ސްރީލަންކާއަށް ކުރިމަތިވެފައިވާ ދަތިތަކުން އަރައިގަތުމަށް އެހީވުމުގެ ގޮތުން ޗައިނާގެ ސަރުކާރުން ލަންކާއަށް އަވަސް އިންސާނީ އެހީ ފޯރުކޮށްދޭން ނިންމައިފި އެވެ.
ޗައިނާ އިންޓަނޭޝަނަލް ޑިވެލޮޕްމަންޓް ކޯޕޮރޭޝަން އެޖެންސީގެ ތަރުޖަމާން ޒޫ ވެއި އަންގާރަ ދުވަހު ވިދާޅުވީ ލަންކާގެ ހާލަތު ވަޒަންކޮށް، އެހީވާން ޗައިނާއިން ތައްޔާރު ކަމަށެވެ.
"އަޅުގަނޑުމެން ގަބޫލު ކުރާ ގޮތުގައި ލަންކާގެ ސަރުކާރާއި ރައްޔިތުން މި ވަގުތީ ގޮންޖެހުންތަކުން އަރައިގަނެ، އިގްތިސާދީ އަދި އިޖުތިމާއީ ހަމަޖެހުމާއި ތަރައްގީ ދަމަހައްޓާނެ،" އޭނާ ވިދާޅުވި އެވެ.
ބޭރު ފައިސާ ހުސްވުމުގެ ސަބަބުން ލަންކާއަށް ބޭނުންވާ ޒަރޫރީ ތަކެތި އިމްޕޯޓް ކުރެވޭނެ ގޮތެއް ނެތެވެ. އެގޮތުން ތެލާއި، ބޭސް ވެސް ލިބުން ދައްޗެވެ.
ތެލު އަގު ބޮޑު ކުރުމާ އެކު އަންގާރަ ދުވަހު ލަންކާގެ އެކި ހިސާބުތަކުގައި އެތައް ހާސް ބަޔަކު މުޒާހަރާ ކުރި އެވެ. އެ މީހުން ގޮވަނީ ރައީސް ގޮތަބަޔާ ރާޖަޕަކްސަ އާއި ބޮޑު ވަޒީރު މަހިންދަ ރާޖަޕަކްސަގެ އިސްތިއުފާއަށެވެ.
ރަމްބުއްކަނައިގައި އޮތް މުޒާހަރާ ހޫނުވެ، ފުލުހުން ބަޑި ޖެހުމުގެ ސަބަބުން އެކަކު މަރުވެ 24 މީހުންނަށް އަނިޔާވެފައިވެ އެވެ. އެ ތަނުގައި މިހާރު ދަނީ ކާފިއު ހިންގަމުންނެވެ.
