ދިއެފްއެމް ރޭޑިއޯގެ ކުރީގެ ސީއީއޯ އަދި މޯލްޑިވްސް މީޑިއާ ކައުންސިލުގެ ކުރީގެ މެންބަރު މަސްއޫދު ހިލްމީއަށް ހަމަލާ ދޭ މަންޒަރު ވީޑިއޯ ފުޓޭޖުން ފެންނަ މީހާގެ މައްޗަށް ކުށް ސާބިތު ނުވާ ކަމަށް ލ. ފޮނަދޫ މެޖިސްޓްރޭޓް ކޯޓުން އިއްޔެ ހުކުމް ކޮށްފި އެވެ.
މިދިޔަ އަހަރުގެ އޮގަސްޓް މަހުގެ ރޭގަނޑު ވަގުތެއްގައި މަސްއޫދު އޭނާގެ އަނބިމީހާއެކު ފޮނަދޫގައި ސައިކަލެއްގައި ދަނިކޮށް، އެހެން ސައިކަލެއްގައި އައިސް މަސްއޫދާ އަރާ ހަމަކޮށް ދަގަނޑުބުރިއަކުން އޭނާގެ އަތުގައި ޖެހި މައްސަލައިގައި ދައުވާ އުފުލީ ލ. ފޮނަދޫ، ދިލްކުސާގެ، އަހްމަދު ޝަމީމްގެ މައްޗަށެވެ.
ޝަމީމްގެ މައްޗަށް ދައުލަތުން ކުރާ ދައުވާއަކީ ތޫނު އެއްޗެއް ބޭނުންކޮށްގެން މަރާމާރީ ހިންގުމުގެ ކުށުގެ ދައުވާ އެވެ. ގާނޫނުގައި އަސާސީ އަދަބެއްގެ ގޮތުގައި ހަތް އަހަރާއި ދެ އަހަރާ ދެމެދުގެ ޖަލު ހުކުމެއް އޮންނަ އެ ދައުވާގެ ޝަރީއަތަށް ދައުލަތުން 11 ހެކިން ހުށަހެޅި އެވެ.
ވީޑިއޯ ފުޓޭޖު ހިމެނޭހެން 11 ހެއްކެއް ދައުލަތުން ހުށަހެޅިއިރު، އޭގެ ތެރެއިން ގިނަ ހެކި ބަލައިނުގަންނަން ޝަރީއަތުން ނިންމި އެވެ. ދިފާއުގައި އޭރު އޭނާ އެ ވަގުތު ހުރީ ކޮންމެ ވެސް ގެއެއްގައި ކަން ސާބިތު ކުރަން ވެގެން ޝަމީމް ހުށަހެޅި ހަތަރު ހެކިންގެ ބަސް ނަގާފައިވެ އެވެ.
ފޮނަދޫ ކޯޓުން އެ މައްސަލަ ބެއްލެވި ލ. ޖުޑީޝަލް ދާއިރާގެ މެޖިސްޓްރޭޓް އަލީ ޝަރީފް ކުރެއްވި ހުކުމުގައިވާ އޮތީ، އަނިޔާވީ މަސްއޫދުގެ ކަނާއަތަށް ކަމަށް ދައުލަތުން ހުށަހެޅި ލިޔެކިއުންތަކުން ފެންނަން އޮތް ނަމަވެސް މެޑިކަލް ރިޕޯޓް ތައްޔާރު ކުރި ޑޮކްޓަރު ބުނީ އަނިޔާވީ މަސްއޫދުގެ ވައަތަށް ކަމަށެވެ.
މަސްއޫދުގެ އަނބިމީހާގެ ފޯނު ފުލުހުން ހުޅުވާފައިވަނީ ކޯޓު އަމުރަކާ ނުލާތީ އެ ވީޑިއޯ ވެސް ބަލައިނުގަތުމަށް މެޖިސްޓްރޭޓް ނިންމެވި އެވެ. އެހެންވެ ވީޑިއޯ އެންޑް އިމޭޖް އެނަލިސިސް ރިޕޯޓާއި އެ ރިޕޯޓް ތައްޔާރު ކުރި އޮފިސަރުންގެ ހެކި ބަސް ވެސް ބަލައިނުގަންނަން ނިންމި އެވެ.
މަސްއޫދުގެ އަނބިމީހާގެ ހެކިބަސް ވެސް ބަލައިނުގަނެވޭނެ ކަމަށް މެޖިސްޓްރޭޓް ނިންމެވި އެވެ. ސަބަބަކީ މަސްއޫދުއާއި ގާތް މީހަކަށްވެ މަސްލަހަތު ފުށު އަރާ ހެކި ބަހަކަށް އޭނާގެ ހެކި ބަސް ވާނެތީ ކަމަށް ހުކުމުގައިވެ އެވެ.
މީގައި މަސްއޫދުގެ ފަރާތުން ހެކިބަސް ދެވުނީ އޭނާއަށް އެކަންޏެވެ. ދައުވާ ރައްދުވާ ޝަމީމްގެ ފަރާތުން ހެކިބަސް ދިން ހަތަރު މީހުން ވެސް އޭނާ އެ ވަގުތު ގެއެއްގައި ސިޓިން ރޫމު ސާމާނުތަކެއް ރާވަން ހުރި ކަމަށް ބުނުމުން ޝަރީއަތުން ބުރަވީ ޝަމީމްގެ ކޮޅަށެވެ. އަދި ދައުވާ ސާބިތު ނުވާ ކަމަށް ނިންމެވީ އެވެ.
