޭން ޖެހޭ ފައިސާގެ ކަންކަމާ ގުޅޭގޮތުން އެއްބަސްވުންތަކެއް ހަދައި ކްލަބް ލައިސަންސްގެ ކަންކަން ފުރިހަމަކޮށްގެންނެވެ. އޭރުން، މި އަހަރުގެ ދެ ވަނަ ޑިވިޝަން ފުޓްބޯޅަ މުބާރާތުގައި ވިކްޓްރީ އަށް ވާދަކުރެވިދާނެ ކަމަށް އެފްއޭއެމުން މައުލޫމާތު ދެ އެވެ.
