ސްރީލަންކާގެ ރަމްބުއްކަނައިގައި މުޒާހަރާ ކުރަމުން ދިޔަ މީހުންގެ ތެރެއަށް ފުލުހުން ބަޑި ޖެހުމުން އެކަކު މަރުވެ، 24 މީހުންނަށް އަނިޔާވެއްޖެ އެވެ.
ފުލުހުންގެ އަށް މީހުންނަށް ވެސް އަނިޔާ ލިބުނެވެ. މުޒާހަރާގެ ބައިވެރިން ވަނީ ރަމްބުއްކަނަ ފުލުހުންގެ ސްޓޭޝަން ވަށާލައި، އެ ތަނަށް ގަލާއި ހިލަ އުކައިފަ އެވެ.
ފުލުހުން ބުނީ މުޒާހަރާ ރޫޅާލަން ބަޑި ޖެހީ، މުޒާހަރާގެ ބައިވެރިން ތެޔޮ ބައުޒަރެއްގައި ރޯ ކުރުމުން ކަމަށެވެ. އޭގެ އިތުރުން އާއްމު ދަތުރުފަތުރަށް ހުރަސް އެޅޭ ގޮތަށް ރޭލު ދަގަނޑު ބަންދު ކުރި ކަމަށް ބުންޏެވެ.
ރަމްބުއްކަނަ ރޭލް ދަގަނޑު ބަންދުކޮށްގެން އަށް ގަޑިއިރަށް ވުރެ ގިނަ އިރު ހޭދަވި އިރު، މުޒާހަރާގެ ބައިވެރިން ނުރުހުން ފާޅުކުރީ ސަރުކާރުން ތެލުގެ އަގު މަތި ކުރުމުންނެވެ.
ހަމަނުޖެހުމާ ހެދި ރަމްބުއްކަނައިގައި ވަކި މުއްދަތެއް ނެތް ގޮތަށް ވަނީ ކާފިއު ހިންގަން ފަށާފަ އެވެ. ހަމަނުޖެހުން ތަހުގީގު ކުރުމަށް ލަންކާގެ ހިއުމަން ރައިޓްސް ކޮމިޝަނުން ވަނީ ތިން މެމްބަރުންގެ ޓީމެއް އައްޔަންކޮށްފަ އެވެ.
ހަމަނުޖެހުމާ ގުޅިގެން އދ. އިން ކަންބޮޑުވުން ފާޅުކޮށް ބުނީ ސުލްހަވެރި މުޒާހަރާއާ ދެކޮޅަށް އަނިޔާވެރި އަމަލުތައް އިސްކުރުމަކީ ރައްޔިތުންގެ އަސާސީ ހައްގުތައް ހިމާޔަތް ކުރުމަށް އޮތް ގޮންޖެހުމެއް ކަމަށެވެ.
