މިފަހުން ރިސޯޓު ހަދަން ހުޅުވާލި ރަށްތަކަށް ލިބުނު ބިޑުތައް އިވެލުއޭޓުކުރުމަށް ފަހު އޭގެ ތެރެއިން ހަތް ރަށެއްގައި ޓޫރިސްޓު ރިސޯޓު ތަރައްގީކުރަން އެވޯޑުކުރަން ޓޫރިޒަމް މިނިސްޓްރީން ނިންމީ އިއްޔެ އެވެ.
މި ރަށްތަކަކީ މިދިޔަ އަހަރު ދުބާއީ އެކްސްޕޯގައި ބީލަން ހުޅުވާލި 18 ރަށުގެ ތެރޭގައި ހިމެނޭ ރަށްތަކެވެ. މީގެ ތެރެއިން ނުވަ ރަށަކަށް 18 ބީލަން ލިބުނެވެ.
މި ބީލަންތައް އިވެލުއޭޓުކޮށް ނިންމުމަށް މިނިސްޓްރީން އިއްޔެ އެވޯޑުކުރި ރަށްތަކަކީ:
- ހއ. އަލިދުއްފަރުފިނޮޅު - ލީސް އެކުއިޒިޝަން ކޮސްޓުގެ ގޮތުގައި 390،000.00 ޑޮލަރު، ޓޫރިޒަމް ޓްރެއިނިން ފަންޑަށް 7،000.00 ޑޮލަރު
- މ. ސީދީހުރާ (މ. ސީދީހުރާ ވެލިގަނޑާ އެކު) - ލީސް އެކުއިޒިޝަން ކޮސްޓުގެ ގޮތުގައި 1,599,999.00 ޑޮލަރު، ޓޫރިޒަމް ޓްރެއިނިން ފަންޑަށް 120،000.00 ޑޮލަރު
- ފ. އެނބުލުފުށި - ލީސް އެކުއިޒިޝަން ކޮސްޓުގެ ގޮތުގައި 3،601،155.00 ޑޮލަރު، ޓޫރިޒަމް ޓްރެއިނިން ފަންޑަށް 150،000.00 ޑޮލަރު
- ފ. ޖިންނަތުގައު - ލީސް އެކުއިޒިޝަން ކޮސްޓުގެ ގޮތުގައި 2,021,121.00 ޑޮލަރު، ޓޫރިޒަމް ޓްރެއިނިން ފަންޑަށް 200،121.00 ޑޮލަރު
- ގއ. ފުނަދޫވިލިގިއްލާ - ލީސް އެކުއިޒިޝަން ކޮސްޓުގެ ގޮތުގައި 702،000.00 ޑޮލަރު، ޓޫރިޒަމް ޓްރެއިނިން ފަންޑަށް 5،000.00 އެމެރިކާ ޑޮލަރަށް
- ގދ. ކަނޑަހަލަގަލާ - ލީސް އެކުއިޒިޝަން ކޮސްޓުގެ ގޮތުގައި 2،800،000.00 ޑޮލަރު، ޓޫރިޒަމް ޓްރެއިނިން ފަންޑަށް 150،000.00 ޑޮލަރު
- ގދ. ފެރޭތަވިލިގިއްލާ (ގދ. ދެކާނބަ، ގދ. ކޮޑެރެޓާ އަދި 0°22’12.86”N 73°1’28.98” E އާ އެކު) - ލީސް އެކުއިޒިޝަން ކޮސްޓުގެ ގޮތުގައި 702،000.00 ޑޮލަރު، ޓޫރިޒަމް ޓްރެއިނިން ފަންޑަށް 5،000.00 ޑޮލަރު
މިފަހަރު ހަވާލުކުރި ރަށްތަކުގެ ތެރޭގައި ހިމެނެނީ މިހާރު ރިސޯޓުތައް ވަރަށް މަދުން ހުރި ހއ.، މ.، އަދި ފ. އަތޮޅުގެ އިތުރުން ހުވަދޫ އަތޮޅެވެ.
ބިޑު ލިބުނު ރަށްތަކުގެ ތެރެއިން ހަވާލުނުކުރަނީ ހއ. މެދަފުއްޓާއި ތ. އަތޮޅުން ރަށެކެވެ.
ރިސޯޓު ހަދަން ރަށްތައް ކުއްޔަށް ދީގެން ލިބޭނެ އާމްދަނީ
އެކުއިޒިޝަން ކޮސްޓް - 11،834،275 ޑޮލަރު (182.4 މިލިއަން ރުފިޔާ)
ޓޫރިޒަމް ޓްރެއިނިން ފަންޑު - 637،121 ޑޮލަރު (9.8 މިލިއަން ރުފިޔާ)
ޓޫރިޒަމް މިނިސްޓްރީން ނެރުނު ބަޔާނެއްގައި ބުނި ގޮތުގައި ބީލަން އެވޯޑުކުރި ފަރާތްތަކުން އެކުއިޒިޝަން ކޮސްޓާއި ޓްރެއިނިން ފަންޑަށް ހުށަހަޅާފައިވާ އަދަދުގެ ދެބައިކުޅަ އެއްބައި ދެއްކުމުން އިނީޝަލް އީއައިއޭ ހަދަން 60 ދުވަހުގެ މުއްދަތެއް ދީފައިވާ ކަމަށެވެ.
މި ރަށްތައް ހަވާލުކުރިކަން ހާމަކުރި ނަމަވެސް ބިޑު ކާމިޔާބު ކުރީ ކޮން ބަޔެއް ކަމެއް މިނިސްޓްރީން އިއްޔެ ހާމަނުކުރެ އެވެ.
