އިސްލާމިކް ސްޓޭޓް (އައިއެސް) އިން ބުރާސްފަތި ދުވަހު އަފްގާނިސްތާނުގައި ދިން ހަތަރު ހަމަލާއެއްގައި ގިނަ ބަޔަކު މަރުވެއްޖެ އެވެ.
އެންމެ ފުރަތަމަ ބޮން ގޮއްވާލީ މަޒަރީ ޝަރީފްގައި ހުންނަ ޝިއައީ މިސްކިތެއްގަ އެވެ. ހަމަލާ ދިނީ ނަމާދު ކުރަން ގިނަ ބަޔަކު ޖަމާއަތް ހެދި ވަގުތާ ދިމާކޮށްފަ އެވެ.
އައިއެސްއިން ބުނީ އެއީ ގްރޫޕްގެ ކުރީގެ ލީޑަރު އަދި ތަރުޖަމާން މަރާލާފައި ވާތީ ބަދަލު ހިފުމުގެ ގޮތުން ބައިނަލްއަގްވާމީ ފެންވަރުގައި ހިންގާ ކެމްޕެއިންގެ ބަޔެއް ކަމަށެވެ.
އެ ހަމަލާގައި 31 މީހުން މަރުވެ، 87 މީހުންނަށް އަނިޔާވި އެވެ.
އޭގެ އިތުރުން ކުންދޫޒްގެ ފުލުހުންގެ ސްޓޭޝަން ކައިރީގައި އުޅަނދެއް ގޮއްވާލި ހާދިސާގެ ޒިންމާ ވެސް އުފުލީ އައިއެސްއިންނެވެ. އެ ހަމަލާގައި ހަތަރު މީހުން މަރުވެ، 18 މީހުންނަށް އަނިޔާވި އެވެ.
އިރުމަތީގައި އޮންނަ ނަންގަރްހާރް ޕްރޮވިންސްގައި ތާލިބާނުންގެ އުޅަނދަކަށް ހަމަލާ ދީ ހަތަރު މީހުން މަރާލައި، އިތުރު މީހަކަށް އަނިޔާވި އެވެ. އެކަމުގައި ފަހަތުގައި ވެސް އޮތީ އައިއެސް ކަމަށް ވެ އެވެ.
ބުރާސްފަތި ދުވަހު ދިން ހަތަރު ވަނަ ހަމަލާއަކީ ކާބުލްގެ ނިއާޒް ބެއިކް ސަރަހައްދުގައި މައިނެއް ހަރުކޮށް ގޮއްވާލުމުން، ދެ ކުދިންނަށް އަނިޔާވި ހާދިސާ އެވެ.
އެއް ދުވަސް ތެރޭ އައިއެސްއިން ގިނަ ހަމަލާތަކެއް ދީފައިވާ އިރު، މި ހަފްތާގައި ޝިއައީ ސްކޫލަކަށް ހަމަލާ ދިނުމުގެ ފަހަތުގައި ވެސް އޮތީ އައިއެސް އެވެ.
