ސްރީ ލަންކާގެ ރައީސް ގޮތަބަޔާ ރާޖަޕަކްސަ އަދި ބޮޑު ވަޒީރު މަހިންދަ ރާޖަޕަކްސަގެ އިސްތިއުފާއަށް ޑިމާންޑުކޮށް ބުޑިސްޓް ފާދިރީ ތެރިޕަހާ ސިރީދައްމަ ބަނޑުހައި ހޫނުކަމުގެ ހަލުތާލެއް ފަށައިފި އެވެ.
މީގެ ކުރިން 2013 ވަނަ އަހަރު ވެސް އޭނާ ވަނީ ބަނޑުހައި ހޫނުކަމުގެ ހަޅުތާލެއް ކުރިއަށް ގެންގޮސްފަ އެވެ. އެ ފަހަރު ހަޅުތާލު ކުރީ ރަތުޕަސްވާލާގެ މީހުންނަށް ސާފު ބޯފެން ލިބޭނެ ގޮތް ހަމަޖެއްސުމަށެވެ.
ކޮލޮމްބޯގައި ރައީސް އޮފީސް ކުރިމަތީގައި ޓެންޓު ޖަހައިގެން އާއްމުން މުޒާހަރާ ކުރަމުން ދާތާ ގިނަ ދުވަސްތަކެއް ވެފައިވާ އިރު، އެ ތަނުގައި ހުރި ފާދިރީ ބުނީ ރައީސް އާއި ބޮޑު ވަޒީރު އިސްތިއުފާ ނުދޭ ނަމަ މަރުވަންދެން ވެސް ބަނޑުހައި ހޫނުކަމުގެ ހަޅުތާލު ކުރާނެ ކަމަށެވެ.
ލަންކާގެ އިގްތިސާދީ ކާރިސާގައި ރަމްބުއްކަނައިގައި އަންގާރަ ދުވަހު ބޭއްވި މުޒާހަރާގެ ތެރެއަށް ފުލުހުން ބަޑި ޖެހުމުން އެކަކު މަރުވި އެވެ. ކޮލޮމްބޯގައި މެދުނުކެނޑި ކުރިއަށްދާ މުޒާހަރާގައި ވަނީ އޭނާގެ ހަނދާން އާ ކުރުމުގެ ގޮތުން ހަމަހިމޭންކަމުގެ ސުކޫތެއް ފާހަގަކޮށްފަ އެވެ.