ބައެއް މުހިންމު ހަބަރުތައް
- ކުރީގެ ރައީސް އަބްދުﷲ ޔާމީނަަށް މަނީ ލޯންޑާ ކުރަން މަގުފަހިކޮށްދިންކަމުގެ ތުހުމަތުގައި އޭރުގެ ރައީސް އޮފީހުގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރުގެ މައްޗަށް އުފުލި ދައުވާ މަދަނީ މިންގަނޑަށް ފެތޭ ކަމާއި އެ ދައުވާ ކްރިމިނަލް ކޯޓުގައި ގެންދެވޭނެ ކަމަށް ހައި ކޯޓުން ހުކުމް ކުރީ އިއްޔެ އެވެ.
- މި އަހަރުގެ ފެބްރުއަރީ މަހު، ޔޫރަޕުގެ ދެ ގައުމެއްގެ އިދާރާއަކާއި އެމެރިކާގެ އެފްބީއައިއާ ގުޅިގެން ދިވެހި ފުލުހުން ހައްޔަރުކުރި ވ. ދެލްވައްތަ، ހޫދު މުހައްމަދު ޒާހިރު (އައިސިސް ހޫދު) ގެ މައްޗަށް އުފުލާފައިވާ ފަސް ދައުވާގެ ޝަރީއަތް ނިމެންދެން އޭނާ ބަންދު ކުރަން ކްރިމިނަލް ކޯޓުން އަމުރުކުރީ އިއްޔެ އެވެ.
- ރާއްޖޭގައި ތިބި ކަމަށް ބުނާ އިންޑިއާގެ ހަތިޔާރުއެޅި ސިފައިން ބާލަން ގޮވާލާ އިދިކޮޅުން ފަށާފައިވާ އިންޑިއާ އައުޓް ހަަރަކާތުގެ ދަށުން ބޭނުންކުރާ "އިންޑިއާ އައުޓް" ސްލޯގަން ޖަހާފައިވާ ބެނޭތައް ނަގަން ގޭގޭގެ ވެރިންނަށް ފުލުހުން އަންގަން ފެށީ އިއްޔެ އެވެ.
ދުވަހުގެ ކޯޓޭޝަން
ރާއްޖޭގައި ތިބި ކަމަށް ބުނާ އިންޑިއާގެ ހަތިޔާރުއެޅި ސިފައިން ބާލަން ގޮވާލާ އިދިކޮޅުން ފަށާފައިވާ އިންޑިއާ އައުޓް ހަަރަކާތުގެ ދަށުން ބޭނުންކުރާ "އިންޑިއާ އައުޓް" ސްލޯގަން ޖަހާފައިވާ ބެނޭތައް ނަގަން ގޭގޭގެ ވެރިންނަށް އަންގަމުން ފުލުހުން އިއްޔެ ނެރުނު ބަޔާނެއްގައި ބުނީ:
"ބެނާގައި އާއްމުކޮށް ފެންނާނެހެން "އިންޑިޔާ އައުޓް" ޖަހާފައި ދަމާފައި ހުރުމަކީ ވަކި ގައުމަކަށް ނިސްބަތްކޮށް ހިންގޭ، އެ ގައުމުގެ ގަދަރާއި ކަރާމާތަށް އުނިކަން ލިބޭފަދަ އަމަލެއްގެ ގޮތުގައި ސިފަވުމާއި،"
ދުވަހުގެ ފޮޓޯ
ލ. އަތޮޅުގެ އަތަހެނދާއިން ފުރޮޅާލާފައި ތިއްބާ ފެނުނު ފަސް ވެލާ. އެ ވެލާތައް ފެނުނީ ރަށުގެ ރާޅުޖަހާ ސަރަހައްދާއި ތިން މީޓަރު އެތެރެއިން. ވެލާތައް ސަލާމަތްކުރުމުގައި މޯލްޑިވްސް އަންޑަވޯޓާ އިނިޝިއޭޓިވް، އޮލިވް ރިޑްލީ ޕްރޮޖެކްޓް، ސިކްސް ސެންސަސް ލާމު ރިސޯޓު، މަންޓާ ޓްރަސްޓް، ބްލޫ މެރިން ފައުންޑޭޝަން އަދި ފުލުހުން ވެސް ވަނީ ހަރަކާތްތެރިވި --- ފޮޓޯ: އޮލިވް ރިޑްލީ ޕްރޮޖެކްޓް
ދިރާސާތަކުން ކިޔާލުމަށް
"ޓޫރިޒަމް ސެޓަލައިޓް އެކައުންޓް 2017"
މިއީ ރާއްޖޭގެ އިގްތިސާދަށް ސީދާ ގޮތުން ޓޫރިޒަމް އިންޑަސްޓްރީން ކުރާ އަސަރުތައް ދެނެގަތުމަށް ޓޫރިޒަމް މިނިސްޓްރީން މޯލްޑިވްސް ބިއުރޯ އޮފް ސްޓެޓިސްޓިކްސް އާ ގުޅިގެން 2017 ވަނަ އަހަރު ކުރި ދިރާސާއެކެވެ. މި ދިރާސާގައި ވަނީ ރާއްޖެ އަންނަ ފަތުރުވެރިން އެންމެ ގިނަ ހޯދާ ހިދުމަތްތަކާއި ގަންނަ ޕްރޮޑަކްޓުތަކުގެ އިތުރުން އެ ތަކެތި އުފެއްދުމަށް ރާއްޖޭގައި ކުރާ ކަންކަމުގެ މައްޗަށް އަލިއަޅުވާލާފަ އެވެ.
