އަފްގާނިސްތާނުގެ ވެރިރަށް ކާބުލްގައި ހުންނަ ފިރިހެން ކުދިންގެ ސްކޫލެއްގައި ދެ ބޮން ގޮއްވާލުމުގެ ސަބަބުން ހަ މީހުން މަރުވެ، 20 އަށް ވުރެ ގިނަ މީހުންނަށް އަނިޔާވެއްޖެ އެވެ.
ބޮން ގޮއްވާލީ ޝިއައީން ގިނަ އަދަދަކަށް ދިރިއުޅޭ ކާބުލްގެ ހުޅަނގުގެ ހިސާބެއްގައި ހުންނަ އަބްދުލް ރަހީމް ޝާހިދް ހައި ސްކޫލުގެ ހެނދުނުގެ ކްލާސްތަކަށް ފަހު ކުދިން ނުކުތް ވަގުތާ ދިމާކޮށްފަ އެވެ.
އެ ސްކޫލްގެ އިތުރުން، ކައިރީގައި ހުންނަ ޓިއުޝަން ސެންޓަރަކަށް ވެސް ގްރެނޭޑް ހަމަލާއެއް ދޭން މަސައްކަތް ކުރި އެވެ.
ހަމަލާގެ ޒިންމާ މިހާތަނަށް އެއްވެސް ބަޔަކު ނުއުފުލަ އެވެ. ނަމަވެސް މީގެ ކުރިން އެ ސަރަހައްދުގައި އިސްލާމިކް ސްޓޭޓް (އައިއެސް) އިން ހަމަލާތައް ދީފައިވެ އެވެ.
ތާލިބާން އޮފިޝަލަކާ ހަވާލަދީ ރޮއިޓާޒްއިން ބުނީ ގޮއްވާލާފައި ވަނީ އައިއީޑީތަކެއް ކަމަށާއި އެ ތަކެތި ހުރީ ދަބަސްތަކެއްގައި ބަހައްޓާފައި، ސްކޫލް ގޭޓު ކައިރީގައި ކަމަށެވެ.
ރިޕޯޓުތައް ބުނާ ގޮތުން ހަމަލާގައި މަރުވި މީހުންނާއި ޒަހަމްވި މީހުންގެ އަދަދުތައް އިތުރުވާނެ ކަމަށް ބެލެވެ އެވެ.
މިދިޔަ އަހަރުގެ މޭ މަހު ދާޝްތް-އޭ-ބަރްޗީގައި ހުންނަ އަންހެން ކުދިންގެ ސްކޫލަކަށް އައިއެސްއިން ދިން ހަމަލާގައި ދަރިވަރުންނާއި ސްކޫލް މުވައްޒަފުން ހިމެނޭ ގޮތަށް 90 މީހުން މަރުވި އެވެ.
