ޕެރިސް (އޭޕްރީލް 20) - ސާޖިއޯ ރާމޯސްގެ ގޯލާ އެކު މިރޭ އެންޖާސް އަތުން 3-0 އިން ޕީއެސްޖީ މޮޅުވި ނަމަވެސް، ފްރެންޗް ލީގު ޗެމްޕިއަންކަން ކަށަވަރުކުރަން އިތުރު އިންތިޒާރެއް ކުރަން ޖެހިއްޖެ އެވެ.
ޕީއެސްޖީ އަށް މިރޭ ލީގު ޔަގީންކުރެވެން އޮތީ ދެ ވަނައިގައި އޮތް މާސޭ އަށް ނޯންޓެސް އަތުން މޮޅުނުވެވިިއްޖެނަމަ އެވެ. މިރޭގެ މެޗުން ނޯންޓެސް އަތުން ފަހަތުން އަރައި 3-2 އިން މާސޭ މޮޅުވުމުން ޕީއެސްޖީ އަށް މި ވަނީ ލީގު ތަށި ހޯދައިގެން ބާއްވަން ބޭނުންވި އުފާފާޅުކުރުން ލަސްކުރަން ޖެހިފަ އެވެ.
ޕީއެސްޖީ މި ވަގުތު ފްރެންޗް ލީގުގެ އެއް ވަނައިގައި އޮތީ 33 މެޗުން 77 ޕޮއިންޓާ އެކު އެވެ. ދެ ވަނައިގައި އޮތް މާސޭ އަށް 33 މެޗުން މި ވަނީ 62 ޕޮއިންޓް ލިބިފަ އެވެ.
ޕީއެސްޖީ އަށް ދެން ޗެމްޕިއަންކަން ޔަގީންކުރެވޭނީ ހޮނިހިރު ދުވަހު ލެންސާ ކުޅޭ މެޗުންނެވެ. އެ މެޗުން ޕޮއިންޓެއް ހޯދައިގެން ވެސް ޕީއެސްޖީ އަށް ބާކީ ހަތަރު މެޗު އޮއްވައި، ލީގު ތަށި ކަށަވަރުު ކުރެވޭނެ އެވެ. ޕީއެސްޖީން މީގެ ކުރިން ވަނީ ނުވަ ފަހަރު ފްރެންޗް ލީގު ކާމިޔާބުކޮށްފަ އެވެ.
އެންޖާސް ދަނޑުގައި މިރޭ ޕީއެސްޖީން ލީޑުނެގީ 28 ވަނަ މިނިޓްގައި އަޝްރަފް ހަކީމީ ދިން ބޯޅައަކުން އޭރިއާ ބޭރުން ކީލިއަން އެމްބާޕޭ ޖެހި ގޯލުންނެވެ. ފުރަތަމަ ހާފުގެ އިތުުރު ވަގުުތުގައި ޕީއެސްޖީގެ ލީޑުފުޅާކޮށްދިނީ އެންހެލް ޑި މާރިއާ ނެގި ހުރަހަކުން ރާމޯސް ބޮލުން ޖެހި ގޯލުންނެވެ. މެޗު ނިމެން 13 މިނިޓަށް ވެފައި ވަނިކޮށް، މާކުއީނިއޯސް ޕީއެސްޖީގެ ތިން ވަނަ ގޯލު ޖެހީ ވެސް ޑި މާރިއާ ނެގި ހުރަހަކުންނެވެ.
ބަދަލަކަށް އެރި އެންޖާސްގެ އެޑުއާޑް މިޗުޓަށް ވަނީ އިތުރު ވަގުތުގައި ރަތް ކާޑު ދައްކައިފަ އެެވެ. އަނިޔާގެ ސަަބަބުން މި މެޗުގައި ޕީއެސްޖީގެ ތަރި މެސީ ނުކުޅެ އެވެ.
މާސޭ ދަނޑުގައި މިރޭ ކުޅުނު މެޗުގެ 26 ވަނަ މިނިޓްގައި އަންދްރެއި ގިރޯޓޯ ވަނީ ނޯންޓެސް އަށް ލީޑުނަގައިދީފަ އެެވެ. އެކަމަކު، 39 ވަނަ މިނިޓްގައި ޑިމިޓްރީ ޕަޔެޓް ޕެނަލްޓީ އަކުން މާސޭ އަށް އެއްވަރުކޮށްދިނެވެ. މާސޭ އިން އެއްވަރުކުރިތާ ދެ މިނިޓް ފަހުން ނޯންޓެސް އިން ވަނީ ދެ ވަނަ ފަހަރަށް ލީޑުނަގައިފަ އެވެ. މިއީ މާކަސް ކޯކޯ ޖެހި ގޯލެކެވެ.
ނޯންޓެސް އިން ހާފު ނިންމާލީ ކުރީގައި އޮވެގެންނެވެ. އެކަމަކު، މާސޭ އިން ދެ ވަނަ ހާފުގައި ތަފާތު ރޫހެއްގައި ކުޅެލައި ވަނީ ނަތީޖާ އަނބުރާލައިފަ އެވެ. މާސޭ އިން ދެ ވަނަ ފަހަރަށް އެއްވަރު ކުރީ ވެސް ޕަޔެޓް ޖެހި ޕެނަލްޓީ އަކުންނެވެ. މޮޅުވި ގޯލު ކާމިޔާބުކުރީ އަމީން ހަރީޓް އެވެ.
ނޯންޓެސް އިން މެޗު ނިންމާލީ އެއް ކުޅުންތެރިއަކު މަދުކޮށެވެ. މެޗުގެ އިތުރު ވަގުުތުގައި ކޯކޯ އަށް ވަނީ ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ.
